എൽമണ്ട്, ന്യൂയോർക്ക് — സമൂഹനന്മക്കുവേണ്ടി നിസ്വാർത്ഥമായി പ്രവർത്തിക്കുന്നവരും തങ്ങളുടെ പ്രവർത്തന മേഖലകളിൽ പ്രതിഭ തെളിയിച്ചവരുമായ എട്ട് ഇന്ത്യൻ അമേരിക്കൻ മലയാളികളെ കേരള സെന്റർ അവാർഡ് നൽകി ആദരിക്കുന്നതിന് തെരഞ്ഞെടുത്തു. ഒക്ടോബർ 24 ശനിയാഴ്ച്ച 5:00 – ന് കേരള സെന്റർ ഓഡിറ്റോറിയത്തിൽവച്ച് നടക്കുന്ന മുപ്പത്തിനാലാമത് വാർഷിക അവാർഡ് ദാന ചടങ്ങിൽവച്ച് ഇവരെ ആദരിക്കുന്നതാണ്.
അമേരിക്കയിലെയും കേരളത്തിലെയും സാമൂഹ്യ—സാംസ്ക്കാരിക—രാഷ്ട്രീയ നേതാക്കൾ ഈ അവാർഡ് ദാന ചടങ്ങിൽ പങ്കെടുക്കും. “പ്രഗൽഭരും സമൂഹനന്മക്കുവേണ്ടി പ്രവർത്തിക്കുന്നവരുമായ അമേരിക്കൻ മലയാളികളെ കേരള സെന്റർ 1992 മുതൽ ആദരിച്ചുവരുന്നു. എല്ലാ വർഷവും അവാർഡ് നോമിനികളെ ക്ഷണിക്കുകയും അവരിൽനിന്ന് ഓരോ കാറ്റഗറിയിലെ ഏറ്റവും യോഗ്യരായവരെ അവാർഡ് സെലക്ഷൻ കമ്മിറ്റി എതിരില്ലാതെ തെരഞ്ഞെടുക്കുകയും ചെയ്യുന്നു. ഈ വർഷം തെരഞ്ഞടുക്കപ്പെട്ടവരും കഴിഞ്ഞ വർഷങ്ങളിലെപ്പോലെ പ്രതിഭാസമ്പന്നർ തന്നെയാണ്” – കേരള സെന്റർ ട്രസ്റ്റി ബോർഡ് ചെയർമാനും അവാർഡ് കമ്മിറ്റി മെമ്പറുമായ ഡോ. തോമസ് എബ്രഹാം പ്രസ്താവിച്ചു.
“സ്വന്തം പ്രവർത്തനരംഗത്ത് പ്രതിഭ തെളിയിക്കുകയും മറ്റുള്ളവർക്ക് നന്മ ചെയ്ത് സമൂഹ പുരോഗതിക്ക് സംഭാവന ചെയ്യുകയും ചെയ്യുന്ന അമേരിക്കൻ മലയാളികളെ ആദരിക്കുന്നതിൽ കേരള സെന്ററിന് വളരെ സന്തോഷമുണ്ടെന്നും, അവരുടെ മാതൃക മറ്റുള്ളവർക്ക് ഒരു പ്രചോദനം ആണെന്നും” ഡയറക്ടർ ബോർഡിന്റെയും അവാർഡ് കമ്മിറ്റിയുടെയും ചെയർമാനായ ഡോ. മധു ഭാസ്കരൻ തന്റെ പ്രസ്താവനയിൽ പറഞ്ഞു. ഡോ. തോമസ് എബ്രഹാം, ഡോ. മധു ഭാസ്കരൻ എന്നിവർക്കു പുറമെ, വർക്കി ഏബ്രഹാം, ഡെയ്സി പി. സ്റ്റീഫൻ, ഡോ. മേരിലിൻ ജോർജ് എന്നിവരായിരുന്നു മറ്റു അവാർഡ് കമ്മിറ്റി അംഗങ്ങൾ.
ഈ വർഷം ആദരിക്കപ്പെടുന്നവരും അവരുടെ പ്രവർത്തന മേഖലയും:
ലെജിസ്ലേറ്റർ ആനന്ത് നമ്പ്യാർ – രാഷ്ട്രീയ നേതൃത്വം & മുഖ്യ പ്രഭാഷകൻ
ഡോ. ജോ വർഗീസ് – വൈദ്യശാസ്ത്രം
ഡോ. ബീന എസ്. പീറ്റേഴ്സ് – നഴ്സിംഗ് നേതൃത്വം
ഡോ. ഗിരീഷ് കുമാർ പണിക്കർ – അപ്ലൈഡ് സയൻസ്
ടി. എസ്. നന്ദകുമാർ – പെർഫോമിംഗ് ആർട്സ്
സിബി ഡേവിഡ് – കമ്മ്യൂണിറ്റി സർവീസ്
പ്രിൻസ് ജോൺസൺ – വിദ്യാഭ്യാസം
ജോസ് ചെരിപുറം – പ്രവാസി മലയാള സാഹിത്യം
കഴിഞ്ഞ മുപ്പത്തിമൂന്ന് വർഷങ്ങളിൽ കേരള സെന്റർ ആദരിച്ച 195 – ഓളം അമേരിക്കൻ മലയാളികൾ കൂടുതൽ ഉയരങ്ങളിൽ എത്തുവാൻ ശ്രമിക്കുന്നതിലും സേവനത്തിന്റെ പാതയിലൂടെ മുന്നോട്ട് പോകുന്നതിലും വളരെ സന്തോഷമുണ്ടെന്ന് പ്രസിഡന്റ് അലക്സ് എസ്തപ്പാൻ തന്റെ പ്രസ്താവനയിൽ പറഞ്ഞു. അവാർഡ്ദാന ചടങ്ങിനോടനുബന്ധിച്ച് വൈവിധ്യമാർന്ന കലാപരിപാടികളും അത്താഴവിരുന്നും ഉണ്ടായിരിക്കും. ഈ പുരസ്കാര ചടങ്ങിൽ പങ്കെടുക്കുവാൻ ഓരോരുത്തരെയും കേരള സെന്ററിലേക്ക് ഹാർദ്ദവമായി ക്ഷണിച്ചു.
നിങ്ങളുടെ സീറ്റ് റീസർവ് ചെയ്യുവാൻ കേരള സെന്ററുമായി ബന്ധപ്പെടുക:, email: kc@keralacenterny.com, ഫോൺ 516 358 2000.
കൂടുതൽ വിവരങ്ങൾക്ക് : അലക്സ് കെ. എസ്തപ്പാൻ, പ്രസിഡന്റ് – 516 503 9387, രാജു തോമസ്, സെക്രട്ടറി – 516 434 0669
കേരള സെന്റർ ആദരിക്കുന്നവരുടെ ഹൃസ്വ ജീവചരിത്രവും പ്രവർത്തന മേഖലയും:
ലെജിസ്ലേറ്റർ ആനന്ത് നമ്പ്യാർ – രാഷ്ട്രീയ നേതൃത്വം
ആനന്ത് നമ്പ്യാർ വെസ്റ്റ്ചെസ്റ്റർ കൗണ്ടി, ന്യൂയോർക്ക് ഡിസ്ട്രിക്റ്റ് 7 – നെ പ്രതിനിധീകരിക്കുന്ന ലെജിസ്ലേറ്ററാണ്. 2025 ൽ തിരഞ്ഞെടുക്കപ്പെട്ടഅദ്ദേഹം കൗണ്ടിയിലെ ആദ്യത്തെ ദക്ഷിണേഷ്യൻ അമേരിക്കനും ഹിന്ദുമതവിശ്വാസിയുമായ അംഗമാണ്. മുമ്പ്, അമേരിക്കൻ എക്സ്പ്രസ്, മാസ്റ്റർകാർഡ്, സിൻക്രൊണി ഫിനാൻഷ്യൽ എന്നിവയിൽ 25 വർഷം പ്രവർത്തിച്ച പരിചയസമ്പന്നനായ ഒരു ഫിനാൻഷ്യൽ എക്സിക്യൂട്ടീവായിരുന്നു അദ്ദേഹം.
അവിടെ ഗ്ലോബൽ സ്ട്രാറ്റജി ആൻഡ് പ്രൊഡക്ട് ടീമുകളെ നയിച്ച അദ്ദേഹം ഇന്നോവേഷനുള്ള 12 യുഎസ് പേറ്റന്റുകൾ നേടിയിട്ടുണ്ട്. മാമറോനെക്ക് സ്കൂളിന്റെയും ടൗണിന്റെയും ബോർഡുകളിലും അദ്ദേഹം സേവനമനുഷ്ഠിച്ചിട്ടുണ്ട്. അവിടെ അദ്ദേഹം സാമ്പത്തിക സ്ഥിരത, യൂണിയൻ ചർച്ചകൾ, ഉത്തരവാദിത്തമുള്ള ഭവന വളർച്ച എന്നീ മേഖലകൾ കേന്ദ്രീകരിച്ചാണ് പ്രവർത്തിച്ചത്. കനേഡിയൻ സർവകലാശാലകളിൽ നിന്നുള്ള എഞ്ചിനീയറിംഗ് ബിരുദവും അതോടൊപ്പം എംബിഎ ബിരുദവും അദ്ദേഹത്തിനുണ്ട്.
ഡോ. ജോ വർഗീസ് – വൈദ്യശാസ്ത്രം
സ്റ്റോണി ബ്രൂക്ക് യൂണിവേഴ്സിറ്റിയിൽ ന്യൂറോളജി വിഭാഗത്തിലെ ചെയർമാനും ഡിസ്റ്റിംഗ്വിഷ്ഡ് യൂണിവേഴ്സിറ്റി പ്രൊഫസറുമാണ് ഡോ. ജോ വർഗീസ്. ബാംഗ്ലൂരിലെ സെന്റ് ജോൺസ് മെഡിക്കൽ കോളജിൽനിന്ന് ബിരുദം നേടിയ അദ്ദേഹം യുകെയിൽ ബിരുദാനന്തര പരിശീലനം പൂർത്തിയാക്കി, തുടർന്ന് ന്യൂയോർക്കിലെ ആൽബർട്ട് ഐൻസ്റ്റീൻ കോളജ് ഓഫ് മെഡിസിനിൽനിന്ന് റെസിഡൻസി, ഫെലോഷിപ്പുകൾ, ക്ലിനിക്കൽ റിസർച്ച് മെത്തേഡുകളിൽ ബിരുദാനന്തര ബിരുദം എന്നിവ നേടി.
പ്രമുഖ ജേർണലുകളിൽ 350-ലധികം പ്രസിദ്ധീകരണങ്ങളുള്ള അദ്ദേഹത്തിന്റെ നിലവിലെ പ്രവർത്തനങ്ങളിൽ നോൺ-ഫാർമക്കോളജിക് ഡിമെൻഷ പ്രിവൻഷൻ, ആഗോള ഡിമെൻഷ ഗവേഷണം, കേരള അമേരിക്കക്കാർക്കിടയിൽ കുടിയേറ്റംകൊണ്ട് കോഗ്നിഷനിൽ ഉണ്ടാകുന്ന വ്യതിയാനകളെ പരിശോധിക്കുന്ന എൻ ഐ എച്ച് ധനസഹായത്തോടെയുള്ള ‘അക്കരെ’ (AKKARE) പഠനം എന്നിവ ഉൾപ്പെടുന്നു.
ഡോ. ബീന എസ്. പീറ്റേഴ്സ്, DNP, RN, MS, FACHE, FABC, FAAN – നഴ്സിംഗ് ലീഡർഷിപ്പ്
ഡോ. ബീന പീറ്റേഴ്സ് യൂഎസ്എയിലെ മൂന്നാമത്തെ വലിയ പൊതുജനാരോഗ്യ സംവിധാനമായ കുക്ക് കൗണ്ടി (ചിക്കാഗോ) ഹെൽത്തിലെ സിസ്റ്റം ചീഫ് നഴ്സിംഗ് എക്സിക്യൂട്ടീവ് ആയിരുന്നു. ആരോഗ്യ സാങ്കേതിക കമ്പനിയായ എച്ച്ആർടിഎൽവൈ ഇൻകോർപ്പറേറ്റഡിന്റെ (HRTLY, Inc.) സഹസ്ഥാപകയും ഇപ്പോഴവർ അതിന്റെ ചീഫ് ക്ലിനിക്കൽ ഓഫീസറുമാണ്.
ഡോ. പീറ്റേഴ്സ് അമേരിക്കൻ കോളജ് ഓഫ് ഹെൽത്ത്കെയർ എക്സിക്യൂട്ടീവ്സ്, അമേരിക്കൻ അക്കാദമി ഓഫ് നഴ്സിംഗ്, ദി അഡ്വൈസറി ബോർഡ് എന്നിവയുടെ ഫെലോയും ജോൺസൺ & ജോൺസൺ നഴ്സ് ഇന്നൊവേഷൻ ഫെലോയുമാണ്. യുഐസി കോൺ എക്സ്റ്റേണൽ അഡ്വൈസറി ബോർഡ്, യുഐസി എംഎച്ച്എ അഡ്വൈസറി ബോർഡ്, ഇൻസ്റ്റിറ്റ്യൂട്ട് ഓഫ് മെഡിസിൻ ചിക്കാഗോ (ഐഒഎംസി) ബോർഡ് ഓഫ് ഗവർണേഴ്സ്, എക്സിക്യൂട്ടീവ് ബോർഡ് എന്നിവയുൾപ്പെടെ നിരവധി കമ്മ്യൂണിറ്റി—വിദ്യാഭ്യാസ ബോർഡുകളിൽ അവർ സേവനമനുഷ്ഠിക്കുന്നു.
ഇന്ത്യൻ നഴ്സസ് അസോസിയേഷൻ ഓഫ് ഇല്ലിനോയിയുടെ സ്ഥാപക പ്രസിഡന്റും കെസിഡബ്ല്യുഎഫ്എൻഎയുടെ ദേശീയ പ്രസിഡന്റുമായിരുന്നു.
ഡോ. ഗിരീഷ് കുമാർ പണിക്കർ – അപ്ലൈഡ് സയൻസ്
ഡോ. ഗിരീഷ് പണിക്കർ ഹോർട്ടികൾച്ചറൽ വിളകളെക്കുറിച്ചുള്ള സി-ഫാക്ടർ (കവർ ആൻഡ് മാനേജ്മെന്റ്) ഗവേഷണത്തിൽ പ്രാവീണ്യമുള്ള അന്താരാഷ്ട്രതലത്തിൽ പ്രശസ്തനായ കാർഷിക ശാസ്ത്രജ്ഞനാണ്. മിസിസിപ്പിയിലെ ആൽകോൺ സ്റ്റേറ്റ് യൂണിവേഴ്സിറ്റിയിലെ പ്ലാന്റ് ആൻഡ് സോയിൽ സയൻസിൽ പ്രൊഫസറും യുഎസ്ഡിഎ കൺസർവേഷൻ റിസർച്ച് സെന്ററിന്റെ ഡയറക്ടറുമാണ് അദ്ദേഹം.
2001-ൽ ഹോർട്ടികൾച്ചറൽ വിളകളെക്കുറിച്ചുള്ള ആദ്യത്തെ കവർ ആൻഡ് മാനേജ്മെന്റ് ഗവേഷണത്തെക്കുറിച്ചുള്ള ടെക്നോളജി ട്രാൻസ്ഫർ ബുള്ളറ്റിൻ അദ്ദേഹം പുറത്തിറക്കി, 42 പേജുള്ള ഈ പ്രസിദ്ധീകരണം മിക്ക ലാൻഡ്-ഗ്രാന്റ് സർവകലാശാലകളും സ്വീകരിച്ചു, വാഷിംഗ്ടൺ ഡിസിയിലെ ലൈബ്രറി ഓഫ് കോൺഗ്രസിൽ ലഭ്യമാണ്.
മിസിസിപ്പി അക്കാദമി ഓഫ് സയൻസസിന്റെ (എഫ്എംഎഎസ്) ഫെലോയും, 1995-ലെ സോയിൽ ആൻഡ് വാട്ടർ കൺസർവേഷൻ സൊസൈറ്റി ഓഫ് അമേരിക്കയുടെ (എസ്ഡബ്ല്യുസിഎസ്) ചാപ്റ്റർ അവാർഡ്, 2011-ലെ പ്രൈഡ് ഓഫ് ഇന്ത്യ അവാർഡ്, 2020-ലെ അമേരിക്കൻ സൊസൈറ്റി ഓഫ് അഗ്രോണമിയുടെ ലൈഫ് ടൈം ഓർഗാനിക് അച്ചീവ്മെന്റ് അവാർഡ്, 2023-ലെ ഇന്റർനാഷണൽ കൺസർവേഷൻ റിസർച്ച് അവാർഡ് ഓഫ് ദി അമേരിക്ക ഓഫ് സോയിൽ ആൻഡ് വാട്ടർ കൺസർവേഷൻ സൊസൈറ്റി (എസ്ഡബ്ല്യുസിഎസ്), 2026-ലെ ഇന്ത്യയിൽ നിന്നുള്ള ഗ്ലോബൽ രത്ന അവാർഡ് എന്നിവ നേടിയിട്ടുണ്ട്.
ടി. എസ്. നന്ദകുമാർ – പെർഫോമിംഗ് ആർട്സ്
ടി.എസ്. നന്ദകുമാർ ഇന്ത്യൻ രാഷ്ട്രപതിയിൽനിന്ന് സംഗീത—നാടക അക്കാദമി അവാർഡും മറ്റ് നിരവധി ബഹുമതികളും നേടിയിട്ടുള്ള പ്രശസ്ത കലാകാരനാണ്. ബോംബെ നന്ദകുമാർ എന്നും അറിയപ്പെടുന്ന ടിഎസ്എൻ അന്താരാഷ്ട്രതലത്തിൽ പ്രശംസ നേടിയ മൃദംഗ വിദഗ്ദ്ധൻ, അധ്യാപകൻ, സംഗീതസംവിധായകൻ, എഴുത്തുകാരൻ, ഇന്ത്യൻ ക്ലാസിക്കൽ സംഗീതത്തിന്റെ സാംസ്കാരിക അംബാസഡർ എന്നീനിലകളിൽ നിരവധി പതിറ്റാണ്ടുകളായുള്ള വിശിഷ്ടമായ ഒരു കരിയറാണ് അദ്ദേഹത്തിനുള്ളത്.
1998-ൽ ബോംബെയിൽ സ്ഥാപിതമായതും പിന്നീട് അമേരിക്കയിലെ ന്യൂജേഴ്സിയിൽ ഇൻകോർപ്പറേറ്റ് ചെയ്തതുമായ ടിഎസ്എന്റെ പെർക്കസീവ് ആർട്സ് സെന്ററിന്റെ (ടിഎസ്എൻപിഎസി) സ്ഥാപകനാണ് അദ്ദേഹം. അവിടെ ആയിരക്കണക്കിന് വിദ്യാർത്ഥികൾക്ക് പരിശീലനം നൽകിയിട്ടുണ്ട്. റൂട്ട്സ് ഓഫ് മൃദംഗം, ഇൻട്രിക്കസീസ് ഓഫ് മൃദംഗം, ദ അൾട്ടിമേറ്റ് കൊറുവൈസ് എന്നിവയുൾപ്പെടെ പ്രശംസ നേടിയ കൃതികൾ രചിച്ചിട്ടുണ്ട്. സംഗീതം, വിദ്യാഭ്യാസം, സാംസ്കാരിക പ്രചാരണം എന്നിവയിലെ സംഭാവനകൾക്ക് നിരവധി ബഹുമതികൾ നേടിയിട്ടുണ്ട്.
സിബി ഡേവിഡ് – കമ്മ്യൂണിറ്റി സർവീസ്
സിബി ഡേവിഡ് നാല് പതിറ്റാണ്ടുകളായി പൊതുസേവനം, കേരളീയ കലകൾ, സംസ്കാരം, മാനവിക സംരംഭങ്ങൾ, കമ്മ്യൂണിറ്റി നേതൃത്വം എന്നിവയിൽ സ്വയം സമർപ്പിച്ചിരിക്കുന്ന വ്യക്തിയാണ്. “വേലികൾക്കപ്പുറമുള്ള ഐക്യം” (Unity Beyond Barriers) എന്ന തന്റെ ദർശനത്താൽ നയിക്കപ്പെടുന്ന അദ്ദേഹം, സാംസ്കാരിക സംരക്ഷണം, മാനുഷിക സേവനം, സമൂഹങ്ങൾക്കിടയിലുള്ള ഐക്യം എന്നിവ പ്രോത്സാഹിപ്പിക്കുന്നത് തുടരുന്നു.
കേരളത്തിലെ പിന്നാക്കം നിൽക്കുന്ന കുട്ടികളെ പിന്തുണയ്ക്കുന്നതിനായി ‘ആർട്ട് 4 ലൈഫ്’ ആരംഭിച്ചതോടൊപ്പം കലാകാരന്മാർക്കും യുവ പ്രതിഭകൾക്കുമായി നിരവധി വേദികൾ അദ്ദേഹം സൃഷ്ടിച്ചു. കലാവേദി പ്ലാറ്റ്ഫോമിലൂടെ പല കൾച്ചറൽ പ്രോഗ്രാമുകളും നടത്തി അതിൽനിന്നും കിട്ടുന്ന തുക ദുരിതമനുഭവിക്കുന്നവരെ സഹായിക്കുന്ന കാരുണ്യപ്രവർത്തനം വർഷങ്ങളായി അദ്ദേഹം തുടരുന്നു. കോവിഡ് മഹാമാരിയുടെ കാലത്ത് ഫോമായുടെ പ്ലാറ്റ്ഫോമിലൂടെ ഡേവിഡ് നയിച്ച ഒന്നര വർഷക്കാലം നീണ്ടുനിന്ന സാന്ത്വന സംഗീതം എന്ന വീക്കിലി മ്യൂസിക്കൽ പ്രോഗ്രം അമേരിക്കയിലെ മലയാളികൾക്ക് വളരെ ആശ്വാസകരമായ ഒരനുഭവമായിരുന്നു.
കേരളസമാജം ഓഫ് ഗ്രെയ്റ്റർ ന്യൂയോർക്ക് എന്ന ആദ്യകാല മലയാളി സംഘടനയുടെ പ്രസിഡന്റ് ആയിരുന്ന സിബി കമ്മ്യൂണിറ്റി സേവനത്തിൽ എന്നും തല്പരനായിരുന്നു. NYCDOT – യിൽ ഡെപ്യൂട്ടി ഡയറക്ടർ ആയി ജോലി ചെയ്യുന്നു.
പ്രിൻസ് ജോൺസൺ – എഡ്യൂക്കേഷൻ
പ്രിൻസ് ജോൺസൺ 2026-ലെ ന്യൂയോർക്ക് സ്റ്റേറ്റ് ടീച്ചർ ഓഫ് ദ ഇയർ അവാർഡും 2025-ലെ ഗിൽഡർ ലേമൻ ന്യൂയോർക്ക് ഹിസ്റ്ററി ടീച്ചർ ഓഫ് ദ ഇയർ അവാർഡും നേടിയ 27 വർഷത്തെ പരിചയസമ്പന്നനായ അധ്യാപകനാണ്. കരിയർ, സാങ്കേതിക വിദ്യാഭ്യാസം എന്നിവയ്ക്ക് വേണ്ടി വാദിക്കുന്ന അദ്ദേഹം ന്യൂയോർക്ക് നഗരത്തിലെ ഫുഡ് ആൻഡ് ഫിനാൻസ് ഹൈസ്കൂളിൽ സാമൂഹിക ശാസ്ത്രം പഠിപ്പിക്കുകയും NYCPS ക്ലൈമറ്റ് എഡ്യൂക്കേഷൻ ലീഡർഷിപ്പ് ടീമിൽ സേവനമനുഷ്ഠിക്കുകയും ചെയ്യുന്നു.
റൈക്കേഴ്സ് ഐലൻഡിൽ പഠിപ്പിക്കുമ്പോൾ അദ്ദേഹം നിരീക്ഷിച്ച അനീതികളാണ് ഒരു അധ്യാപകനെന്ന നിലയിൽ അദ്ദേഹത്തിന്റെ പ്രചോദനം. ഇന്ന്, ചരിത്രം, പാചക കലകൾ, പരിസ്ഥിതി മാനേജ്മെന്റ് എന്നിവയെ ഏകീകരിക്കുന്ന ക്രോസ്- കരിക്കുലർ പ്രോജക്ടുകൾ അദ്ദേഹം വികസിപ്പിക്കുന്നു. എല്ലാ വിദ്യാർത്ഥികളെയും അവരുടെ പൂർണ്ണ ശേഷി തിരിച്ചറിയാൻ ശാക്തീകരിക്കുക എന്ന ലക്ഷ്യത്തോടെ, കൂടുതൽ ശക്തവും നീതിയുക്തവുമായ സമൂഹങ്ങൾ സൃഷ്ടിക്കുന്നതിന് അവരുടെ കഴിവും ശബ്ദവും വിനിയോഗിക്കാൻ അദ്ദേഹം വിദ്യാർത്ഥികളെ പ്രോത്സാഹിപ്പിക്കുന്നു.
ജോസ് ചെരിപുറം – പ്രവാസി മലയാള സാഹിത്യം
ജോസ് ചെരിപുറം പ്രതിഭാസമ്പന്നനായ കവിയും ഹാസ്യ സാഹിത്യകാരനുമാണ്. കഥാതന്തു കണ്ടെത്തുന്നതിലും വികസിപ്പിച്ചെടുത്ത് അവതരിപ്പിക്കുന്നതിലും അസാധാരണമായ വൈഭവമുണ്ട്. സർഗ്ഗവേദി, ലാന എന്നീ സാഹിത്യക്കൂട്ടായ്മകളിൽ സജീവമാണ് അദ്ദേഹം. കാവ്യനർത്തകി (കവിതകൾ 2011), അളിയന്റെ പടവലങ്ങ (നർമ്മം 2012) എന്നിവയാണ് അദ്ദേഹത്തിന്റെ കൃതികൾ. അച്ചടി, ഓൺലൈൻ മാധ്യമങ്ങളിൽ കവിത, നർമ്മം, ലേഖനങ്ങൾ എന്നിവ എഴുതുന്നത് തുടരുന്നു.
ഈമലയാളിയുടെ അവാർഡും “വേൾഡ് ഓഫ് പൊയട്രി” എന്ന സംസംഘടനയുടെ “ഗോൾഡൻ പൊയറ്റ്” എന്ന അവാർഡും അദ്ദേഹത്തിന് ലഭിച്ചിട്ടുണ്ട്. 1979 ൽ അമേരിക്കയിലേക്ക് കുടിയേറുന്നതിനുമുമ്പ്, അദ്ദേഹം ഇന്ത്യൻ വ്യോമസേനയിൽ മെഡിക്കൽ ബ്രാഞ്ചിൽ സേവനമനുഷ്ഠിച്ചു. അമേരിക്കയിൽ എത്തിയ ശേഷം, ന്യൂയോർക്ക് സിറ്റി ഹെൽത്ത് ആൻഡ് ഹോസ്പിറ്റൽ കോർപ്പറേഷനിൽ 30 വർഷം ആർഎൻ ആയി സേവനം ചെയ്ത് വിരമിച്ചു.
Eight Indian-American Malayalis to be honored at the Kerala Center’s 34th annual award ceremony.
