
മിയാമി: കനത്ത മഴയെത്തുടർന്ന് വ്യാപകമായ വെള്ളപ്പൊക്കം നേരിടുന്ന തെക്കൻ ഫ്ലോറിഡയിലെ മിയാമി-ഡെയ്ഡ് കൗണ്ടിയിൽ നാഷണൽ വെതർ സർവീസ് വ്യാഴാഴ്ച രാവിലെ പുതിയ പ്രളയ മുന്നറിയിപ്പ് പുറപ്പെടുവിച്ചു. പ്രാദേശിക സമയം രാവിലെ 9:10 മുതൽ 11:15 വരെയാണ് മിയാമി-ഡെയ്ഡിൽ മുന്നറിയിപ്പ് നൽകിയിട്ടുള്ളത്. ഇതിന് തൊട്ടുമുൻപ് ബ്രോവാർഡ് കൗണ്ടിയിലും ഉച്ചയ്ക്ക് 12:45 വരെ പ്രളയ മുന്നറിയിപ്പ് പുറപ്പെടുവിച്ചിരുന്നു.
ചൊവ്വാഴ്ച മുതൽ തെക്കൻ ഫ്ലോറിഡയുടെ വിവിധ ഭാഗങ്ങളിൽ 15 ഇഞ്ചിലധികം മഴയാണ് പെയ്തത്. കനത്ത മഴയിൽ റോഡുകൾ വെള്ളത്തിനടിയിലായതോടെ നിരവധി വാഹനങ്ങൾ വഴിയിൽ കുടുങ്ങുകയും, മേഖലയിലെ സ്കൂളുകൾ വ്യാപകമായി അടച്ചിടുകയും ചെയ്തു.
ഇനിയും മഴ പെയ്യാൻ സാധ്യതയുള്ളതിനാൽ വെള്ളക്കെട്ട് രൂക്ഷമായേക്കുമെന്ന് അധികൃതർ മുന്നറിയിപ്പ് നൽകുന്നു. ഇതിന്റെ ഭാഗമായി വ്യാഴാഴ്ച വൈകുന്നേരം വരെ തെക്കൻ ഫ്ലോറിഡയിലുടനീളം ‘ഫ്ലഡ് വാച്ച്’ ജാഗ്രതാ നിർദ്ദേശം തുടരുമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു.















