ഹൂസ്റ്റണ്: അമേരിക്കന് മലയാളികളുടെ ഏറ്റവും വലിയ സാമൂഹിക-സാംസ്കാരിക കൂട്ടായ്മയായ ഫോമായുടെ ഒമ്പതാമത് ദേശീയ കുടുംബസമ്മേളനത്തിലേക്ക് ഏവര്ക്കും ഹൃദയപൂര്വ്വം സ്വാഗതം. ജൂലൈ 30, 31, ഓഗസ്റ്റ് 1, 2 തീയതികളില് ടെക്സാസിലെ ഹൂസ്റ്റണിലുള്ള വിന്ധം ഹോട്ടലില് അരങ്ങേറുന്ന ഈ മഹാസംഗമം, നാല് ദിവസത്തെ ആഘോഷമെന്നതിലുപരി ലോകത്തിന്റെ വിവിധ ഭാഗങ്ങളില് നിന്ന് എത്തിച്ചേരുന്ന മലയാളി കുടുംബങ്ങളുടെ സ്നേഹസംഗമവും സംസ്കാരത്തിന്റെ മഹോത്സവവുമാണെന്ന് പ്രസിഡന്റ് ബേബി മണക്കുന്നേല് ചൂണ്ടിക്കാട്ടി.
ഫോമായുടെ ചരിത്രത്തില് മറ്റൊരു സുവര്ണ അധ്യായം രചിക്കാന് പോകുന്ന ഈ ദേശീയ കണ്വെന്ഷനില് കലയും സാഹിത്യവും സംഗീതവും നൃത്തവും സാമൂഹിക ചര്ച്ചകളും യുവജന-വനിതാ പരിപാടികളും കുട്ടികളുടെ പ്രതിഭാപ്രകടനങ്ങളും ബിസിനസ് സമ്മേളനങ്ങളും ആത്മീയ നിമിഷങ്ങളും ഉള്പ്പെടെ എല്ലാ പ്രായക്കാരെയും ആകര്ഷിക്കുന്ന വൈവിധ്യമാര്ന്ന പരിപാടികളാണ് ഒരുക്കിയിരിക്കുന്നത്. ഈ വര്ഷം ലഭിച്ച അതുല്യമായ പ്രതികരണം ഞങ്ങളെ ഏറെ സന്തോഷിപ്പിക്കുന്നു. കണ്വന്ഷനിലെ എല്ലാ ഹോട്ടല് മുറികളും ഇതിനകം തന്നെ പൂര്ണമായി ബുക്ക് ചെയ്തിരിക്കുകയാണ്. ഫോമായോടുള്ള അംഗങ്ങളുടെയും സുഹൃത്തുക്കളുടെയും വിശ്വാസത്തിന്റെയും സ്നേഹത്തിന്റെയും ഏറ്റവും വലിയ അംഗീകാരമായാണ് ഞങ്ങള് ഇതിനെ കാണുന്നത്.
ഈ മഹാസമ്മേളനത്തിന്റെ വിജയത്തിന് ശക്തമായ പിന്തുണ നല്കുന്ന പ്ലാറ്റിനം, ഗോള്ഡ്, സില്വര് സ്പോണ്സര്മാര്ക്കും എല്ലാ സഹകാരികള്ക്കും എന്റെ ഹൃദയംഗമമായ നന്ദി രേഖപ്പെടുത്തുന്നു. അവരുടെ ഉദാരമായ പിന്തുണയും വിശ്വാസവുമാണ് ഈ കണ്വന്ഷനെ കൂടുതല് പ്രൗഢഗംഭീരമാക്കുന്നത്. കണ്വന്ഷന്റെ വിജയത്തിനായി അക്ഷീണം പ്രയത്നിച്ച ദേശീയ ഭാരവാഹികള്ക്കും, ഹോസ്റ്റ് റീജിയനിലെ പ്രവര്ത്തകര്ക്കും, വിവിധ കമ്മിറ്റികളിലെ ചെയര്മാന്മാര്ക്കും അംഗങ്ങള്ക്കും, സന്നദ്ധപ്രവര്ത്തകര്ക്കും എന്റെ പ്രത്യേക അഭിനന്ദനവും നന്ദിയും അറിയിക്കുന്നു. അവരുടെ ആത്മാര്ഥമായ സേവനമാണ് ഈ മഹാസംരംഭത്തിന്റെ അടിത്തറ.
ഈ വേദിയിലേക്ക് എത്തിച്ചേരുന്ന എല്ലാ വിശിഷ്ടാതിഥികളെയും, ഫോമാ കുടുംബാംഗങ്ങളെയും, അംഗസംഘടനാ പ്രതിനിധികളെയും, കലാകാരന്മാരെയും, മാധ്യമപ്രവര്ത്തകരെയും, സ്പോണ്സര്മാരെയും, സുഹൃത്തുക്കളെയും അഭ്യുദയകാംക്ഷികളെയും ഞാന് സ്നേഹപൂര്വ്വം സ്വാഗതം ചെയ്യുന്നു. നമുക്ക് ഒരുമിച്ച് ആഘോഷിക്കാം നമ്മുടെ ഭാഷയെയും സംസ്കാരത്തെയും പൈതൃകത്തെയും. പുതിയ സൗഹൃദങ്ങള് സൃഷ്ടിക്കാം, പഴയ ബന്ധങ്ങള് പുതുക്കാം, അമേരിക്കന് മലയാളി സമൂഹത്തിന്റെ ഐക്യവും കരുത്തും ലോകത്തിനു മുന്നില് ഒരിക്കല്ക്കൂടി തെളിയിക്കാം. ഹൂസ്റ്റണില് നിങ്ങളെ ഓരോരുത്തരെയും നേരില് കാണുവാന് ഞാന് ആകാംക്ഷയോടെ കാത്തിരിക്കുന്നുവെന്നും ബേബി മണക്കുന്നേല് വിവരിച്ചു.
എല്ലാവര്ക്കും ഹൃദയം നിറഞ്ഞ സ്വാഗതം..!
സ്നേഹപൂര്വ്വം,
ബേബി മണക്കുന്നേല്
പ്രസിഡന്റ്, ഫോമാ
FOMAA 9th National Convention from July 30 in Houston; President Baby Manakkunnel Extends Warm Welcome
