മുസാഫറാബാദ്: പാകിസ്താൻ അധിനിവേശ കാശ്മീരിൽ ജനകീയ പ്രക്ഷോഭം വൻ സംഘർഷത്തിലേക്ക് വഴിമാറുന്നു. വിവിധയിടങ്ങളിലുണ്ടായ ഏറ്റുമുട്ടലുകളിൽ രണ്ട് സുരക്ഷാ ഉദ്യോഗസ്ഥർ ഉൾപ്പെടെ 12 പേർ കൊല്ലപ്പെട്ടു. പ്രക്ഷോഭത്തിന് നേതൃത്വം നൽകുന്ന ജോയിന്റ് അവാമി ആക്ഷൻ കമ്മിറ്റിയെ (ജെ.എ.എ.സി) നിരോധിത ആയുധധാരികളുടെ സംഘമായി പാക് ഭരണകൂടം പ്രഖ്യാപിച്ചെങ്കിലും, കനത്ത സുരക്ഷാ വിന്യാസങ്ങളെ വകവെക്കാതെ പ്രക്ഷോഭകർ മുന്നോട്ട് പോവുകയാണ്.
ഇന്ന് ഉച്ചയ്ക്ക് റാവലക്കോട്ടിൽ നിന്നും ഭരണകേന്ദ്രമായ മുസാഫറാബാദിലേക്ക് 40,000-ത്തോളം ആളുകൾ പങ്കെടുക്കുന്ന വൻ മാർച്ച് പ്രഖ്യാപിച്ചതോടെ മേഖല അതീവ ജാഗ്രതയിലാണ്. നഗരങ്ങളെല്ലാം സുരക്ഷാ സേന പൂർണ്ണമായും അടച്ചുപൂട്ടി. സംഘർഷം പുറംലോകം അറിയാതിരിക്കാൻ റാവലക്കോട്ട് നഗരത്തിൽ അധികൃതർ അപ്രഖ്യാപിത മാധ്യമവിലക്ക് ഏർപ്പെടുത്തിയതായും മാധ്യമപ്രവർത്തകരെ തടയുന്നതായും ബിബിസി ഉർദു റിപ്പോർട്ട് ചെയ്തു.
1947-ൽ പാകിസ്താൻ നിയമവിരുദ്ധമായി കൈയടക്കിയ ഈ പ്രദേശത്ത്, സമീപകാലത്തുണ്ടായ ഏറ്റവും വലിയ സർക്കാർ വിരുദ്ധ പ്രക്ഷോഭമാണിത്. ഭരണപരമായ ചൂഷണം, കടുത്ത വിലക്കയറ്റം, രാഷ്ട്രീയ പ്രാതിനിധ്യത്തിലെ കുറവ് എന്നിവയ്ക്കെതിരെ ആഴ്ചകളായി ഇവിടെ പ്രതിഷേധം നടക്കുകയാണ്. പുറത്തുനിന്നുള്ളവർക്കായി നിയമസഭാ സീറ്റുകൾ സംവരണം ചെയ്യുന്നതിനെതിരെയാണ് സമരം ആരംഭിച്ചതെങ്കിലും, ഇപ്പോഴത് വ്യവസ്ഥാപിതമായ സാമ്പത്തിക-രാഷ്ട്രീയ പരിഷ്കാരങ്ങൾക്കായുള്ള വൻ ജനകീയ മുന്നേറ്റമായി മാറിയിരിക്കുന്നു.
പ്രതിഷേധം അടിച്ചമർത്താൻ സൈനിക മേധാവി ജനറൽ അസിം മുനീറിന്റെ നേതൃത്വത്തിലുള്ള ഭരണകൂടം 4,000-ത്തോളം റെയ്ഞ്ചർമാരെയും പൊലീസ്-ഫ്രോണ്ടിയർ കോർപ്സ് സേനകളെയും വിന്യസിച്ചിട്ടുണ്ട്. ഇന്റർനെറ്റ് വിച്ഛേദിച്ചും പ്രക്ഷോഭകരെ അറസ്റ്റ് ചെയ്തുമാണ് രാജ്യം ഇതിനെ നേരിടുന്നത്. മേഖലയിലേക്കുള്ള ഭക്ഷ്യ-മരുന്ന് വിതരണം പാക് ഭരണകൂടം ആഴ്ചകളായി തടഞ്ഞിരിക്കുകയാണെന്നും, തങ്ങൾക്ക് ഇന്ത്യ മാനുഷിക സഹായം നൽകണമെന്നും പ്രക്ഷോഭ നേതാക്കൾ ആവശ്യപ്പെട്ടിരുന്നു.
അക്രമങ്ങൾക്ക് പിന്നിൽ ആയുധധാരികളായ പ്രക്ഷോഭകരാണെന്ന പാക് സുരക്ഷാ സേനയുടെയും അവിടുത്തെ മാധ്യമങ്ങളുടെയും ആരോപണം ജെ.എ.എ.സി പൂർണ്ണമായും തള്ളി.
“ഞങ്ങൾക്ക് ആയുധമെടുക്കാൻ ഉദ്ദേശ്യമുണ്ടായിരുന്നെങ്കിൽ, ഇത്രയും കാലം ഞങ്ങളുടെ നിരായുധരായ സഹോദരന്മാരുടെ മൃതദേഹങ്ങൾ ഞങ്ങൾക്ക് ചുമക്കേണ്ടി വരുമായിരുന്നില്ല. ആക്ഷൻ കമ്മിറ്റി ജനങ്ങളുടേതാണ്, അവർ സമാധാനപ്രിയരാണ്. തോക്കുകളുമായി സോഷ്യൽ മീഡിയയിൽ പ്രചരിക്കുന്ന ദൃശ്യങ്ങൾ വ്യാജമാണ്. ജനങ്ങളെ വെടിവെക്കാനും പ്രക്ഷോഭകരെ മോശക്കാരാക്കാനും സുരക്ഷാ വിഭാഗങ്ങൾ തന്നെയാണ് സാധാരണ വേഷത്തിൽ ആളെ ഇറക്കിയിരിക്കുന്നത്,” – ജെ.എ.എ.സി വ്യക്തമാക്കി.
പി.ഒ.കെയിലെ നിലവിലെ സാഹചര്യത്തിൽ ഇന്ത്യ കടുത്ത ആശങ്ക രേഖപ്പെടുത്തി. പതിറ്റാണ്ടുകളായി പാകിസ്താൻ നടത്തുന്ന വ്യവസ്ഥാപിതമായ ചൂഷണത്തിന്റെയും മൗലികാവകാശ നിഷേധത്തിന്റെയും പ്രതിഫലനമാണ് ഈ ജനകീയ പ്രക്ഷോഭമെന്ന് ഇന്ത്യൻ വിദേശകാര്യ മന്ത്രാലയ വക്താവ് രൺധീർ ജയ്സ്വാൾ പറഞ്ഞു. സമാധാനപരമായി പ്രതിഷേധിക്കുന്ന ജനങ്ങൾക്കെതിരെ പാകിസ്താൻ അമിത ബലപ്രയോഗം നടത്തുകയാണെന്നും, ഈ മനുഷ്യാവകാശ ലംഘനങ്ങൾക്കെതിരെ അന്താരാഷ്ട്ര സമൂഹം ഇസ്ലാമാബാദിനെ കണക്കുചോദിക്കണമെന്നും ഇന്ത്യ ആവശ്യപ്പെട്ടു.
Massive clashes in Pakistan-occupied Kashmir: 12 killed, 4,000 security personnel deployed; Media banned
