വാഷിംഗ്ടൺ: വൈറ്റ് ഹൗസിന് സമീപം ഇന്നലെ നടന്ന വെടിവെപ്പിന് പിന്നിലെ കൂടുതൽ വിവരങ്ങൾ പുറത്ത്. കോടികൾ മുടക്കി വാങ്ങിയ ആഡംബര ഫ്ലാറ്റിലെ വെള്ളച്ചോർച്ചയും പൂപ്പലും സംബന്ധിച്ച ഒരു വർഷത്തിലേറെ നീണ്ട നിയമപോരാട്ടമാണ് കൂട്ടക്കൊലയിലേക്കും ആത്മഹത്യയിലേക്കും നയിച്ചതെന്നാണ് പൊലീസിന്റെ പ്രാഥമിക നിഗമനം. സംഭവത്തിൽ ബിൽഡിംഗ് മാനേജരായ ജെയിംസ് സ്റ്റുവർട്ട് (46) കൊല്ലപ്പെടുകയും മറ്റ് നാല് പേർക്ക് പരിക്കേൽക്കുകയും ചെയ്തിരുന്നു. ഡോക്ടർ മാറ്റ് വേഡ് ലാംബെർട്ടാണ് (55) കൃത്യത്തിന് ശേഷം സ്വയം വെടിവെച്ച് മരിച്ചത്.
പ്രതിയുടെ ഫ്ലാറ്റിൽ പൊലീസ് നടത്തിയ പരിശോധനയിൽ മൂന്ന് തോക്കുകളും പെട്രോൾ പോലുള്ള തീപിടിക്കുന്ന ദ്രാവകം നിറച്ച കന്നാസുകളും കണ്ടെടുത്തു. വാഷിംഗ്ടൺ ഡി.സിയിൽ ഇയാളുടെ പേരിൽ തോക്കുകളൊന്നും രജിസ്റ്റർ ചെയ്തിട്ടില്ലാത്തതിനാൽ ഇവ എവിടെനിന്ന് ലഭിച്ചു എന്നതിനെക്കുറിച്ച് പൊലീസ് അന്വേഷണം ഊർജിതമാക്കി. കെട്ടിടത്തിന് തീയിടാനും പ്രതി ലക്ഷ്യമിട്ടിരുന്നതായി മെട്രോപൊളിറ്റൻ പൊലീസ് മേധാവി ജെഫ്രി കരോൾ സൂചിപ്പിച്ചു.
ദശലക്ഷക്കണക്കിന് ഡോളർ വിലമതിക്കുന്ന തന്റെ പെന്റ്‌ഹൗസ് ഫ്ലാറ്റ് കെട്ടിടത്തിലെ നവീകരണ പ്രവർത്തനങ്ങളെത്തുടർന്നുണ്ടായ ചോർച്ച കാരണം താമസയോഗ്യമല്ലാതായെന്ന് ഡോക്ടർ നേരത്തെ വെളിപ്പെടുത്തിയിരുന്നു. ഫ്ലാറ്റിലെ കറുത്ത പൂപ്പൽ തന്റെ ഉറക്കത്തെയും ആരോഗ്യത്തെയും സാരമായി ബാധിച്ചതായി ഇയാൾ മാധ്യമങ്ങളോട് പറഞ്ഞിരുന്നു.
പ്രശ്നം പരിഹരിക്കാത്തതിനെതിരെ മെട്രോപോൾ കോണ്ടോമിനിയം അസോസിയേഷനും മാനേജ്‌മെന്റിനുമെതിരെ ഇയാൾ സിവിൽ കേസ് നൽകിയിരുന്നു. അറ്റകുറ്റപ്പണികൾക്കും നിയമപോരാട്ടത്തിനുമായി ഏകദേശം മൂന്ന് ലക്ഷം ഡോളറോളം (ഏകദേശം രണ്ടരക്കോടിയിലധികം രൂപ) ഇയാൾക്ക് ചെലവായതായി മുൻ അഭിഭാഷകൻ ജോയൽ ബ്രെയ്ത്ത്‌വെയ്റ്റ് വെളിപ്പെടുത്തി. തനിക്ക് കടുത്ത അനീതി നേരിട്ടതായും അസോസിയേഷൻ ഉത്തരവാദിത്തം ഏറ്റെടുക്കുന്നില്ലെന്നുമുള്ള കടുത്ത മനോവിഷമത്തിലായിരുന്നു ഡോക്ടറെന്നും അദ്ദേഹം കൂട്ടിച്ചേർത്തു.
നടുക്കം വിട്ടുമാറാതെ ദൃക്‌സാക്ഷികൾ
വ്യാഴാഴ്ച രാവിലെ കെട്ടിടത്തിലെ ജിമ്മിലാണ് വെടിവെപ്പ് തുടങ്ങിയത്. ജിമ്മിലെ എക്സർസൈസ് ബോൾ പൊട്ടുന്ന ശബ്ദമാണെന്നാണ് ആദ്യം കരുതിയതെന്ന് ദൃക്‌സാക്ഷികൾ പറഞ്ഞു. മാനേജരെ വെടിവെച്ച ശേഷം ഏഴാം നിലയിലെ തന്റെ ബാൽക്കണിയിൽ നിന്നാണ് ഡോക്ടർ താഴെയുണ്ടായിരുന്നവർക്ക് നേരെ വെടിയുതിർത്തത്. പരിക്കേറ്റവരിൽ ഒരാളുടെ നില അതീവ ഗുരുതരമായി തുടരുകയാണ്.
More details emerge regarding the shooting near the White House
