അമേരിക്കയുമായുള്ള യുദ്ധത്തിന് സൈനികപരമായ യാതൊരു പരിഹാരവുമില്ലെന്ന് ഇറാൻ വിദേശകാര്യ മന്ത്രി അബ്ബാസ് അരാഗ്ചി വ്യക്തമാക്കി. ഇരു രാജ്യങ്ങളും തമ്മിലുള്ള നയതന്ത്ര ചർച്ചകൾ പൂർണ്ണമായും സ്തംഭനാവസ്ഥയിലായ പശ്ചാത്തലത്തിൽ, ടെഹ്റാനിൽ സംഘടിപ്പിച്ച വിദേശ നയതന്ത്രജ്ഞരുടെ യോഗത്തിലാണ് അദ്ദേഹം രാജ്യത്തിന്റെ നിലപാട് വ്യക്തമാക്കിയത്. നീതിയിലും തുല്യതയിലും അധിഷ്ഠിതമായ ചർച്ചകളിലൂടെ മാത്രമേ നിലവിലെ പ്രതിസന്ധികൾക്ക് പരിഹാരം കാണാൻ സാധിക്കൂ എന്ന് അദ്ദേഹം ഓർമ്മിപ്പിച്ചു.
ഗൾഫ് മേഖലയിലെ പ്രധാന എണ്ണ, വാതക വിതരണ പാതയായ ഹോർമുസ് കടലിടുക്കുമായി ബന്ധപ്പെട്ട തർക്കങ്ങളാണ് നിലവിലെ സംഘർഷത്തിന് പ്രധാന കാരണം. ഇറാൻ ഈ കടലിടുക്ക് ഉപരോധിക്കാൻ ശ്രമിക്കുന്നുവെന്നാണ് പ്രധാന ആരോപണം. ഇതിനിടെ, ഞായറാഴ്ച ഹോർമുസ് പാതയിലൂടെ കടന്നുപോയ തങ്ങളുടെ ഒരു എണ്ണ ടാങ്കറിനു നേരെ അജ്ഞാത വസ്തു വന്നിടിച്ചതായി ബ്രിട്ടീഷ് നാവിക സുരക്ഷാ ഏജൻസിയായ യുകെഎംടിഒ (UKMTO) റിപ്പോർട്ട് ചെയ്തത് മേഖലയിൽ ആശങ്ക വർദ്ധിപ്പിച്ചിട്ടുണ്ട്.
അമേരിക്ക വീണ്ടും ഒരു സൈനിക ഏറ്റുമുട്ടലിനാണ് മുതിരുന്നതെങ്കിൽ ഇറാൻ അതി ശക്തമായി തിരിച്ചടിക്കുമെന്ന് അബ്ബാസ് അരാഗ്ചി മുന്നറിയിപ്പ് നൽകി. മുൻപത്തേക്കാൾ കൂടുതൽ ആർജവത്തോടെ ഇറാൻ സ്വയം പ്രതിരോധിക്കുമെന്ന് വ്യക്തമാക്കിയ അദ്ദേഹം, പുതിയ ഉപരോധങ്ങൾ ഏർപ്പെടുത്തിയത് കൊണ്ടോ സൈനിക നടപടികളിലൂടെയോ പ്രശ്നങ്ങൾ പരിഹരിക്കാനാകില്ലെന്നും ചർച്ചകൾ മാത്രമാണ് ഏക വഴിയെന്നും കൂട്ടിച്ചേർത്തു.
No Military Solution to War; Iran Foreign Minister Promises Strong Self-Defense Amid Escalating Tensions
