ടെഹ്റാൻ: ‘യുദ്ധമോ സമാധാനമോ അല്ലാത്ത’ അനിശ്ചിത അവസ്ഥയിൽ ഇനി തുടരില്ലെന്ന് ഇറാൻ പാർലമെന്റ് സ്പീക്കർ മുഹമ്മദ് ബാഗർ ഗാലിബാഫ് വ്യക്തമാക്കി. യുദ്ധം ശക്തമാക്കുമെന്ന ഭീഷണിയും ആക്രമണങ്ങൾ അവസാനിപ്പിക്കുമെന്ന പ്രസ്താവനകളും മാറിമാറി പ്രയോഗിക്കുന്ന യു.എസ് പ്രസിഡന്റ് ഡോണൾഡ് ട്രംപിന്റെ നിലപാടുകൾക്കിടയിലാണ് ഇറാന്റെ ഭാഗത്തുനിന്നുള്ള ഈ നിർണ്ണായക പ്രതികരണം. യു.എസ് ചർച്ചകളുടെ പാതയാണോ അതോ യുദ്ധത്തിന്റെ പാതയാണോ തിരഞ്ഞെടുക്കുന്നത് എന്നത് തങ്ങൾക്ക് പ്രശ്നമല്ലെന്നും, ഇറാൻ മുന്നോട്ടുവെച്ച ഏഴ് ന്യായമായ നിബന്ധനകൾ അംഗീകരിക്കുകയാണെങ്കിൽ കരാറിലെത്താനുള്ള വാതിലുകൾ തുറന്നിരിക്കുമെന്നും പാർലമെന്റ് സമ്മേളനത്തിൽ അദ്ദേഹം വ്യക്തമാക്കി. ഇറാന്റെ ഔദ്യോഗിക വാർത്താ ഏജൻസിയായ മെഹർ ആണ് ഇക്കാര്യം റിപ്പോർട്ട് ചെയ്തത്.
കഴിഞ്ഞ ഫെബ്രുവരി 28-ന് അമേരിക്കയും ഇസ്രയേലും ചേർന്ന് ഇറാനിൽ നടത്തിയ സംയുക്ത ആക്രമണത്തോടെയാണ് മധ്യപൂർവേഷ്യയിൽ യുദ്ധം ആരംഭിച്ചത്. ആ ആക്രമണത്തിൽ രാജ്യത്തിന്റെ പരമോന്നത നേതാവ് ആയത്തുള്ള അലി ഖമനേയിയും മുതിർന്ന സൈനിക കമാൻഡർമാരും കൊല്ലപ്പെട്ടിരുന്നു. ഇതിന് തിരിച്ചടിയായി മേഖലയിലെ അമേരിക്കൻ സൈനിക താവളങ്ങൾക്കുനേരെ ഇറാൻ ആക്രമണം നടത്തുകയും ആഗോള എണ്ണവിതരണത്തിൽ നിർണായകമായ ഹോർമോസ് കടലിടുക്ക് അടച്ചിടുകയും ചെയ്തു. തുടർന്ന് ജൂൺ 17-ന് ട്രംപും ഇറാനിയൻ പ്രസിഡന്റ് മസൂദ് പെസഷ്കിയാനും യുദ്ധം അവസാനിപ്പിക്കുന്നതിനായി 14 ഇന കരാറിൽ ഒപ്പുവെച്ചിരുന്നെങ്കിലും, പരസ്പരം വാഗ്ദാനങ്ങൾ ലംഘിച്ചുവെന്നാരോപിച്ച് ജൂലൈ മാസത്തോടെ ഇരുരാജ്യങ്ങളും കരാറിൽ നിന്ന് പിന്മാറുകയായിരുന്നു.
അമേരിക്ക വീണ്ടുമൊരു തെറ്റ് വരുത്തിയാൽ യുദ്ധഭൂമിയുടെ ഭൂമിശാസ്ത്രം നിർണയിക്കുന്നത് ഇറാന്റെ ശക്തമായ സായുധസേനയായിരിക്കുമെന്ന് സ്പീക്കർ ഗാലിബാഫ് ശക്തമായ മുന്നറിയിപ്പ് നൽകി. നിലവിലെ സാഹചര്യത്തിൽ സ്വന്തം പരമാധികാരവും സുരക്ഷയും മുൻനിർത്തി കർശന നിലപാടുകളുമായി മുന്നോട്ടുപോകാനാണ് ടെഹ്റാന്റെ തീരുമാനം. ഇറാന്റെ പുതിയ മുന്നറിയിപ്പ് അന്താരാഷ്ട്ര തലത്തിലും മധ്യപൂർവേഷ്യൻ രാഷ്ട്രീയത്തിലും വലിയ ചർച്ചകൾക്കാണ് വഴിതുറന്നിരിക്കുന്നത്.
‘No State of War or Peace; Iran Warns US to Accept Conditions for Agreement’
