കീസ്റ്റോൺ (സൗത്ത് ഡക്കോട്ട): അമേരിക്കയുടെ 250-ാം സ്വാതന്ത്ര്യ വാർഷികാഘോഷങ്ങളുടെ ഭാഗമായി മൗണ്ട് റഷ്മോറിൽ നടത്തിയ പ്രസംഗത്തിൽ രാജ്യത്തെ കമ്മ്യൂണിസത്തിൽ നിന്ന് സംരക്ഷിക്കണമെന്ന് പ്രസിഡന്റ് ഡൊണാൾഡ് ട്രംപ് ആഹ്വാനം ചെയ്തു. പുരോഗമന ഡെമോക്രാറ്റുകൾ ഉയർത്തുന്ന “കമ്മ്യൂണിസ്റ്റ് ഭീഷണി”യെ അമേരിക്ക ശക്തമായി നേരിടുമെന്നും അദ്ദേഹം പറഞ്ഞു.
അമേരിക്കൻ പ്രസിഡന്റുമാരായ ജോർജ് വാഷിങ്ടൺ, തോമസ് ജെഫേഴ്സൺ, തിയഡോർ റൂസവെൽറ്റ്, എബ്രഹാം ലിങ്കൺ എന്നിവരുടെ ശിൽപങ്ങൾ കൊത്തിവെച്ചിരിക്കുന്ന മൗണ്ട് റഷ്മോറിന് മുന്നിൽ സംസാരിക്കുകയായിരുന്നു ട്രംപ്.
“ഈ മഹാന്മാരുടെ സ്മാരകത്തിന് മുന്നിൽ നിൽക്കുമ്പോൾ അമേരിക്കയെ കൂടുതൽ ശക്തവും മഹത്തായതുമായ രാജ്യമാക്കാനുള്ള പ്രതിജ്ഞയാണ് നമ്മൾ പുതുക്കുന്നത്. അത് എളുപ്പമല്ലെങ്കിലും നാം അത് നേടിയെടുക്കും,” ട്രംപ് പറഞ്ഞു.
“നമ്മുടെ രാജ്യത്ത് വീണ്ടും കമ്മ്യൂണിസ്റ്റ് ഭീഷണി ഉയർന്നുവരുകയാണ്. നമ്മുടെ ജീവിതരീതിക്കും വിജയത്തിനും എതിരായ ആശയങ്ങൾ പിന്തുണയ്ക്കുന്ന ചില പുതുതായി എത്തിയവരിൽ നിന്നുമാണ് ഈ ഭീഷണി. ഇത് ഒരിക്കലും അനുവദിക്കില്ല,” അദ്ദേഹം കൂട്ടിച്ചേർത്തു.
അമേരിക്ക-ഇസ്രയേൽ-ഇറാൻ യുദ്ധത്തെ തുടർന്നുണ്ടായ വിലക്കയറ്റവും ഇന്ധനവില വർധനവും രാജ്യത്ത് തുടരുന്നതിനിടെയാണ് ട്രംപിന്റെ പ്രസംഗം. നവംബറിൽ നടക്കുന്ന ഇടക്കാല കോൺഗ്രസ് തിരഞ്ഞെടുപ്പിൽ റിപ്പബ്ലിക്കൻ പാർട്ടിക്ക് തിരിച്ചടിയുണ്ടാകുമെന്ന ആശങ്ക നിലനിൽക്കുന്ന സാഹചര്യത്തിൽ ഇടതുപക്ഷ നിലപാടുകൾ സ്വീകരിക്കുന്ന ഡെമോക്രാറ്റിക് സ്ഥാനാർഥികളെ ട്രംപ് വീണ്ടും വിമർശിച്ചു.
കമ്മ്യൂണിസത്തെക്കുറിച്ചുള്ള വിമർശനത്തിനൊപ്പം കുടിയേറ്റ വിരുദ്ധ നിലപാടും ട്രംപ് ആവർത്തിച്ചു. രാജ്യത്തേക്ക് പുതുതായി എത്തിയവരിൽ ചിലരെ പുറത്താക്കണമെന്നും അദ്ദേഹം ആവശ്യപ്പെട്ടു.
“അമേരിക്കൻ ജനത കമ്മ്യൂണിസത്തെ അതിവേഗം തോൽപ്പിക്കുമെന്ന് ലോകത്തോട് പ്രഖ്യാപിക്കുന്നു. അവരെ നാം വേഗത്തിൽ പുറത്താക്കും. നമ്മുടെ രാജ്യം മുമ്പത്തേക്കാൾ വലുതും മികച്ചതും ശക്തവുമാക്കി മാറ്റും. അമേരിക്ക ഒരിക്കലും കമ്മ്യൂണിസ്റ്റ് രാജ്യമാകില്ല,” ട്രംപ് പറഞ്ഞു.
അതേസമയം, അടുത്തിടെ ന്യൂയോർക്ക് സിറ്റി, കൊളറാഡോ എന്നിവിടങ്ങളിലെ ഡെമോക്രാറ്റിക് പ്രൈമറി തിരഞ്ഞെടുപ്പുകളിൽ മൂന്ന് ഡെമോക്രാറ്റിക് സോഷ്യലിസ്റ്റുകൾ ഉൾപ്പെടെ നാല് പുരോഗമന സ്ഥാനാർഥികൾ വിജയിച്ചിരുന്നു. കെന്റക്കി, ന്യൂജഴ്സി, ഒഹായോ, പെൻസിൽവാനിയ, ടെക്സസ് എന്നിവിടങ്ങളിലും സമാന വിജയങ്ങൾ ഉണ്ടായിട്ടുണ്ട്. ഈ വിജയങ്ങളാണ് അമേരിക്ക നേരിടുന്ന ഏറ്റവും വലിയ ഭീഷണിയെന്ന് ട്രംപ് ആവർത്തിച്ചു.
ശനിയാഴ്ച വാഷിങ്ടണിലെ നാഷണൽ മാളിൽ നടക്കുന്ന അമേരിക്കയുടെ 250-ാം സ്വാതന്ത്ര്യ വാർഷികാഘോഷത്തിലും ട്രംപ് പങ്കെടുക്കും. രാജ്യത്തിന്റെ വിവിധ ഭാഗങ്ങളിൽ കടുത്ത ഉഷ്ണതരംഗം സ്വാതന്ത്ര്യദിനാഘോഷങ്ങളെ ബാധിച്ചെങ്കിലും മൗണ്ട് റഷ്മോറിൽ താപനില 18 ഡിഗ്രി സെൽഷ്യസായിരുന്നു.
PRESIDENT Trump extols America, rails at communism in USA 250 celebrations
