ലണ്ടൻ: ബ്രിട്ടീഷ് രാജകുടുംബവുമായി അകന്നു കഴിയുകയായിരുന്ന സസെക്സ് ഡ്യൂക്കും ഡച്ചസുമായ പ്രിൻസ് ഹാരിയും ഭാര്യ മേഗൻ മർക്കലും യുകെയിലേക്ക് സ്ഥിരതാമസത്തിനായി മടങ്ങിയെത്തുന്നതായി റിപ്പോർട്ട്. ഈ മാസം അവസാനത്തോടെ ഇവർ യുഎസിൽ നിന്നും ലണ്ടന് പുറത്തുള്ള ഒരു സ്വകാര്യ വസതിയിലേക്ക് മാറാൻ പദ്ധതിയിടുന്നതായി ബിബിസി പുറത്തുവിട്ട റിപ്പോർട്ടിൽ പറയുന്നു.
യുകെയിലേക്ക് മടങ്ങുമെങ്കിലും ഹാരിയും മേഗനും ഔദ്യോഗിക രാജകീയ ചുമതലകളിലേക്ക് തിരികെ പ്രവേശിക്കില്ല. ഇവർ സാധാരണ സ്വകാര്യ വ്യക്തികളായിട്ടായിരിക്കും യുകെയിൽ തുടരുക. ദമ്പതികളുടെ മക്കളായ പ്രിൻസ് ആർച്ചി (7), പ്രിൻസസ് ലിലിബെറ്റ് (5) എന്നിവരെ സെപ്റ്റംബറിൽ ആരംഭിക്കുന്ന അധ്യയന വർഷത്തിൽ ബ്രിട്ടീഷ് സ്കൂളിൽ ചേർക്കാൻ എൻറോൾ ചെയ്തിട്ടുണ്ട്.
കഴിഞ്ഞ ഞായറാഴ്ചയാണ് മടങ്ങിവരവ് സംബന്ധിച്ച വിവരം കിംഗ് ചാൾസിനെ അറിയിച്ചത്. ഈ നീക്കത്തെക്കുറിച്ച് രാജാവിന് മുൻകൂട്ടി അറിവുണ്ടായിരുന്നില്ലെങ്കിലും, തൻ്റെ പേരക്കുട്ടികളെയും മകനെയും വ്യക്തിപരമായി കൂടുതൽ കാണാൻ സാധിക്കുന്ന സാഹചര്യത്തെ അദ്ദേഹം സ്വാഗതം ചെയ്തതായാണ് വിവരം.
കഴിഞ്ഞ ജൂലൈയിൽ ഹാരിയും മേഗനും മക്കളോടൊപ്പം രാജാവിൻ്റെ സ്വകാര്യ വസതിയായ ഹൈഗ്രോവ് സന്ദർശിച്ചിരുന്നു. നാല് വർഷത്തിന് ശേഷമാണ് കിംഗ് ചാൾസ് തൻ്റെ പേരക്കുട്ടികളെ നേരിട്ട് കാണുന്നത്. എന്നാൽ ആ സന്ദർശനവേളയിൽ യുകെയിലേക്കുള്ള മടങ്ങിവരവ് സംബന്ധിച്ച് ചർച്ചകളൊന്നും നടന്നിരുന്നില്ലെന്ന് കൊട്ടാരവൃത്തങ്ങൾ സൂചിപ്പിക്കുന്നു. പ്രിൻസ് വില്യമിനെയും പ്രിൻസസ് കാതറിനെയും ഇവരുടെ മടങ്ങിവരവ് പദ്ധതികളെക്കുറിച്ച് അറിയിച്ചിട്ടുണ്ട്. 2020-ൽ രാജകീയ പദവികൾ ഒഴിഞ്ഞ് കാലിഫോർണിയയിലേക്ക് മാറിയ ശേഷം കുടുംബവുമായി നിലനിന്നിരുന്ന കടുത്ത അസ്വാരസ്യങ്ങൾക്ക് ജൂലൈയിലെ കൂടിക്കാഴ്ച ഒരു പരിഹാരമായിരുന്നു.
സുരക്ഷയും മാധ്യമ ഇടപെടലുകളും ഇപ്പോഴും തർക്കവിഷയം
ഹാരിക്കും കുടുംബത്തിനുമുള്ള സുരക്ഷാ പ്രശ്നങ്ങൾ ഇപ്പോഴും വലിയൊരു വെല്ലുവിളിയായി തുടരുകയാണ്. ഔദ്യോഗിക പദവികൾ ഒഴിഞ്ഞതോടെ തനിക്ക് നൽകിയിരുന്ന കമാൻഡോ സുരക്ഷ വെട്ടിക്കുറച്ചതിനെതിരെ ഹാരി നടത്തിയ നിയമപോരാട്ടം കഴിഞ്ഞ വർഷം കോടതി തള്ളിയിരുന്നു. സുരക്ഷാ ഭീഷണിയുള്ളതിനാലാണ് യുകെയിലേക്ക് വരാൻ തനിക്ക് ഭയമെന്ന് ഹാരി മുമ്പ് വ്യക്തമാക്കിയിരുന്നു. രാജകുടുംബാംഗങ്ങളുടെ സുരക്ഷാ കാര്യങ്ങൾ തീരുമാനിക്കുന്നത് പ്രത്യേക സമിതിയാണെന്നും രാജ്യത്തെ സുരക്ഷാ സംവിധാനം ശക്തമാണെന്നുമാണ് ആഭ്യന്തര മന്ത്രാലയത്തിൻ്റെ നിലപാട്.
ഇതിനുപുറമെ, ബ്രിട്ടീഷ് മാധ്യമങ്ങൾ തൻ്റെ സ്വകാര്യ ജീവിതത്തിലേക്ക് കടന്നുകയറുന്നതിനെതിരെ ഹാരി ശക്തമായ നിയമപോരാട്ടത്തിലാണ്. വാർത്തകൾക്കായി മാധ്യമങ്ങൾ നിയമവിരുദ്ധ മാർഗങ്ങൾ ഉപയോഗിച്ചതായി ആരോപിച്ച് ഡെയ്ലി മെയിൽ പബ്ലിഷർമാർക്കെതിരെ നൽകിയ കേസിൽ ഹാരിക്ക് കോടതിയിൽ നിന്ന് തിരിച്ചടിയേറ്റിരുന്നു. “അവർ എൻ്റെ ഭാര്യയുടെ ജീവിതം തികച്ചും ദുസ്സഹമാക്കി,” എന്നാണ് മാധ്യമ ഇടപെടലുകളെക്കുറിച്ച് ജനുവരിയിൽ ഹാരി കോടതിയിൽ പ്രസ്താവിച്ചത്.
വിവാദങ്ങൾ നിലനിൽക്കുമ്പോഴും, പരിക്കേറ്റ സൈനികർക്കായി അടുത്ത വർഷം ബർമിംഗ്ഹാമിൽ നടക്കുന്ന ഇൻവിക്റ്റസ് ഗെയിംസിൻ്റെ പ്രചാരണ പരിപാടികളുമായി ഹാരി യുകെയിൽ സജീവമാകുമെന്നാണ് കരുതപ്പെടുന്നത്.
Prince Harry and Meghan return to UK; no longer on royal duties, staying in private residence
