ഫിലാഡൽഫിയ: ലോകത്തിലെ ഏറ്റവും വേഗതയേറിയ ആഡംബരക്കപ്പലെന്ന റെക്കോർഡ് സ്വന്തമാക്കിയ ചരിത്രപ്രസിദ്ധമായ ‘എസ്.എസ്. യുണൈറ്റഡ് സ്റ്റേറ്റ്സ്’ ചരിത്രത്തിന്റെ ഭാഗമാകുന്നു. പതിറ്റാണ്ടുകളായി ഉപേക്ഷിക്കപ്പെട്ട നിലയിലായിരുന്ന ഈ അമേരിക്കൻ പ്രൗഢിയുടെ പ്രതീകം ഇനി അറ്റ്‌ലാന്റിക് സമുദ്രത്തിന്റെ അടിത്തട്ടിൽ കൃത്രിമ കോറൽ റീഫ് (കൃത്രിമ പവിഴപ്പുറ്റ്) ആയി മാറും. ലോകത്തിൽ ഇത്തരത്തിൽ സമുദ്രത്തിൽ താഴ്ത്തുന്ന ഏറ്റവും വലിയ കപ്പലായിരിക്കും ഇത്.
1952-ൽ തന്റെ കന്നിയാത്രയിൽ തന്നെ മണിക്കൂറിൽ 40 മൈലിലധികം വേഗത കൈവരിച്ച് ട്രാൻസ്അറ്റ്ലാന്റിക് യാത്രയിൽ ഏറ്റവും വേഗതയേറിയ സമുദ്രക്കപ്പലെന്ന ചരിത്ര റെക്കോർഡ് ഈ ഭീമൻ കപ്പൽ കുറിച്ചിരുന്നു. ആ റെക്കോർഡ് ഇന്നുവരെ ആർക്കും തകർക്കാനായിട്ടില്ല. വില്യം ഫ്രാൻസിസ് ഗിബ്സ് രൂപകൽപ്പന ചെയ്ത ഈ കപ്പലിന് അടിയന്തിര ഘട്ടങ്ങളിൽ വെറും 24 മണിക്കൂറിനുള്ളിൽ ഒരു സൈനിക ഡിവിഷനെ മുഴുവൻ കൊണ്ടുപോകാൻ സാധിക്കുന്ന സൈനിക കപ്പലാക്കി മാറ്റാൻ കഴിയുമായിരുന്നു. നാല് യു.എസ് പ്രസിഡന്റുമാരും ലോകപ്രശസ്തരായ സെലിബ്രിറ്റികളും ഉൾപ്പെടെ ലക്ഷക്കണക്കിന് യാത്രികരാണ് രണ്ട് പതിറ്റാണ്ടോളം ഇതിൽ യാത്ര ചെയ്തത്.
വിമാനയാത്രകൾ സജീവമായതോടെ കടൽയാത്രകളുടെ ഗ്ലാമർ കുറഞ്ഞു. ഇതോടെ 1969-ൽ കപ്പൽ സർവീസ് അവസാനിപ്പിച്ചു. പിന്നീട് കഴിഞ്ഞ 30 വർഷത്തോളമായി ഫിലാഡൽഫിയയിലെ തുറമുഖത്ത് ആരുമില്ലാതെ തുരുമ്പെടുത്ത് നശിക്കുന്ന അവസ്ഥയിലായിരുന്നു ഈ കപ്പൽ. മ്യൂസിയങ്ങളോ റെസ്റ്റോറന്റുകളോ ആക്കി മാറ്റാൻ പല പദ്ധതികൾ വന്നെങ്കിലും ഒന്നും പ്രാവർത്തികമായില്ല.
ഒടുവിൽ കപ്പൽ പൊളിച്ചു നീക്കുമെന്ന ഘട്ടത്തിലാണ് ഫ്ലോറിഡയിലെ ഒകാലൂസ കൗണ്ടി പ്രകൃതിവിഭവ വകുപ്പ് മേധാവി അലക്സ് ഫോഗ് ഒരു വേറിട്ട ആശയവുമായി രംഗത്തെത്തിയത്. കപ്പൽ വെട്ടിപ്പൊളിക്കുന്നതിന് പകരം കടലിന്റെ അടിത്തട്ടിലേക്ക് താഴ്ത്തി വലിയൊരു ജൈവവൈവിധ്യ കേന്ദ്രമാക്കുക എന്നതായിരുന്നു ആ പദ്ധതി.
വെറും 1 മില്യൺ ഡോളറിനാണ് (ഏകദേശം 8.4 കോടി രൂപ) കൗണ്ടി അധികൃതർ ഈ ചരിത്രക്കപ്പൽ സ്വന്തമാക്കിയത്. എന്നാൽ ഇതിലെ പരിസ്ഥിതി മലിനീകരണമുണ്ടാക്കുന്ന രാസവസ്തുക്കൾ നീക്കം ചെയ്യാനും കടലിൽ താഴ്ത്താൻ പാകത്തിലാക്കാനും 13 മില്യൺ ഡോളറിലധികം (ഏകദേശം 110 കോടി രൂപ) അധികമായി ചിലവഴിക്കേണ്ടി വന്നു.
അലബാമയിലെ മൊബൈൽ ഷിപ്പ്‌യാർഡിൽ വച്ച് മാസങ്ങൾ നീണ്ട ശുചീകരണ പ്രക്രിയകൾക്ക് ശേഷം കപ്പൽ പൂർണ്ണമായും സമുദ്രസൗഹൃദമാക്കി മാറ്റി. വെള്ളവും വായുവും വേഗത്തിൽ കയറാനായി കപ്പലിന്റെ പല ഭാഗങ്ങളിലും ദ്വാരങ്ങൾ ഇട്ടിട്ടുണ്ട്. ഈ ആഴ്ചയിൽ ഫ്ലോറിഡയിലെ പെൻസക്കോളയ്ക്കും ഡെസ്റ്റിൻ തീരത്തിനും ഇടയിൽ 20 നോട്ടിക്കൽ മൈൽ അകലെ കപ്പൽ കടലിൽ താഴ്ത്തും.
കപ്പലിന്റെ രണ്ട് ഭീമാകാരമായ പുകക്കുഴലുകൾ മാറ്റിവെച്ച്, എസ്.എസ്. യുണൈറ്റഡ് സ്റ്റേറ്റ്സ് കൺസർവൻസി നിർമ്മിക്കുന്ന ഒരു മ്യൂസിയത്തിന്റെ ഭാഗമാക്കും.
ഈ കപ്പലിൽ മുൻപ് യാത്ര ചെയ്ത ആയിരക്കണക്കിന് ആരാധകർ കപ്പലിന് വികാരനിർഭരമായ യാത്രയയപ്പാണ് നൽകിയത്. കടലിനെ കീറിമുറിച്ച് വേഗത്തിൽ പാഞ്ഞ കപ്പൽ ഇനി അതേ കടലിന്റെ അടിത്തട്ടിൽ അനേകം സമുദ്രജീവികൾക്ക് തണലൊരുക്കി വിശ്രമിക്കും.
Record-breaking American luxury liner now lies beneath the sea; the SS United States is set to become the world’s largest artificial coral reef.
