വാഷിംഗ്ടൺ: അമേരിക്കയിൽ നിർണ്ണായകമായ ഇടക്കാല (മിഡ്‌ടേം) തിരഞ്ഞെടുപ്പ് നടക്കാൻ മണിക്കൂറുകൾ മാത്രം ബാക്കിനിൽക്കെ, പ്രചാരണ രംഗത്തുനിന്നും മാറി സ്വന്തം നവീകരണ പദ്ധതികൾ പ്രകീർത്തിച്ച് പ്രസിഡന്റ് ഡോണൾഡ് ട്രംപ്. കോൺഗ്രസിന്റെ നിയന്ത്രണം നിലനിർത്താൻ റിപ്പബ്ലിക്കൻ സ്ഥാനാർത്ഥികൾ വോട്ടർമാരെ സ്വാധീനിക്കാൻ പരമാവധി ശ്രമിക്കുന്നതിനിടെയാണ്, രാജ്യതലസ്ഥാനത്തെ ലിങ്കൺ മെമ്മോറിയലിന് മുന്നിലുള്ള റിഫ്ലെക്റ്റിങ് പൂളിന്റെ നവീകരണത്തെക്കുറിച്ച് സംസാരിക്കാൻ ട്രംപ് സമയം കണ്ടെത്തിയത്. തിങ്കളാഴ്ച വാഷിംഗ്ടണിൽ നടന്ന ചടങ്ങിൽ പായൽ നിറഞ്ഞ കുളത്തിന്റെ ചിത്രമടങ്ങിയ പോസ്റ്റർ ഉയർത്തിപ്പിടിച്ചായിരുന്നു ട്രംപിന്റെ പ്രസംഗം.
തിരഞ്ഞെടുപ്പിന് തൊട്ടുമുമ്പുള്ള ദിവസം രാജ്യമൊട്ടാകെ പ്രചാരണം നടത്തുന്നതിന് പകരം, ട്രംപ് തലസ്ഥാന നഗരിയിലെ തന്റെ നിർമ്മാണ പ്രവർത്തനങ്ങളിൽ ശ്രദ്ധ കേന്ദ്രീകരിച്ചത് രാഷ്ട്രീയ കേന്ദ്രങ്ങളെ അമ്പരപ്പിച്ചിട്ടുണ്ട്. ട്രംപിന്റെ ഈ നടപടി വിചിത്രവും സ്വയം കേന്ദ്രീകൃതവുമാണെന്ന് പ്രമുഖ റിപ്പബ്ലിക്കൻ തന്ത്രജ്ഞനായ ഡഗ് ഹേ വിമർശിച്ചു. അവസാന നിമിഷം അനിശ്ചിതത്വത്തിൽ നിൽക്കുന്ന വോട്ടർമാരെ ആകർഷിക്കാൻ ഇത്തരം പ്രസംഗങ്ങൾ ഒട്ടും സഹായിക്കില്ലെന്നും അദ്ദേഹം കൂട്ടിച്ചേർത്തു.
വിലക്കയറ്റം ഉൾപ്പെടെയുള്ള ജനകീയ വിഷയങ്ങളോ തന്റെ ഭരണനേട്ടങ്ങളോ ചർച്ച ചെയ്യുന്നതിന് പകരം തുരുമ്പെടുത്ത പൈപ്പുകൾ, പുല്ലിന്റെ ഇനങ്ങൾ, പെയിന്റ് നിറങ്ങൾ എന്നിവയെക്കുറിച്ചാണ് ട്രംപ് പ്രസംഗത്തിൽ അധികവും സംസാരിച്ചത്. കുളത്തിലെ ജോലികൾ അക്രമികൾ നശിപ്പിച്ചതാണെന്ന തന്റെ മുൻ പ്രസ്താവനകൾ ട്രംപ് ആവർത്തിച്ചെങ്കിലും, തിരക്കിട്ട് നടത്തിയ അറ്റകുറ്റപ്പണി കാരണമാണ് കുളത്തിലെ ലൈനർ ഇളകിപ്പോയതെന്ന് നീതിന്യായ വകുപ്പ് നേരത്തെ കോടതിയിൽ സമ്മതിച്ചിരുന്നു.
പാരീസിലെ ആർക് ഡി ട്രയംഫിന് സമാനമായി ഡ്രോൺ-സ്നൈപ്പർ ശേഷിയുള്ള വൻ സൈനിക സമുച്ചയവും, 250-ലധികം ചരിത്രപുരുഷന്മാരുടെ പ്രതിമകൾ ഉൾക്കൊള്ളുന്ന ‘നാഷണൽ ഗാർഡൻ ഓഫ് അമേരിക്കൻ ഹീറോസ്’ പദ്ധതിയും വാഷിംഗ്ടണിൽ നടപ്പിലാക്കുമെന്നും ട്രംപ് പ്രഖ്യാപിച്ചു.
പ്രസംഗത്തിന്റെ അവസാന 20 മിനിറ്റിലാണ് ട്രംപ് തിരഞ്ഞെടുപ്പിലേക്ക് ശ്രദ്ധ തിരിച്ചത്. ഇത്തവണത്തേത് നമ്മുടെ ജീവിതകാലത്തെ ഏറ്റവും പ്രധാനപ്പെട്ട തിരഞ്ഞെടുപ്പാണെന്ന് വിശേഷിപ്പിച്ച അദ്ദേഹം, ഡെമോക്രാറ്റുകൾ ചരിത്രത്തിലെ ഏറ്റവും തീവ്രവാദികളായ സ്ഥാനാർത്ഥികളെയാണ് നാമനിർദ്ദേശം ചെയ്തിരിക്കുന്നതെന്ന് കുറ്റപ്പെടുത്തി. ഇറാൻ യുദ്ധവും വിലക്കയറ്റവും വോട്ടർമാരിൽ അതൃപ്തി ഉണ്ടാക്കിയിട്ടുണ്ടെന്ന യാഥാർത്ഥ്യം നിലനിൽക്കെത്തന്നെ, ഇറാന്റെ ആണവ നീക്കങ്ങളെ തടയാൻ യുദ്ധം അനിവാര്യമായിരുന്നു എന്ന് ട്രംപ് ന്യായീകരിച്ചു.
അധികാരത്തിലിരിക്കുന്ന പ്രസിഡന്റുമാർക്ക് സാധാരണയായി ഇടക്കാല തിരഞ്ഞെടുപ്പുകളിൽ തിരിച്ചടി നേരിടാറുണ്ടെന്ന് സമ്മതിച്ച ട്രംപ്, എങ്കിലും തങ്ങൾ ശക്തമായ പോരാട്ടമാണ് കാഴ്ചവെച്ചതെന്നും അവകാശപ്പെട്ടു.
Stepping away from the heat of the campaign, Trump turns to the renovation of the Reflecting Pool; the Republican camp is left bewildered by this peculiar move.
