‘ഞാൻ ഇന്ത്യക്കാരെ ജോലിക്കെടുക്കാറില്ല’; കാരണം വ്യക്തമാക്കി അമേരിക്കയിലെ ഇന്ത്യൻ റെസ്റ്റോറന്റ് ഉടമ

ടെക്സസ്: അമേരിക്കയിലെ ടെക്സസിലുള്ള ഒരു ഇന്ത്യൻ റെസ്റ്റോറന്റിന്റെ ഇന്ത്യൻ വംശജയായ ഉടമയുടെ പ്രസ്താവന സോഷ്യൽ മീഡിയയിൽ ചർച്ചയാകുന്നു. “എന്റെ ഇന്ത്യൻ റെസ്റ്റോറന്റിൽ ഞാൻ ഇന്ത്യക്കാരെ ജോലിക്കെടുക്കാറില്ല” എന്ന വാക്കുകളോടെയാണ് 7 മോങ്ക്സ് കഫേയുടെ ഉടമ രശ്മി ഭട്ട് ഇൻസ്റ്റാഗ്രാമിൽ പങ്കുവെച്ച വീഡിയോ ആരംഭിച്ചത്.

ടെക്സസിലെ ന്യൂ ബ്രൗൺഫെൽസിലുള്ള 7 മോങ്ക്സ് കഫേ ഇന്ത്യൻ, മെഡിറ്ററേനിയൻ വിഭവങ്ങൾ ലഭ്യമാക്കുന്ന റെസ്റ്റോറന്റാണ്. 2019-ൽ അമ്മയ്‌ക്കൊപ്പം ആരംഭിച്ച ഈ സ്ഥാപനം കോവിഡ് മഹാമാരിയുടെ വെല്ലുവിളികൾ മറികടന്ന് ഇന്ന് പ്രദേശത്തെ ജനപ്രിയ ഭക്ഷണശാലകളിലൊന്നായി മാറിയിട്ടുണ്ട്.

വീഡിയോയിൽ ഇന്ത്യക്കാരെ ജോലിക്കെടുക്കാത്തതിന്റെ കാരണവും രശ്മി വിശദീകരിച്ചു. ഒരു ഇന്ത്യൻ റെസ്റ്റോറന്റിൽ ജോലി ചെയ്യുന്ന എല്ലാവരും ഇന്ത്യക്കാരായിരിക്കണമെന്നാണ് പലരുടെയും ധാരണ. എന്നാൽ തങ്ങളും അമ്മയും ജീവനക്കാരെ തിരഞ്ഞെടുക്കുമ്പോൾ വംശീയതയോ ദേശീയതയോ പരിഗണിച്ചിട്ടില്ലെന്നും വ്യക്തമാക്കി.

“ഞങ്ങൾ ഇന്ത്യക്കാരുടെ ഒരു ടീം ഉണ്ടാക്കാനല്ല ശ്രമിച്ചത്. മികച്ച ഒരു ടീം രൂപീകരിക്കാനാണ് ശ്രമിച്ചത്. അതിനാൽ ഹൈസ്കൂൾ വിദ്യാർത്ഥികൾ, കോളേജ് വിദ്യാർത്ഥികൾ, ഒറ്റയ്ക്ക് കുടുംബം നോക്കുന്ന അമ്മമാർ, വിരമിച്ചവർ തുടങ്ങി വിവിധ പശ്ചാത്തലങ്ങളിലുള്ളവരെയാണ് ജോലിക്കെടുത്തത്,” രശ്മി പറഞ്ഞു.

ജീവനക്കാരിൽ ചിലർ റെസ്റ്റോറന്റിൽ ജോലി തുടങ്ങുന്നതിന് മുമ്പ് ഇന്ത്യൻ ഭക്ഷണം പോലും രുചിച്ചിട്ടില്ലായിരുന്നുവെന്നും, എന്നാൽ ഇന്ന് അവർക്ക് ഉപഭോക്താക്കൾക്ക് ഇന്ത്യൻ വിഭവങ്ങൾ ശുപാർശ ചെയ്യാൻ കഴിയുന്നുണ്ടെന്നും അവർ കൂട്ടിച്ചേർത്തു.

ഇതിനിടെ, രശ്മിയുടെ പ്രസ്താവന സോഷ്യൽ മീഡിയയിൽ വലിയ ചർച്ചയ്ക്ക് വഴിവെച്ചിട്ടുണ്ട്. “യഥാർത്ഥ ഇന്ത്യൻ ഭക്ഷണം കഴിക്കാനാണ് ഞങ്ങൾ വരുന്നത്. ഇന്ത്യൻ പാചകക്കാരൻ ഇല്ലെങ്കിൽ ഞാൻ അവിടെ ഭക്ഷണം കഴിക്കില്ല,” എന്ന് ഒരാൾ പ്രതികരിച്ചു. “ഇന്ത്യൻ ഭക്ഷണം ഒരു ഇന്ത്യക്കാരൻ തന്നെയായിരിക്കണം തയ്യാറാക്കേണ്ടത്,” എന്നായിരുന്നു മറ്റൊരാളുടെ അഭിപ്രായം.

“ഭക്ഷണത്തിന് യഥാർത്ഥ രുചി ഉണ്ടാകില്ല. ഒരിക്കൽ ഞാൻ പോയ ഇന്ത്യൻ റെസ്റ്റോറന്റിലെ ജീവനക്കാർ ഹിസ്പാനിക് വിഭാഗത്തിൽപ്പെട്ടവരായിരുന്നു. മെനുവിലെ പല വിഭവങ്ങളെയും കുറിച്ച് അവർക്ക് അറിവില്ലായിരുന്നു. ഞാൻ ‘ചാറ്റ്’ ചോദിച്ചപ്പോൾ അവർ ‘ചായ’യാണ് വാഗ്ദാനം ചെയ്തത്,” എന്ന് മറ്റൊരു ഉപയോക്താവും അനുഭവം പങ്കുവെച്ചു. അതേസമയം, കഴിവിനും ജോലിയോടുള്ള പ്രതിബദ്ധതയ്ക്കുമാണ് പ്രാധാന്യം നൽകേണ്ടതെന്ന നിലപാടിനെ പിന്തുണച്ചും നിരവധി പേർ രംഗത്തെത്തി. വീഡിയോ മണിക്കൂറുകൾക്കകം ലക്ഷക്കണക്കിന് ആളുകളാണ് കണ്ടത്.

The Indian owner of an Indian restaurant in Texas, United States, has explained why she does not hire Indians at her business.