വാഷിംഗ്ടൺ: മുൻ ബൈഡൻ സർക്കാരിൻ്റെ കാലത്ത് അന്യായമായി വേട്ടയാടിയെന്ന് അവകാശപ്പെടുന്നവർക്ക് നഷ്ടപരിഹാരം നൽകാനായി ട്രംപ് ഭരണകൂടം ആസൂത്രണം ചെയ്ത 1.8 ബില്യൺ ഡോളറിൻ്റെ (ഏകദേശം 1.3 ബില്യൺ പൗണ്ട്) വിവാദ ഫണ്ട് ഔദ്യോഗികമായി ഉപേക്ഷിച്ചു. യുഎസ് ആക്ടിംഗ് അറ്റോർണി ജനറൽ ടോഡ് ബ്ലാഞ്ചെയാണ് ചൊവ്വാഴ്ച നിയമനിർമ്മാതാക്കൾക്ക് മുന്നിൽ ഈ നിർണായക പ്രഖ്യാപനം നടത്തിയത്. “ഞങ്ങൾ ഈ ഫണ്ടുമായി മുന്നോട്ട് പോകുന്നില്ല,” എന്ന് അദ്ദേഹം കോൺഗ്രസ് കമ്മിറ്റിയിൽ വ്യക്തമാക്കി.
തൻ്റെ നികുതി വിവരങ്ങൾ ചോർന്നതുമായി ബന്ധപ്പെട്ട് പ്രസിഡൻ്റ് ഡോണൾഡ് ട്രംപ് ആഭ്യന്തര റവന്യൂ സർവീസിനെതിരെ നൽകിയ കേസ് ഒത്തുതീർപ്പാക്കുന്നതിൻ്റെ ഭാഗമായാണ് ‘ആൻ്റി-വെപ്പണൈസേഷൻ’ ഫണ്ട് പ്രഖ്യാപിച്ചിരുന്നത്. രാഷ്ട്രീയ വൈരാഗ്യത്തിൻ്റെ പേരിൽ ഏജൻസികൾ വേട്ടയാടിയ ആർക്കും ഇതിലൂടെ നഷ്ടപരിഹാരത്തിന് അപേക്ഷിക്കാമായിരുന്നു.
ഫണ്ട് പ്രഖ്യാപിച്ചതു മുതൽ വലിയ രാഷ്ട്രീയ വിവാദങ്ങൾക്കാണ് യുഎസ് സാക്ഷ്യം വഹിച്ചത്. ഡെമോക്രാറ്റുകൾക്ക് പുറമെ പ്രമുഖ റിപ്പബ്ലിക്കൻ നേതാക്കളും പദ്ധതിക്കെതിരെ രംഗത്തുവന്നു. 2021 ജനുവരി 6-ലെ യുഎസ് ക്യാപിറ്റോൾ കലാപക്കേസിൽ ഉൾപ്പെട്ടവർക്കും, പൊലീസ് ഉദ്യോഗസ്ഥരെ ആക്രമിച്ച പ്രതികൾക്കും ഈ ഫണ്ടിൽ നിന്ന് പണം ലഭിക്കാൻ സാധ്യതയുണ്ടെന്നതായിരുന്നു പ്രധാന ആക്ഷേപം. ട്രംപിൻ്റെ അനുയായികളും അദ്ദേഹത്തിൻ്റെ മുൻ കൂട്ടാളികളും ഇതിനായി അപേക്ഷിക്കാൻ പദ്ധതിയിട്ടിരുന്നതായും റിപ്പോർട്ടുകളുണ്ടായിരുന്നു.
കഴിഞ്ഞ ആഴ്ച യുഎസ് ജഡ്ജി ലിയോണി ബ്രിങ്കേമ ഈ നഷ്ടപരിഹാര ഫണ്ട് രൂപീകരിക്കുന്നത് താൽക്കാലികമായി തടഞ്ഞിരുന്നു. ഫണ്ട് വിവേചനപരമാണെന്ന് കാണിച്ച് രണ്ട് പേർ വെർജീനിയ കോടതിയിൽ നൽകിയ ഹർജിയെ തുടർന്നായിരുന്നു കോടതി നടപടി.
സെനറ്റിലെ റിപ്പബ്ലിക്കൻ ഭൂരിപക്ഷ നേതാവ് ജോൺ റ്റൂൺ, മുൻ വൈസ് പ്രസിഡൻ്റ് മൈക്ക് പെൻസ് എന്നിവർ ഫണ്ടിനെതിരെ കടുത്ത നിലപാടാണ് സ്വീകരിച്ചത്. ഇമിഗ്രേഷൻ ഏജൻസികൾക്കുള്ള ബജറ്റ് പാസാക്കണമെങ്കിൽ ഭരണകൂടം ഈ ഫണ്ട് സ്വയം നിർത്തലാക്കണമെന്ന് ജോൺ റ്റൂൺ ആവശ്യപ്പെട്ടിരുന്നു. ട്രംപിൻ്റെ അഴിമതി നിറഞ്ഞ ‘മാഗ സ്ലഷ് ഫണ്ട്’ ഇനി ഒരിക്കലും പുനരുജ്ജീവിപ്പിക്കാൻ കഴിയാത്ത വണ്ണം നിയമനിർമ്മാണത്തിലൂടെ ഇല്ലാതാക്കുമെന്ന് ഡെമോക്രാറ്റിക് നേതാവ് ചക്ക് ഷൂമറും വ്യക്തമാക്കി.
കോടതി ഉത്തരവിനോട് വിയോജിപ്പുണ്ടെങ്കിലും അത് അനുസരിക്കുമെന്നും ഫണ്ടുമായി ഇനി മുന്നോട്ട് പോകില്ലെന്നും നീതിന്യായ വകുപ്പ് വ്യക്തമാക്കിയതോടെയാണ് ആഴ്ചകൾ നീണ്ട രാഷ്ട്രീയ നാടകീയ നീക്കങ്ങൾക്ക് വിരാമമായത്. എന്നാൽ ഇത് സംബന്ധിച്ച് ഔദ്യോഗികമായി രേഖാമൂലം പ്രസ്താവനയൊന്നും ഇറക്കില്ലെന്ന് അറ്റോർണി ജനറൽ കൂട്ടിച്ചേർത്തു.
Trump administration abandons controversial ‘anti-weaponization’ fund; withdraws from $1.8 billion plan
