ഇറാനെതിരെയുള്ള സൈനിക നടപടികൾ അമേരിക്ക കൂടുതൽ ശക്തമായി തുടരുമെന്ന് വ്യക്തമാക്കി യുഎസ് പ്രസിഡന്റ് ഡോണൾഡ് ട്രംപ്. കഴിഞ്ഞ അഞ്ച് മാസമായി തുടരുന്ന ശക്തമായ ആക്രമണങ്ങളിൽ ഇറാൻ സൈനികമായി തകർന്നിരിക്കുകയാണെന്നും, ഒരു കാരണവശാലും ഇറാനെ ആണവായുധം നിർമ്മിക്കാൻ അനുവദിക്കില്ലെന്നും അദ്ദേഹം പറഞ്ഞു. തന്റെ രണ്ടാം ഭരണകാലത്ത് ആദ്യമായി ക്യാമ്പ് ഡേവിഡിൽ വിളിച്ചുചേർത്ത പ്രത്യേക കാബിനറ്റ് യോഗത്തിലാണ് ട്രംപ് നിർണ്ണായക പ്രസ്താവനകൾ നടത്തിയത്.
അമേരിക്കൻ ആക്രമണങ്ങളിൽ ഇറാന്റെ നാവികസേന, വ്യോമസേന, വ്യോമപ്രതിരോധ സംവിധാനങ്ങൾ എന്നിവയിൽ ഭൂരിഭാഗവും തകർന്നതായി ട്രംപ് അവകാശപ്പെട്ടു. നിലവിൽ ഇറാനിൽ ചില പരിമിതമായ സൈനിക ശേഷികൾ മാത്രമാണ് ശേഷിക്കുന്നതെന്നും അദ്ദേഹം കൂട്ടിച്ചേർത്തു. ഭാവിയിൽ ഒരു വെടിനിർത്തലിന് അമേരിക്ക തയ്യാറാകുമോ എന്ന ചോദ്യത്തിന്, “ഞങ്ങൾക്ക് ജയം മാത്രമാണ് ആവശ്യം” എന്നായിരുന്നു ട്രംപിന്റെ മറുപടി. വരും ആഴ്ചകളിലും ഇറാനുമേൽ കടുത്ത ആക്രമണം തുടരുമെന്ന് അദ്ദേഹം മുന്നറിയിപ്പ് നൽകി.
ഇറാൻ ആണവായുധം സ്വന്തമാക്കുന്നത് തടയുക എന്നതാണ് അമേരിക്കയുടെ പ്രധാന ലക്ഷ്യമെന്ന് യോഗത്തിൽ ട്രംപ് ആവർത്തിച്ചു. ഇറാൻ ആണവായുധം നിർമ്മിച്ചാൽ മിഡിൽ ഈസ്റ്റ് പൂർണ്ണമായും ത തകരുമെന്ന് അദ്ദേഹം ഓർമ്മിപ്പിച്ചു. ഇറാനിയൻ അധികൃതർ ചർച്ചകളിൽ കള്ളം പറയുന്നതിനാൽ അവരിൽ വിശ്വസിക്കാൻ കഴിയില്ലെന്ന് ട്രംപ് ആരോപിച്ചു. എങ്കിലും വിഷയം മിനിറ്റുകൾക്കുള്ളിൽ പരിഹരിക്കാൻ സാധിക്കുമിരിക്കെ ഇറാൻ ചർച്ചകൾ നീട്ടിക്കൊണ്ടുപോകുകയാണെന്നും ട്രംപ് വിമർശിച്ചു. ഇറാൻ നശിപ്പിക്കപ്പെട്ടുകൊണ്ടിരിക്കുകയാണെന്നും അമേരിക്കൻ പ്രസിഡന്റ് പറഞ്ഞുവെച്ചു.
ഇറാൻ യുദ്ധസാഹചര്യത്തിന് പുറമെ, തങ്ങളുടെ ഭരണത്തിൻ കീഴിലെ അതിർത്തി സുരക്ഷ, സാമ്പത്തിക നേട്ടങ്ങൾ എന്നിവയെക്കുറിച്ചും ട്രംപ് കാബിനറ്റ് യോഗത്തിൽ വിശദീകരിച്ചു. വാൾസ്ട്രീറ്റിലെ റെക്കോർഡ് നേട്ടങ്ങൾ, ചില്ലറ വിൽപ്പന ശൃംഖലകളിലെ വിലക്കുറവ് കാരണം കുറഞ്ഞ പണപ്പെരുപ്പം എന്നിവയും അദ്ദേഹം ചൂണ്ടിക്കാട്ടി. വാണിജ്യ സെക്രട്ടറി ഒഴികെയുള്ള എല്ലാ കാബിനറ്റ് അംഗങ്ങളും ക്യാമ്പ് ഡേവിഡിൽ നടന്ന ഈ നിർണ്ണായക യോഗത്തിൽ പങ്കെടുത്തു.
Trump Hosts Cabinet Meeting At Camp David As Tensions Escalate Over Iran വാർ.
