വാഷിങ്ടൺ: യുഎസ് ഇമിഗ്രേഷൻ ആൻഡ് കസ്റ്റംസ് എൻഫോഴ്സ്മെന്റ് (ICE) രണ്ട് മില്യൺ ഡോളർ വരെ ചെലവഴിച്ച് റോബോട്ട് നായകളെ വാങ്ങാൻ ഒരുങ്ങുന്നതായി റിപ്പോർട്ട്. ഫെഡറൽ സർക്കാർ പുറത്തിറക്കിയ സംഭരണ അറിയിപ്പിലാണ് ഇക്കാര്യം വ്യക്തമാക്കുന്നത്.
ബോസ്റ്റൺ ഡൈനാമിക്സിന്റെ SPOT റോബോട്ടുകളാണ് വാങ്ങാൻ ഉദ്ദേശിക്കുന്നത്. ഉദ്യോഗസ്ഥർക്ക് അപകടസാധ്യതയുള്ള സ്ഥലങ്ങളിൽ പരിശോധന, സാഹചര്യങ്ങൾ വിലയിരുത്തൽ, അപകടസാധ്യത തിരിച്ചറിയൽ തുടങ്ങിയ പ്രവർത്തനങ്ങൾക്ക് ദൂരനിയന്ത്രിത റോബോട്ടിക് സംവിധാനമായി ഇവ ഉപയോഗിക്കുമെന്ന് അറിയിപ്പിൽ പറയുന്നു.
യുഎസ് സീക്രട്ട് സർവീസും ഈ സാങ്കേതികവിദ്യ ഉപയോഗിക്കുന്നുണ്ട്. 2024ൽ ഫ്ലോറിഡയിലെ മാർ-എ-ലാഗോയിൽ റോബോട്ട് നായകൾ സുരക്ഷാ പരിശോധന നടത്തുന്നതിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചിരുന്നു.
360 ഡിഗ്രി ക്യാമറകൾ ഘടിപ്പിച്ചിട്ടുള്ള റോബോട്ട് നായകൾക്ക് വാതിലുകൾ തുറക്കാനും കഴിയും. രാജ്യത്തെ വിവിധ പൊലീസ് വകുപ്പുകളും ഇവ ഉപയോഗിക്കുന്നുണ്ട്. സാധാരണ പൊലീസ് നായകളെപ്പോലെ ആക്രമിക്കാൻ റോബോട്ട് നായകൾക്ക് കഴിയില്ല. എന്നാൽ നീട്ടിവയ്ക്കാവുന്ന കൈകൾ ഇവയ്ക്കുണ്ട്.
2023ൽ ലോസ് ആഞ്ചലസ് പൊലീസ് ഡിപ്പാർട്ട്മെന്റ് പുറത്തുവിട്ട ഒരു വീഡിയോയിൽ, തോക്കുകളും സ്ഫോടക വസ്തുക്കളും കണ്ടെത്തുന്നതിനായി കുറ്റകൃത്യം നടന്ന സ്ഥലത്ത് റോബോട്ട് നായ പരിശോധന നടത്തുന്നതായി കാണിച്ചിരുന്നു. അതിർത്തി സുരക്ഷയ്ക്കും അടിസ്ഥാന സൗകര്യങ്ങളുടെ സംരക്ഷണത്തിനും റോബോട്ട് നായകളെ ഉപയോഗിക്കാനാണ് പദ്ധതിയെന്ന് ഫെഡറൽ സംഭരണ അറിയിപ്പിൽ പറയുന്നു.
“അപകടകരമായ, ഇടുങ്ങിയ, അസ്ഥിരമായ അല്ലെങ്കിൽ ഉദ്യോഗസ്ഥർക്ക് എളുപ്പത്തിൽ എത്തിച്ചേരാൻ കഴിയാത്ത സ്ഥലങ്ങളുമായി ബന്ധപ്പെട്ട സംഭവങ്ങളിൽ പ്രതികരിക്കാനുള്ള DHS-ന്റെ കഴിവ് മെച്ചപ്പെടുത്തുന്നതിനൊപ്പം ഉദ്യോഗസ്ഥരുടെ സുരക്ഷ ഉറപ്പാക്കാനും പ്രവർത്തനപരമായ തീരുമാനങ്ങൾ കൂടുതൽ കൃത്യമായി എടുക്കാനും ഈ സംവിധാനം സഹായിക്കും,” എന്ന് അറിയിപ്പിൽ പറയുന്നു.
U.S. Immigration and Customs Enforcement (ICE) is looking to spend up to $2 million on robot dogs, according to a federal procurement notice
