വാഷിംഗ്ടൺ: നോർത്ത് കരോലിനയിലെ സെനറ്റ് തെരഞ്ഞെടുപ്പിൽ മുൻ ഗവർണറും ഡെമോക്രാറ്റിക് പാർട്ടി നേതാവുമായ റോയ് കൂപ്പർക്ക് തകർപ്പൻ വിജയം. റിപ്പബ്ലിക്കൻ പാർട്ടി പ്രതിനിധിയും മുൻ ആർ.എൻ.സി ചെയർമാനുമായ മൈക്കൽ വാട്ട്ലിയെ പരാജയപ്പെടുത്തിയാണ് കൂപ്പർ അട്ടിമറി വിജയം നേടിയത്. നിലവിലെ റിപ്പബ്ലിക്കൻ സെനറ്റർ തോം ടിലിസ് വിരമിച്ച ഒഴിവിലേക്കായിരുന്നു തെരഞ്ഞെടുപ്പ്.
ആകെ വോട്ടെണ്ണൽ കേന്ദ്രങ്ങളിൽ 51 ശതമാനം പ്രവിശ്യകളിലെ ഫലം പുറത്തുവന്നപ്പോൾ 35 പോയിന്റുകളുടെ വൻ ഭൂരിപക്ഷത്തിലാണ് കൂപ്പർ മുന്നേറുന്നത്. സംസ്ഥാനത്ത് മികച്ച ജനപ്രീതിയുള്ള ഗവർണറായിരുന്ന കൂപ്പർക്ക് ആദ്യഘട്ടം മുതൽക്കേ തെരഞ്ഞെടുപ്പിൽ വ്യക്തമായ മേൽക്കൈ ഉണ്ടായിരുന്നു. എൺപത്തിയഞ്ച് ശതമാനത്തോളം വിജയസാധ്യതയാണ് രാഷ്ട്രീയ നിരീക്ഷകർ അദ്ദേഹത്തിന് കൽപ്പിച്ചിരുന്നത്.
അതേസമയം, പ്രസിഡന്റ് ഡോണൾഡ് ട്രംപിന്റെ പിന്തുണയുണ്ടായിട്ടും റിപ്പബ്ലിക്കൻ സ്ഥാനാർത്ഥി മൈക്കൽ വാട്ട്ലിക്ക് ജനശ്രദ്ധ നേടാനായില്ല. ട്രംപ് ഭരണകൂടത്തിന്റെ ഇറാൻ യുദ്ധം ഉൾപ്പെടെയുള്ള വിവാദ നയങ്ങളും, മെഡിക്കെയ്ഡ് ആനുകൂല്യങ്ങൾ വെട്ടിക്കുറച്ചതിനെച്ചൊല്ലി പാർട്ടിയിലുണ്ടായ ആഭ്യന്തര തർക്കങ്ങളും റിപ്പബ്ലിക്കൻമാർക്ക് തിരിച്ചടിയായി.
16 വർഷം സംസ്ഥാന അറ്റോർണി ജനറലായും, 2017 മുതൽ 2025 വരെ ഗവർണറായും സേവനമനുഷ്ഠിച്ച 69-കാരനായ റോയ് കൂപ്പർ തന്റെ രാഷ്ട്രീയ ജീവിതത്തിൽ ഇതുവരെ ഒരു തെരഞ്ഞെടുപ്പിലും പരാജയപ്പെട്ടിട്ടില്ലെന്ന ചരിത്രവും ഇതോടെ കാത്തുസൂക്ഷിച്ചു. ആരോഗ്യ മേഖലയിലെ സമഗ്രമായ പുരോഗതിയും അധ്യാപകരുടെ ശമ്പളവർദ്ധനവും ലക്ഷ്യമിട്ടുള്ള കൂപ്പറിന്റെ മുൻകാല വികസന നയങ്ങളാണ് അദ്ദേഹത്തെ വീണ്ടും വൻ വിജയത്തിലേക്ക് നയിച്ചത്.
Upset victory in North Carolina; Roy Cooper breaks through the Republican stronghold to reach the Senate.
