അറ്റ്ലാന്റ: രണ്ട് പതിറ്റാണ്ടിലേറെ നീണ്ട റിപ്പബ്ലിക്കൻ ഭരണത്തിന് വിരാമമിട്ട് ജോർജിയ ഗവർണർ പദവി ഡെമോക്രാറ്റിക് പാർട്ടി തിരിച്ചുപിടിച്ചു. മുൻ അറ്റ്ലാന്റ മേയർ കെയ്ഷ ലാൻസ് ബോട്ടംസ് (ഡെമോക്രാറ്റിക് പാർട്ടി) റിപ്പബ്ലിക്കൻ സ്ഥാനാർത്ഥിയും ഹെൽത്ത് കെയർ എക്സിക്യൂട്ടീവുമായ റിക്ക് ജാക്സണെ പരാജയപ്പെടുത്തി.
71 ശതമാനം വോട്ടുകൾ എണ്ണിക്കഴിഞ്ഞപ്പോൾ എതിർ സ്ഥാനാർത്ഥിയേക്കാൾ 11 പോയിന്റുകളുടെ വ്യക്തമായ ഭൂരിപക്ഷത്തോടെയാണ് ബോട്ടംസ് മുന്നേറുന്നത്. മുൻ പ്രസിഡന്റ് ജോ ബൈഡന്റെ സീനിയർ അഡൈ്വസറായി പ്രവർത്തിച്ചിട്ടുള്ള ബോട്ടംസ്, 2003-ൽ റോയ് ബാൺസ് പദവി ഒഴിഞ്ഞതിന് ശേഷം ജോർജിയയുടെ ഗവർണറാകുന്ന ആദ്യത്തെ ഡെമോക്രാറ്റിക് പ്രതിനിധിയാണ്. കാലാവധി പൂർത്തിയാക്കി പടിയിറങ്ങുന്ന ഗവർണർ ബ്രയാൻ കെമ്പ് ഉൾപ്പെടെയുള്ള റിപ്പബ്ലിക്കൻമാരുടെ ഭരണത്തിന് മുൻപ് ഒരു നൂറ്റാണ്ടിലധികം കാലം ജോർജിയ ഭരിച്ചിരുന്നത് ഡെമോക്രാറ്റുകളായിരുന്നു.
ഒക്ടോബർ അവസാനം വരെയും കടുത്ത മത്സരം പ്രവചിക്കപ്പെട്ടിരുന്ന ഇവിടെ, മുൻ പ്രസിഡന്റ് ബരാക് ഒബാമ നേരിട്ടെത്തി നടത്തിയ പ്രചാരണം ഡെമോക്രാറ്റുകൾക്ക് അനുകൂലമായ തരംഗം സൃഷ്ടിച്ചു. റിപ്പബ്ലിക്കൻ പാർട്ടിക്കും സ്ഥാനാർത്ഥി റിക്ക് ജാക്സണെ പരസ്യമായി പിന്തുണച്ച പ്രസിഡന്റ് ഡോണൾഡ് ട്രംപിനും ഈ തോൽവി കനത്ത തിരിച്ചടിയായി വിലയിരുത്തപ്പെടുന്നു.
Democratic Wave in Georgia: Keisha Lance Bottoms Heads to the Governorship After Defeating Rick Jackson
