ന്യൂയോർക്ക്: യുഎസും ഇറാനും തമ്മിലുള്ള സമാധാന കരാർ സംബന്ധിച്ച ചർച്ചകളിലെ അനിശ്ചിതത്വം തുടരുന്നു. സമാധാന കരാർ സംബന്ധിച്ച് ഇറാൻ യുഎസിന് നൽകിയ നിർദേശത്തിന് അമേരിക്കയുടെ മറുപടി ലഭിച്ചതായി ഇറാൻ അറിയിച്ചു. മറുപടി നിലവിൽ പരിശോധിച്ചു വരികയാണെന്നും ഇറാൻ വ്യക്തമാക്കി. അതേസമയം, യുഎസ് പ്രസിഡന്റ് ഡോണൾഡ് ട്രംപ് ഇറാന്റെ നിർദേശം പരസ്യമായി തള്ളിയിരുന്നു.
നാല് ദിവസം മുമ്പ് ആക്സിയോസിന് നൽകിയ അഭിമുഖത്തിൽ ട്രംപ് ഇറാനുമായി ചർച്ചയ്ക്ക് തയ്യാറാണെന്ന് വ്യക്തമാക്കിയിരുന്നു. ഇറാൻ മുന്നോട്ടുവച്ച നിർദേശം തള്ളിയതിന് പിന്നാലെയായിരുന്നു ട്രംപിന്റെ പ്രതികരണം. ടെഹ്റാനുമായി ചർച്ചയ്ക്കുള്ള സാധ്യത ഇപ്പോഴും തുറന്നിട്ടുണ്ടെന്നും അദ്ദേഹം പറഞ്ഞു. ന്യൂയോർക്കിൽ നടക്കുന്ന 81-ാമത് യുഎൻ പൊതുസഭാ സമ്മേളനത്തിനിടെ ഇറാൻ വിദേശകാര്യ മന്ത്രി അബ്ബാസ് അറാഖ്ചിയും ഇറാൻ പ്രതിനിധി സംഘവും യുഎസ് ഉദ്യോഗസ്ഥരുമായി പരോക്ഷ ചർച്ചകൾ നടത്തിയതായാണ് റിപ്പോർട്ട്. ഖത്തറും പാകിസ്ഥാനും മധ്യസ്ഥരായി പ്രവർത്തിച്ചു.
ഹോർമുസ് കടലിടുക്ക് വീണ്ടും തുറക്കുന്നതിനുള്ള ഇറാന്റെ നിബന്ധനകൾ അറാഖ്ചി ചർച്ചയിൽ മുന്നോട്ടുവച്ചെങ്കിലും കാര്യമായ പുരോഗതി ഉണ്ടായില്ല. ചർച്ചകൾ പരാജയപ്പെട്ടതിനെ തുടർന്ന് തിങ്കളാഴ്ച ഇറാൻ പ്രതിനിധി സംഘത്തോട് ന്യൂയോർക്ക് വിട്ടുപോകാൻ യുഎസ് സ്റ്റേറ്റ് സെക്രട്ടറി മാർക്കോ റൂബിയോ നിർദേശിച്ചതായി ആക്സിയോസ് റിപ്പോർട്ട് ചെയ്തു. ചൊവ്വാഴ്ചയോടെ പ്രതിനിധി സംഘം രാജ്യം വിട്ടതായും റിപ്പോർട്ടിൽ പറയുന്നു. എന്നാൽ അറാഖ്ചി തിങ്കളാഴ്ച രാത്രി തന്നെ ന്യൂയോർക്ക് വിടാൻ തീരുമാനിച്ചിരുന്നതായും റിപ്പോർട്ടിൽ വ്യക്തമാക്കുന്നു.
ഏഴ് മാസം നീണ്ട യുദ്ധം അവസാനിപ്പിക്കുന്നതിനായി ഇറാൻ മുന്നോട്ടുവച്ച ഏറ്റവും പുതിയ നിർദേശത്തിന് അമേരിക്കയുടെ ഔദ്യോഗിക മറുപടി ലഭിച്ചതായി ഇറാൻ ഉദ്യോഗസ്ഥരും വ്യക്തമാക്കി. ന്യൂയോർക്ക് സന്ദർശനത്തിനിടെ ലഭിച്ച യുഎസ് മറുപടി പ്രസിഡന്റ് മസൂദ് പെസഷ്കിയാനെ അറാഖ്ചി മന്ത്രിസഭാ യോഗത്തിൽ ധരിപ്പിച്ചതായി സർക്കാർ വക്താവ് ഫതെമേ മൊഹാജെറാനിയെ ഉദ്ധരിച്ച് സർക്കാർ വാർത്താ ഏജൻസിയായ IRNA റിപ്പോർട്ട് ചെയ്തു.കരാർ യാഥാർഥ്യമാക്കാൻ സാധ്യമായ എല്ലാ ശ്രമങ്ങളും നടത്തുമെന്നും ഇറാൻ ജനതയുടെ അവകാശങ്ങൾക്കായി ശക്തമായി നിലകൊള്ളുമെന്നും പെസഷ്കിയാൻ പറഞ്ഞു. കരാർ ഇരുപക്ഷത്തിനും നേട്ടമുണ്ടാകുന്ന രീതിയിലായിരിക്കണമെന്നും അദ്ദേഹം വ്യക്തമാക്കി.
ന്യൂയോർക്ക് സന്ദർശനവും അവിടെ നടത്തിയ കൂടിക്കാഴ്ചകളും സംബന്ധിച്ച് അറാഖ്ചി മന്ത്രിസഭയെ വിശദീകരിച്ചു. ഹോർമുസ് കടലിടുക്ക് വീണ്ടും തുറക്കുന്നതിനുള്ള ഇറാന്റെ നിബന്ധനകളും അദ്ദേഹം വിശദീകരിച്ചു. അമേരിക്ക ഇറാൻ തുറമുഖങ്ങൾക്കെതിരായ ഉപരോധം പിൻവലിക്കുകയും മരവിപ്പിച്ച ഇറാൻ ആസ്തികൾ വിട്ടുനൽകുകയും ഇറാന്റെ എണ്ണ വിൽപ്പനയ്ക്കുള്ള ഉപരോധം ഒഴിവാക്കുകയും ചെയ്താൽ ഒരാഴ്ചയ്ക്കുള്ളിൽ ഹോർമുസ് കടലിടുക്ക് തുറക്കാമെന്ന് കഴിഞ്ഞ ആഴ്ച അറാഖ്ചി നിർദേശം മുന്നോട്ടുവച്ചിരുന്നു. ഇതിന് പുറമെ മറ്റ് നിബന്ധനകളും ഇറാൻ മുന്നോട്ടുവച്ചിരുന്നു.
US-Iran peace deal: Tehran says ‘got US response on proposal’; Araghchi ‘told to leave’ after ‘talks failed’ in New York
