ശക്തമായ ഇരട്ട ഭൂകമ്പം കടുത്ത നാശം വിതച്ച തെക്കനമേരിക്കൻ രാജ്യമായ വെനസ്വേലയിൽ മരണസംഖ്യ കുതിച്ചുയരുന്നു. ദുരന്തത്തിൽ ഇതുവരെ 589 പേരുടെ മരണം ഔദ്യോഗികമായി സ്ഥിരീകരിച്ചു. കെട്ടിടാവശിഷ്ടങ്ങൾക്കിടയിൽ ഇനിയും നിരവധി ആളുകൾ കുടുങ്ങിക്കിടക്കുന്നതായാണ് വിവരം. പരിക്കേറ്റവരുടെ എണ്ണം നാലായിരത്തിലധികം വരുമെന്നാണ് സൂചനയെങ്കിലും 2980 പേർക്ക് പരിക്കേറ്റതായാണ് നിലവിലെ ഔദ്യോഗിക കണക്കുകൾ വ്യക്തമാക്കുന്നത്. ദുരന്തബാധിത പ്രദേശങ്ങളിൽ നിന്ന് അമ്പതിനായിരത്തിലേറെ പേരെ കാണാതായിട്ടുണ്ടെന്ന ഞെട്ടിക്കുന്ന റിപ്പോർട്ടുകളും പുറത്തുവരുന്നുണ്ട്.
ബുധനാഴ്ച വെനസ്വേലയിലുണ്ടായ റിക്ടർ സ്കെയിലിൽ 7.2, 7.5 തീവ്രത രേഖപ്പെടുത്തിയ രണ്ട് ഭൂകമ്പങ്ങളാണ് രാജ്യത്തെ തകർത്തുകളഞ്ഞത്. വെനസ്വേലയുടെ ചരിത്രത്തിൽ ഒരു നൂറ്റാണ്ടിനിടയിലുണ്ടായ ഏറ്റവും ശക്തമായ ഭൂകമ്പമാണിത്. ഇതിന് മുൻപ് 1900-ൽ ഉണ്ടായ 7.7 തീവ്രതയിലുള്ള ഭൂകമ്പമാണ് രാജ്യം കണ്ട ഏറ്റവും വലിയ ദുരന്തം. പിന്നീട് 1967-ൽ 236 പേരും 1997-ൽ 73 പേരും ഭൂകമ്പങ്ങളിൽ മരണപ്പെട്ടിരുന്നു. ദുരന്തഭൂമിയിൽ രക്ഷാപ്രവർത്തനം ദ്രുതഗതിയിൽ പുരോഗമിക്കുകയാണെന്ന് ആക്ടിങ് പ്രസിഡന്റ് ഡെൽസി റോഡ്രിഗസ് അറിയിച്ചു.
അതിനിടെ, കനത്ത പ്രതിസന്ധിയിലായ വെനസ്വേലയ്ക്ക് അടിയന്തര രക്ഷാകരവുമായി ഇന്ത്യ രംഗത്തെത്തി. സ്പാനിഷ് ഭാഷയിൽ സൗഹൃദം എന്ന് അർത്ഥം വരുന്ന ‘ഓപ്പറേഷൻ അമിസ്റ്റഡ്’ എന്ന പേരിൽ വ്യോമസേനയുടെ രണ്ട് വിമാനങ്ങളിലായി വിപുലമായ സഹായമാണ് ഇന്ത്യ കരാക്കാസിലേക്ക് അയച്ചിരിക്കുന്നത്. 41 അംഗ വിദഗ്ദ്ധ മെഡിക്കൽ സംഘവും 60 പാരാ ഫീൽഡ് ആശുപത്രി സൗകര്യങ്ങളും ആറ് ടൺ മരുന്നുകളും ഭക്ഷണസാധനങ്ങളും ഉൾപ്പെടെയുള്ള ദുരിതാശ്വാസ സാമഗ്രികളുമായാണ് ഇന്ത്യൻ വിമാനങ്ങൾ വെനസ്വേലയിലേക്ക് തിരിച്ചത്.
