വാഷിംഗ്ടൺ: ഇറാനുമായുള്ള നയതന്ത്ര ചർച്ചകൾ മാധ്യമങ്ങളിലൂടെ നടത്താൻ അമേരിക്ക തയ്യാറല്ലെന്ന് വൈറ്റ് ഹൗസ് വ്യക്തമാക്കി. സിബിഎസ് ന്യൂസിന് നൽകിയ ഔദ്യോഗിക പ്രസ്താവനയിലാണ് വൈറ്റ് ഹൗസ് അസിസ്റ്റന്റ് പ്രസ് സെക്രട്ടറി ഒലീവിയ വെയ്ൽസ് ഇക്കാര്യം അറിയിച്ചത്. അതീവ പ്രാധാന്യമുള്ള നയതന്ത്ര നീക്കങ്ങളാണിതെന്നും പത്രമാധ്യമങ്ങളിലൂടെ ചർച്ചകൾ നടത്തുന്ന രീതി യുഎസ് പിന്തുടരില്ലെന്നും അവർ കൂട്ടിച്ചേർത്തു. ഇറാനുമായുള്ള ചർച്ചകളിൽ അമേരിക്കയ്ക്കാണ് മേൽക്കൈ ഉള്ളതെന്ന് പ്രസിഡന്റ് ഡോണൾഡ് ട്രംപിന്റെ വാക്കുകളെ ഉദ്ധരിച്ച് വൈറ്റ് ഹൗസ് വ്യക്തമാക്കി.
അമേരിക്കൻ ജനതയുടെ താൽപ്പര്യങ്ങൾ സംരക്ഷിക്കുന്ന ഒരു കരാറിന് മാത്രമേ രാജ്യം തയ്യാറാവൂ. ഇറാനെ ഒരു കാരണവശാലും ആണവായുധം കൈവരിക്കാൻ അനുവദിക്കില്ലെന്നും പ്രസ്താവനയിൽ ഉറപ്പിച്ചു പറയുന്നു. ഇറാന്റെ യുറേനിയം സമ്പുഷ്ടീകരണ പദ്ധതികൾ പൂർണ്ണമായും ഉപേക്ഷിക്കണമെന്ന് അമേരിക്കയും സഖ്യകക്ഷിയായ ഇസ്രായേലും ശക്തമായി ആവശ്യപ്പെടുന്നുണ്ട്. ഇറാൻ ആണവായുധ നിർമ്മാണത്തിലേക്ക് നീങ്ങുകയാണെന്ന ആരോപണം വാഷിംഗ്ടൺ ആവർത്തിക്കുമ്പോഴും തങ്ങൾ സമാധാനപരമായ ആവശ്യങ്ങൾക്കാണ് ആണവോർജ്ജം ഉപയോഗിക്കുന്നതെന്നാണ് ടെഹ്റാന്റെ വാദം.
12 ദിവസം നീണ്ടുനിന്ന യുദ്ധത്തിലൂടെ ഇറാന്റെ ആണവ ശേഷി തകർത്തെന്ന് മുൻപ് അവകാശപ്പെട്ടിരുന്നെങ്കിലും, ഇറാന്റെ പക്കലുള്ള സമ്പുഷ്ടീകരിച്ച യുറേനിയം വിട്ടുനൽകണമെന്ന പുതിയ നിലപാടിലാണ് പ്രസിഡന്റ് ട്രംപ്. സോഷ്യൽ മീഡിയയിലൂടെ ‘ന്യൂക്ലിയർ ഡസ്റ്റ്’ എന്ന് ട്രംപ് വിശേഷിപ്പിച്ച ഈ ശേഖരം വിട്ടുനൽകുന്ന കാര്യത്തിൽ പക്ഷേ ഇറാൻ വിട്ടുവീഴ്ചയ്ക്ക് തയ്യാറല്ല. നിലവിൽ നടക്കുന്ന നയതന്ത്ര ചർച്ചകളിൽ ആണവ സംബന്ധിയായ കാര്യങ്ങൾ ഉൾപ്പെടുത്തില്ലെന്ന് ഇറാന്റെ ഔദ്യോഗിക മാധ്യമങ്ങൾ ഇതിനോടകം വ്യക്തമാക്കിയിട്ടുണ്ട്. നയതന്ത്ര തലത്തിൽ ഇരുരാജ്യങ്ങളും തമ്മിലുള്ള ഈ പോരാട്ടം വരും ദിവസങ്ങളിൽ കൂടുതൽ സങ്കീർണ്ണമാകാനാണ് സാധ്യത.
