ന്യൂജേഴ്സി: തങ്ങളുടെ പ്രമുഖ ഉൽപ്പന്നമായ ബേബി പൗഡറും മറ്റ് ടാൽകം ഉൽപ്പന്നങ്ങളും അണ്ഡാശയ ക്യാൻസറിന് കാരണമാകുന്നുവെന്ന യുഎസിലെ പതിനായിരക്കണക്കിന് കേസുകൾ ഒത്തുതീർപ്പാക്കാൻ 5.5 ബില്യൺ ഡോളർ (ഏകദേശം 4.14 ബില്യൺ പൗണ്ട്) വരെ നൽകാൻ തയ്യാറാണെന്ന് പ്രമുഖ ഹെൽത്ത് കെയർ കമ്പനിയായ ജോൺസൺ & ജോൺസൺ അറിയിച്ചു. കമ്പനിയെ വർഷങ്ങളായി അലട്ടുന്ന ദീർഘകാല നിയമപോരാട്ടങ്ങൾക്ക് വിരാമമിടാനാണ് ഈ ലാൻഡ്മാർക്ക് ഒത്തുതീർപ്പ് നിർദ്ദേശം.
ടാൽക് അധിഷ്ഠിത ഉൽപ്പന്നങ്ങൾ ക്യാൻസറിന് കാരണമായിട്ടുണ്ടെന്ന ആരോപണം കമ്പനി ശക്തമായി നിഷേധിച്ചു. ആരോപണങ്ങൾ അടിസ്ഥാനരഹിതമാണെങ്കിലും, വിഷയം പൂർണ്ണമായി പരിഹരിച്ച് കമ്പനിയുടെ പ്രധാന ലക്ഷ്യങ്ങളിലേക്ക് ശ്രദ്ധ കേന്ദ്രീകരിക്കാനാണ് ഈ തീരുമാനമെന്ന് ജെ&ജെയുടെ വ്യവഹാര വിഭാഗം വൈസ് പ്രസിഡൻ്റ് എറിക് ഹാസ് വ്യക്തമാക്കി.
അടുത്ത വർഷം 3 ബില്യൺ ഡോളർ വരെ നൽകുമെന്നും, 2028-ന് മുമ്പ് മറ്റ് പേയ്മെൻ്റുകൾ ഉണ്ടാകില്ലെന്നുമാണ് കമ്പനിയുടെ വാഗ്ദാനം. എന്നാൽ, ഈ നിർദ്ദേശം നിലവിലുള്ള അണ്ഡാശയ ക്യാൻസർ ക്ലെയിമുകളിൽ 95% കേസുകളെയും പ്രതിനിധീകരിക്കുന്ന നിയമ സ്ഥാപനങ്ങൾ അംഗീകരിച്ചാൽ മാത്രമേ അന്തിമമാകൂ.
ക്യാൻസറിന് കാരണമാകുന്ന അസ്ബെസ്റ്റോസ് എന്ന ധാതുവിൻ്റെ സാന്നിധ്യം ടാൽകം പൗഡറിൽ ഉണ്ടെന്നാണ് വാദികളുടെ ആരോപണം. എന്നാൽ തങ്ങളുടെ ടാൽക് സുരക്ഷിതമാണെന്ന് കമ്പനി ആവർത്തിച്ചു. എങ്കിലും, വിവാദങ്ങളെ തുടർന്ന് 2022-ൽ ടാൽക് അധിഷ്ഠിത പൗഡറുകളുടെ ആഗോള ഉൽപ്പാദനം നിർത്തിയ കമ്പനി, ഇപ്പോൾ പൂർണ്ണമായും ചോളപ്പൊടി ഉപയോഗിച്ചുള്ള ബേബി പൗഡറുകളിലേക്ക് മാറിയിരിക്കുകയാണ്.
Baby powder controversy: Johnson & Johnson offers $5.5 billion to settle
