അമേരിക്കന്‍ മുന്‍ പ്രസിഡന്റ് ഡോണള്‍ഡ് ട്രംപിനെതിരായ വധശ്രമം പരാജയപ്പെട്ടതുമായി ബന്ധപ്പെട്ട തിരയല്‍ ഫലങ്ങള്‍ ഗൂഗിള്‍ അടുത്തിടെ ഒഴിവാക്കിയത് വിവാദങ്ങള്‍ക്ക് കാരണമായി.
ട്രംപിനെതിരായ വധശ്രമം പരാജയപ്പെട്ടതിനെക്കുറിച്ചുള്ള വിവരങ്ങള്‍ തിരയുന്ന ആളുകള്‍ക്ക് സെര്‍ച്ച് എഞ്ചിന്‍ ഗൂഗിള്‍ പ്രതീക്ഷിച്ചതൊന്നും നല്‍കാതെ വന്നതോടെ പലര്‍ക്കും ആശയക്കുഴപ്പമുണ്ടായി. ഇതു പിന്നീട് വലിയ വിമര്‍ശനങ്ങള്‍ക്കിടയാക്കി.
‘കൊലപാതകശ്രമം’ എന്ന് ടൈപ്പ് ചെയ്തപ്പോഴും, രാജ്യത്തെ മുഴുവന്‍ നടുക്കിയ പെന്‍സില്‍വാനിയയിലെ ബട്ട്ലറില്‍ ജൂലൈ 13-ന് നടന്ന സംഭവത്തെക്കുറിച്ച് അമേരിക്കക്കാര്‍ക്ക് സെര്‍ച്ച് റിസള്‍ട്ടായി ട്രംപിനെതിരായി നടന്ന സംഭവത്തിന്റെ സൂചന ഒന്നും ലഭിച്ചില്ല. ഇതിനെതിരെ, ടെക് ഭീമന്‍ തിരഞ്ഞെടുപ്പില്‍ കൃത്രിമം കാണിക്കാന്‍ ശ്രമിക്കുന്നുവെന്ന് ട്രംപിന്റെ മകന്‍ അടക്കം ആരോപണം ഉന്നയിച്ചു. വരാനിരിക്കുന്ന തിരഞ്ഞെടുപ്പിനെ സ്വാധീനിക്കാന്‍ സുന്ദര്‍ പിച്ചൈയുടെ നേതൃത്വത്തിലുള്ള സാങ്കേതിക സ്ഥാപനം മനഃപൂര്‍വം തിരയല്‍ ഫലങ്ങളില്‍ കൃത്രിമം കാണിക്കുന്നുവെന്ന് ഡോണള്‍ഡ് ട്രംപ് ജൂനിയര്‍ ആരോപിച്ചതോടെയാണ് സംഗതി ചൂടുപിടിച്ച ചര്‍ച്ചയായത്.
”കമലാ ഹാരിസിനെ സഹായിക്കാന്‍ വീണ്ടും തിരഞ്ഞെടുപ്പില്‍ ഇടപെടാന്‍ ശ്രമിക്കുന്നു. ഇത് ഗൂഗിളില്‍ നിന്നുള്ള ബോധപൂര്‍വമായ തിരഞ്ഞെടുപ്പ് ഇടപെടലാണെന്ന് എല്ലാവര്‍ക്കും അറിയാം. ശരിക്കും നിന്ദ്യമാണ്,” ഡോണള്‍ഡ് ട്രംപ് ജൂനിയര്‍ തന്റെ എക്സ് അക്കൗണ്ടില്‍ കുറിച്ചു.
ലോകമെമ്പാടുമുള്ള ഉപയോക്താക്കളില്‍ നിന്നുള്ള നിരവധി സ്‌ക്രീന്‍ഷോട്ടുകള്‍ അവലോകനം ചെയ്ത ഫോക്സ് ന്യൂസ് പറയുന്നതനുസരിച്ച്, ട്രംപിനെതിരായ വധശ്രമത്തിന് പകരം റൊണാള്‍ഡ് റീഗന്റെ കൊലപാതകം, ആര്‍ച്ച്ഡ്യൂക്ക് ഫെര്‍ഡിനാന്‍ഡിന്റെ കൊലപാതകം, ബോബ് മാര്‍ലിയെ വെടിവച്ചത്, മുന്‍ പ്രസിഡന്റ് ജെറാള്‍ഡ് ഫോര്‍ഡിനെതിരായ ഗൂഢാലോചന തുടങ്ങിയ ചരിത്രപരമായ സംഭവങ്ങള്‍ ഗൂഗിള്‍ സേര്‍ച്ചില്‍ ഉണ്ട്. എന്നാല്‍, ട്രംപിന്റെ വധശ്രമത്തിനെതിരായ വിഷയത്തില്‍ തങ്ങളുടെ സംവിധാനങ്ങള്‍ക്ക് പ്രത്യേക നിര്‍ദേശമൊന്നും നല്‍കിയിട്ടില്ലെന്നും രാഷ്ട്രീയ അക്രമങ്ങളെക്കുറിച്ചുള്ള നിര്‍ദ്ദേശങ്ങള്‍ സ്വയമേവ പൂര്‍ത്തിയാക്കുന്നത് തടയാന്‍ തങ്ങളുടെ സംവിധാനങ്ങളില്‍ അന്തര്‍നിര്‍മ്മിത സുരക്ഷാ ഫീച്ചറുകള്‍ ഉണ്ടെന്നും ഗൂഗിളിന്റെ ഭാഗത്തുനിന്നും അനൗദ്യോഗിക മറുപടി എത്തി.
എന്നാല്‍ ഗൂഗിളിന്റെ ഈ വിശദീകരണം തള്ളുന്നവര്‍, ജോണ്‍ എഫ്. കെന്നഡി, എബ്രഹാം ലിങ്കണ്‍, റൊണാള്‍ഡ് റീഗന്‍, ടെഡി റൂസ്വെല്‍റ്റ് എന്നിവരുള്‍പ്പെടെയുള്ള മറ്റ് രാഷ്ട്രീയക്കാരുടെ വധശ്രമങ്ങളെക്കുറിച്ച് തിരയുമ്പോള്‍ അതല്ല സ്ഥിതിയെന്ന് ചൂണ്ടിക്കാട്ടുന്നു.
