അമേരിക്കയിൽ വീണ്ടും രാഷ്ട്രീയപ്പോര്; മുൻ എഫ്.ബി.ഐ ഡയറക്ടർക്കെതിരെ മൂന്നാമതും കേസെടുക്കാൻ നീക്കം

വാഷിംഗ്ടൺ: മുൻ ഫെഡറൽ ബ്യൂറോ ഓഫ് ഇൻവെസ്റ്റിഗേഷൻ (എഫ്.ബി.ഐ) ഡയറക്ടറും ഡോണൾഡ് ട്രംപിന്റെ ശക്തനായ വിമർശകനുമായ ജെയിംസ് കോമിക്കെതിരെ ഔദ്യോഗിക വിവരങ്ങൾ ചോർത്തിയെന്ന കുറ്റത്തിന് കേസ് ചാർജ് ചെയ്യാനുള്ള നടപടികളുമായി യു.എസ് നീതിന്യായ വകുപ്പ് (DOJ) മുന്നോട്ട്. ക്ലാസിഫൈഡ് പ്രതിരോധ വിവരങ്ങൾ അനധികൃതമായി പുറത്തുവിട്ടതിലൂടെ ‘എസ്പിയോണേജ് ആക്ട്’ (ചാരവൃത്തി നിരോധന നിയമം) ലംഘിച്ചു എന്ന രണ്ട് കുറ്റങ്ങളാണ് അദ്ദേഹത്തിനെതിരെ ചുമത്താൻ പ്രൊസിക്യൂട്ടർമാർ ശ്രമിക്കുന്നത്. കോമിക്കെതിരെ ക്രിമിനൽ കുറ്റം ചുമത്താൻ നീതിന്യായ വകുപ്പ് നടത്തുന്ന മൂന്നാമത്തെ ശ്രമമാണിത്.

കേസ് ഫയൽ ചെയ്യാനുള്ള സമയപരിധി അവസാനിക്കുന്നതിന് തൊട്ടുമുമ്പ് അത് നിലനിർത്താനാണ് പ്രത്യേക നിയമവഴിയിലൂടെ നീതിന്യായ വകുപ്പ് ഇപ്പോൾ ‘ക്രിമിനൽ ഇൻഫർമേഷൻ’ ഫയൽ ചെയ്തിരിക്കുന്നത്. 2016 ഒക്ടോബറിൽ യാഹൂ ഇമെയിൽ നിരീക്ഷണവുമായി ബന്ധപ്പെട്ട് ന്യൂയോർക്ക് ടൈംസ് പത്രത്തിൽ വന്ന ഒരു വാർത്തയ്ക്ക് ആസ്പദമായ വിവരങ്ങൾ ചോർത്തി നൽകി എന്നതാണ് നിലവിലെ കേസ്.

ഒരു ഗ്രാൻഡ് ജൂറിയുടെയോ മജിസ്‌ട്രേറ്റിന്റെയോ മുൻകൂർ അനുമതിയില്ലാതെ നേരിട്ട് കുറ്റപത്രം സമർപ്പിക്കുന്ന രീതിയാണിത്. സാധാരണയായി പ്രതികൾ കുറ്റം സമ്മതിക്കാൻ തയ്യാറാകുമ്പോൾ മാത്രം ഉപയോഗിക്കുന്ന ഈ രീതി, കേസിന്റെ സമയപരിധി നീട്ടാൻ വേണ്ടി ഉപയോഗിച്ചത് അങ്ങേയറ്റം അസാധാരണമാണെന്ന് മുൻ പ്രൊസിക്യൂട്ടർമാരും നിയമവിദഗ്ദ്ധരും ചൂണ്ടിക്കാണിക്കുന്നു. ഒൻപത് വർഷം മുൻപ് അവസാനിക്കേണ്ടിയിരുന്ന ഒരു കേസ് നിലനിർത്താൻ വേണ്ടിയുള്ള നീക്കമാണിതെന്നാണ് വിമർശനം.

താൻ പൂർണ്ണമായും നിരപരാധിയാണെന്ന് ജെയിംസ് കോമിയും അദ്ദേഹത്തിന്റെ അഭിഭാഷകരും വ്യക്തമാക്കി. ഇത് നീതിന്യായ വകുപ്പിന്റെ നഗ്നമായ ദുരുപയോഗമാണെന്നും, താൻ ഇത്തരം നീക്കങ്ങളെ ഭയപ്പെടുന്നില്ലെന്നും കോമി പ്രതികരിച്ചു. മുൻപ് കോൺഗ്രസിനോട് കള്ളം പറഞ്ഞു എന്ന പേരിലും, ട്രംപിനെ സോഷ്യൽ മീഡിയയിലൂടെ ഭീഷണിപ്പെടുത്തി എന്ന പേരിലും കോമിക്കെതിരെ കേസെടുക്കാൻ ശ്രമങ്ങൾ നടന്നിരുന്നു.

തുടക്കത്തിൽ രഹസ്യമായി സൂക്ഷിച്ചിരുന്ന ഈ കേസ് വിവരങ്ങൾ ജെയിംസ് കോമിയുടെ തന്നെ ആവശ്യപ്രകാരം യു.എസ് ഡിസ്ട്രിക്റ്റ് ജഡ്ജി ട്രെവർ മക്ഫാഡൻ പരസ്യപ്പെടുത്താൻ ഉത്തരവിടുകയായിരുന്നു. മുൻ എഫ്.ബി.ഐ ഡയറക്ടർക്കെതിരെയുള്ള കേസ് ആയതിനാൽ ഇതിൽ പൊതുജനങ്ങൾക്ക് വലിയ താൽപ്പര്യമുണ്ടെന്ന് ജഡ്ജി നിരീക്ഷിച്ചു. അന്വേഷണം പുരോഗമിക്കുകയാണെന്നും കൂടുതൽ പ്രതികരണങ്ങൾക്കില്ലെന്നുമാണ് നീതിന്യായ വകുപ്പിന്റെ ഔദ്യോഗിക നിലപാട്.

Political strife erupts again in the US; move underway to file a third case against the former FBI Director.