ന്യൂയോര്ക്ക്: യുഎസില് ഒമ്പതുപേരുടെ ജീവനുകള് കവര്ന്ന വില്ലനായി ലിസ്റ്റീരിയ മാറുമ്പോള് ഭക്ഷണകാര്യത്തില് അധിക ശ്രദ്ധവേണമെന്ന് അധികൃതര്. ശീതീകരിച്ച ഇറച്ചി വിഭവങ്ങള് ഉപയോഗിക്കുമ്പോള് അതീവ ജാഗ്രത പാലിക്കണം. മാത്രമല്ല, രോഗം പെട്ടെന്ന് പിടിപെടാന് സാധ്യതയുള്ള ഗര്ഭിണികള്, വയോധികര് എന്നിവരും പ്രത്യേക കരുതല് പാലിക്കണം.
യുഎസിലെ പല സംസ്ഥാനങ്ങളിലും രോഗ ബാധ സ്ഥിരീകരിച്ചതിനാലും നിരവധി പേര് ചികിത്സ തേടി എത്തിയതിനാലുമാണ് ജാഗ്രതാ നിര്ദേശം എത്തിയത്. കൂടുതല് പേരിലേക്ക് രോഗബാധ ഉണ്ടാകാനുള്ള സാധ്യതയും സെന്റര്സ് ഫോര് ഡിസീസ് കണ്ട്രോള് ആന്ഡ് പ്രിവന്ഷന് (സിഡിസി )ചൂണ്ടിക്കാട്ടുന്നു.
ജൂലൈ 19 ന് രോഗം റിപ്പോര്ട്ട് ചെയ്തതിന് പിന്നാലെ യു.എസിലെ 18 സംസ്ഥാനങ്ങളിലായി 57 ഓളം ആശുപത്രികളിലായി ആളുകള് ചികിത്സ തേടിയെന്നും ഒമ്പത് മരണങ്ങളിലേക്ക് നയിച്ചെന്നും സിഡിസി വ്യക്തമാക്കി. സൗത്ത് കരോലിന, ഇല്ലിനോയിസ്, ന്യൂജേഴ്സി, വിര്ജീനിയ, ഫ്ലോറിഡ, ടെന്നസി, ന്യൂ മെക്സിക്കോ, ന്യൂയോര്ക്ക് എന്നിവിടങ്ങളിലായാണ് മരണം റിപ്പോര്ട്ട് ചെയ്തത്. 2011ന് ശേഷമുള്ള ഏറ്റവും വലിയ ലിസ്റ്റീരിയോസിസ് പകര്ച്ചയാണ് ഇതെന്ന് അമേരിക്കയിലെ ദേശീയ പൊതുജനാരോഗ്യ ഏജന്സി സ്ഥിരീകരിച്ചു.
വീടുകളില് ശീതീകരിച്ച് സൂക്ഷിച്ചിരിക്കുന്ന പന്നിയുടെ മാംസം ഉള്പ്പെടെ എല്ലാം സൂക്ഷമമായി പരിശോധിക്കണമെന്നും മുന്നറിയിപ്പുണ്ട്. ശീതീകരിച്ച ഊഷ്മാവില് പോലും മാംസം സ്ലൈസറുകള്, ഭക്ഷണ പദാര്ത്ഥങ്ങള് എന്നിവയുടെ പ്രതലങ്ങളില് നിലനില്ക്കാന് കഴിയുന്ന അണുക്കളാണ് ലിസ്റ്റീരിയയുടേത്. ചില ആളുകള്ക്ക് ലിസ്റ്റീരിയോസിസിന്റെ ലക്ഷണങ്ങള് ഉണ്ടാകാന് 10 ആഴ്ച വരെ എടുത്തേക്കാമെന്നതും വെല്ലുവിളിയാണ്. ബാക്ടീരിയകള് ശരീരത്തിലെത്തിയാല് കുടലില് നിന്ന് ശരീരത്തിന്റെ മറ്റ് ഭാഗങ്ങളിലേക്ക് വ്യാപിക്കും. ഇത് ലിസ്റ്റീരിയ ഗുരുതരമാക്കാന് കാരണമാകും. ഇന്വേസീവ് ലിസ്റ്റീരിയോസിസ് എന്നാണ് അത് അറിയപ്പെടുന്നത്.
ഗര്ഭിണികള്ക്ക് സാധാരണയായി പനി, ക്ഷീണം, പേശിവേദന എന്നിവ മാത്രമേ അനുഭവപ്പെടൂ. എന്നിരുന്നാലും, ഗര്ഭകാലത്തെ ലിസ്റ്റീരിയ അണുബാധ ഗര്ഭം അലസല്, പ്രസവം, മാസം തികയാതെയുള്ള പ്രസവം, അല്ലെങ്കില് നവജാതശിശുവിന്റെ ജീവന് അപകടപ്പെടുത്തുന്ന അണുബാധ എന്നിവയ്ക്ക് കാരണമാകും. അതിനാല് ഭക്ഷണ കാര്യത്തില് അതീവ ജാഗ്രത പുലര്ത്തണം. സാധാരണക്കാരില് പനിയും പേശീവേദനയും, തലവേദന, കഴുത്ത് ഞെരുക്കം, ആശയക്കുഴപ്പം, ബാലന്സ് നഷ്ടപ്പെടല്, മലബന്ധം എന്നിവയും അനുഭവപ്പെടാം.
