ജിബൂട്ടി സിറ്റി: കിഴക്കൻ ആഫ്രിക്കൻ രാജ്യമായ ജിബൂട്ടിക്ക് സമീപം ചെങ്കടലിൽ അഭയാർത്ഥി ബോട്ട് മുങ്ങിയുണ്ടായ അപകടത്തിൽ മരണസംഖ്യ 139 ആയി ഉയർന്നു. കടലിൽ നിന്ന് 30 മൃതദേഹങ്ങൾ കൂടി കണ്ടെടുത്തതോടെയാണ് മരണസംഖ്യ ഉയർന്നതെന്ന് ഐക്യരാഷ്ട്രസഭയുടെ അന്താരാഷ്ട്ര കുടിയേറ്റ സംഘടന (IOM) സ്ഥിരീകരിച്ചു. അപകടത്തിൽപ്പെട്ട 84 പേരെ ഇനിയും കണ്ടെത്താനായിട്ടില്ല. ഇവർക്കായുള്ള തിരച്ചിൽ ഊർജ്ജിതമായി തുടരുകയാണ്. കാണാതായവർക്കായി തിരച്ചിൽ തുടരുന്നതിനാൽ മരണസംഖ്യ ഇനിയും ഉയർന്നേക്കുമെന്നാണ് ആശങ്ക.
ജിബൂട്ടിയിലെ ഒബോക് നഗരത്തിന് വടക്ക് ഗുഹെറ മേഖലയ്ക്ക് സമീപമാണ് ദുരന്തമുണ്ടായത്. സ്ത്രീകളും കുട്ടികളും ഉൾപ്പെടെ 305 കുടിയേറ്റക്കാരുമായി യെമനിലേക്ക് പുറപ്പെട്ട ബോട്ടാണ് അപകടത്തിൽപ്പെട്ടത്. ഉൾക്കൊള്ളാവുന്നതിലും അധികം ആളുകളെ കയറ്റിയതാണ് ബോട്ട് മുങ്ങാൻ കാരണമായതെന്നാണ് പ്രാഥമിക നിഗമനം. മരിച്ചവരിൽ 15 കുട്ടികളും 42 സ്ത്രീകളും 52 പുരുഷന്മാരും ഉൾപ്പെടുന്നു. അപകടത്തിൽപ്പെട്ടവരിൽ ഭൂരിഭാഗം പേരും എത്യോപ്യൻ സ്വദേശികളാണ്.
അതേസമയം, അപകടത്തിൽ നിന്ന് ഏകദേശം 82 പേർ അത്ഭുതകരമായി രക്ഷപ്പെട്ടു. ഇവർക്ക് ആവശ്യമായ അടിയന്തര വൈദ്യസഹായവും മറ്റ് മാനുഷിക പിന്തുണയും ഐ.ഒ.എം അധികൃതർ നൽകിവരുന്നുണ്ട്. മെച്ചപ്പെട്ട ജീവിതാഹസാഹചര്യവും ജോലിയും തേടി ആഫ്രിക്കൻ രാജ്യങ്ങളിൽ നിന്നുള്ള ആളുകൾ യെമൻ വഴി ഗൾഫ് രാജ്യങ്ങളിലേക്ക് കടക്കാൻ ഉപയോഗിക്കുന്ന പ്രധാന സമുദ്രപാതയാണിത്. അപകടങ്ങൾ നിറഞ്ഞ ഈ പാതയിൽ മുൻപും സമാനമായ നിരവധി ദുരന്തങ്ങൾ റിപ്പോർട്ട് ചെയ്യപ്പെട്ടിട്ടുണ്ട്.
139 dead as refugee boat sinks off Djibouti coast; 84 missing, search continues.
