ഒഹായോ: ഡെമോക്രാറ്റിക് പാർട്ടിയുടെ ഗവർണർ സ്ഥാനാർഥി ആമി ആക്ടണിന് നേരെ പാഞ്ഞടുത്ത ആയുധധാരിയെ പൊലീസ് അറസ്റ്റ് ചെയ്തു. ഞായറാഴ്ച കാൻഫീൽഡ് ഫെയറിൽ തിരഞ്ഞെടുപ്പ് പ്രചാരണത്തിനിടെയായിരുന്നു സംഭവം. ആക്രമണത്തിൽ നിരവധി പേർക്ക് പരിക്കേറ്റതായി പ്രചാരണസംഘം അറിയിച്ചു. ആക്ടണിന് പരിക്കില്ല. കാൻഫീൽഡ് സ്വദേശിയായ പാട്രിക് ഹാവസ് (38) ആണ് അറസ്റ്റിലായത്. മൊബൈൽ ഫോൺ ഉയർത്തിപ്പിടിച്ച് ജനക്കൂട്ടത്തെ തള്ളിമാറ്റി ആക്ടണിന്റെ ദിശയിലേക്ക് ഇയാൾ അതിവേഗം നീങ്ങിയതായി മഹോണിങ് കൗണ്ടി ഷെരിഫ് ജെറി ഗ്രീൻ പറഞ്ഞു. പാഞ്ഞടുക്കുന്നതിനിടെ മൊബിലിറ്റി സ്കൂട്ടറിൽ ഉണ്ടായിരുന്ന രണ്ട് വയോധികരെ ഇയാൾ ഇടിച്ചുവീഴ്ത്തി. ഇതിൽ ഒരാൾ നിലത്ത് വീണതായും ഷെരിഫ് പറഞ്ഞു.
ആക്ടണിന്റെ സുരക്ഷാ ഉദ്യോഗസ്ഥർ ഇയാളെ തടഞ്ഞുനിർത്തി കസ്റ്റഡിയിലെടുത്ത ശേഷം പൊലീസ് എത്തി അറസ്റ്റ് ചെയ്തു. ഹാവസിന്റെ കൈവശം രണ്ട് പിസ്റ്റളുകളും ബ്രാസ് നക്കിൾസും ഉണ്ടായിരുന്നുവെന്ന് പൊലീസ് അറിയിച്ചു. ഇവയെല്ലാം ഒഹായോയിൽ നിയമപരമായി കൈവശം വയ്ക്കാവുന്നവയാണെന്നും അധികൃതർ വ്യക്തമാക്കി.ഹാവസിനെ മഹോണിങ് കൗണ്ടി ജയിലിൽ പാർപ്പിച്ചിരിക്കുകയാണ്. രണ്ട് സാധാരണ ആക്രമണക്കേസുകളും ഒരു പൊതുശല്യക്കേസുമാണ് ഇയാൾക്കെതിരെ ചുമത്തിയിരിക്കുന്നത്.
ഡെമോക്രാറ്റിക് പാർട്ടിയുടെ പ്രചാരണ ടെന്റിന് സമീപം പ്രതിഷേധക്കാർ തടിച്ചുകൂടിയിരുന്നെന്നും അവരിൽ ഒരാൾ ജനക്കൂട്ടത്തെ തള്ളിമാറ്റി ആക്ടണിന്റെ ദിശയിലേക്ക് പാഞ്ഞുകയറുകയായിരുന്നെന്നും ഒഹായോയുടെ 59-ാം സ്റ്റേറ്റ് ഹൗസ് ഡിസ്ട്രിക്ടിലെ ഡെമോക്രാറ്റിക് സ്ഥാനാർഥി വെയ്ൻ പെന്നി ജൂനിയർ പറഞ്ഞു. സംഭവത്തിനിടെ പാർട്ടി സന്നദ്ധപ്രവർത്തകരെയും ഇയാൾ തള്ളിവീഴ്ത്തിയതായി മഹോണിങ് കൗണ്ടി ഡെമോക്രാറ്റിക് പാർട്ടി ചെയർമാൻ ക്രിസ് ആൻഡേഴ്സൺ പറഞ്ഞു. പാർക്കിൻസൺസ് രോഗബാധിതനായ ഒരു വയോധികനെ ഇയാൾ തള്ളിയതിനെ തുടർന്ന് അദ്ദേഹം നിലത്തുവീണ് തലയ്ക്ക് പരിക്കേറ്റതായും പെന്നി പറഞ്ഞു.
റിപ്പബ്ലിക്കൻ സ്ഥാനാർഥി വിവേക് രാമസ്വാമിയാണ് ആക്ടണിന്റെ എതിരാളി. പ്രസിഡന്റ് ഡൊണാൾഡ് ട്രംപുമായുള്ള അടുത്ത ബന്ധവും ടെക് മേഖലയിൽ നിന്നുള്ള പിന്തുണയും ദേശീയതലത്തിലെ പരിചിതമായ മുഖമെന്ന നിലയിലുള്ള നേട്ടവും ഉപയോഗിച്ച് രാമസ്വാമി വൻതോതിൽ തിരഞ്ഞെടുപ്പ് ഫണ്ട് സമാഹരിച്ചിട്ടുണ്ട്. നവംബർ തിരഞ്ഞെടുപ്പിന് മുന്നോടിയായി ആക്ടണിനെതിരെ പ്രചാരണ റാലികളിലൂടെയും പരസ്യങ്ങളിലൂടെയും അദ്ദേഹം വിമർശനം ശക്തമാക്കുകയാണ്. സംഭവത്തെ രാമസ്വാമി അപലപിച്ചു.
“ഭീഷണികളെയോ അക്രമത്തെയോ ഭയപ്പെടാതെ സ്ഥാനാർഥികൾക്ക് വോട്ടർമാരെ കാണാൻ കഴിയണം. ഇന്ന് നടന്നത് പൂർണമായും അംഗീകരിക്കാനാകാത്തതാണ്. രാഷ്ട്രീയത്തിൽ ഇത്തരം സംഭവങ്ങൾക്ക് സ്ഥാനമില്ല,” രാമസ്വാമിയുടെ കമ്മ്യൂണിക്കേഷൻസ് ഡയറക്ടർ കോന്നി ലക്ക് പറഞ്ഞു. ആക്ടണിന് പരിക്കേൽക്കാത്തതിൽ സന്തോഷമുണ്ടെന്നും പരിക്കേറ്റവർക്കായി ആശംസകൾ നേരുന്നതായും ഒഹായോ ഗവർണർ മൈക്ക് ഡിവൈൻ പറഞ്ഞു. ഇന്ന് ഉച്ചയ്ക്ക് ഡോ. ആക്ടണുമായി സംസാരിച്ചു. താൻ സുഖമായിരിക്കുന്നുവെന്ന് ഒഹായോയിലെ ജനങ്ങളെ അറിയിക്കണമെന്ന് അവർ പറഞ്ഞു. രാഷ്ട്രീയമോ പൊതുപരിപാടികളിലോ നടക്കുന്ന അക്രമവും അക്രമത്തിന്റെ ഭീഷണിയും ഒരിക്കലും അംഗീകരിക്കാനാകില്ലെന്നും അദ്ദേഹം കൂട്ടിച്ചേർത്തു.
Armed man arrested after charging toward Democratic Ohio governor candidate Amy Acton at fair
