ന്യൂയോർക്ക്: ലോകപ്രശസ്തമായ ന്യൂയോർക്കിലെ എംപയർ സ്റ്റേറ്റ് ബിൽഡിങ്ങിൻ്റെ ഏറ്റവും മുകളിൽ അനധികൃതമായി അതിക്രമിച്ചുകയറി വിവാഹനിശ്ചയം നടത്തിയ റഷ്യൻ ദമ്പതികളെ ന്യൂയോർക്ക് പൊലീസ് കസ്റ്റഡിയിലെടുത്തു. റഷ്യൻ സ്വദേശികളായ ആഞ്ചല നിക്കോളാവു (33), ഇവാൻ ബീർക്കസ് (32) എന്നിവരാണ് പിടിയിലായത്.
1,454 അടി (443 മീറ്റർ) ഉയരമുള്ള കെട്ടിടത്തിൻ്റെ ഏറ്റവും മുകളിലെ ടെലികമ്മ്യൂണിക്കേഷൻ ആൻ്റിനയിലാണ് ഇവർ കയറിയത്. അവിടെയെത്തിയ ശേഷം “അധികാരത്തോടുള്ള സ്നേഹത്തെക്കാൾ സ്നേഹത്തിൻ്റെ ശക്തി ജയിക്കുമ്പോൾ ലോകത്ത് സമാധാനമുണ്ടാകും” എന്നെഴുതിയ വലിയൊരു ബാനർ ഇവർ ഉയർത്തി. തുടർന്ന് ഇവാൻ മുകളിൽ വെച്ച് ആഞ്ചലയ്ക്ക് മോതിരം സമ്മാനിക്കുകയും വിവാഹാഭ്യർത്ഥന നടത്തുകയുമായിരുന്നു. പത്ത് മിനിറ്റോളം ഇവർ കെട്ടിടത്തിൻ്റെ മുകളിൽ ചെലവഴിച്ചു. കെട്ടിടത്തിൻ്റെ 103-ാം നിലയിലെ വാട്ടർ ടവർ അറ്റകുറ്റപ്പണികൾക്കായി ഉപയോഗിക്കുന്ന ഒരു ചെറിയ ഹാച്ച് വഴിയാണ് ഇരുവരും മുകളിലേക്ക് കടന്നതെന്ന് പൊലീസ് വ്യക്തമാക്കി. പൊതുജനങ്ങൾക്ക് പ്രവേശനമില്ലാത്ത ഈ ഭാഗത്തുനിന്നും ഇവർ എങ്ങനെ മുകളിലെത്തി എന്നത് വ്യക്തമല്ല.
താഴേക്ക് ഇറങ്ങിയ ഉടൻ തന്നെ ഇവരെ ന്യൂയോർക്ക് പൊലീസ് അറസ്റ്റ് ചെയ്തു. അതിക്രമിച്ചു കടക്കൽ, ജീവന് ഭീഷണിയാകുംവിധം പ്രവർത്തിക്കൽ, പൊതുമുതൽ നശിപ്പിക്കൽ തുടങ്ങിയ ഗുരുതരമായ കുറ്റങ്ങളാണ് ഇവർക്കെതിരെ ചുമത്തിയിരിക്കുന്നത്.
സുരക്ഷാ മാനദണ്ഡങ്ങൾ ലംഘിച്ച് ലോകമെമ്പാടുമുള്ള വൻകിട കെട്ടിടങ്ങളിൽ കയറി പ്രശസ്തരായ ഇരുവരും നെറ്റ്ഫ്ലിക്സിൻ്റെ ‘Skywalkers: A Love Story’ (2024) എന്ന പ്രശസ്തമായ ഡോക്യുമെൻ്ററിയിലെ താരങ്ങളാണ്. ഈ അനധികൃത കയറ്റം കെട്ടിടത്തിലെ മറ്റ് സന്ദർശകർക്കോ താമസക്കാർക്കോ യാതൊരുവിധ അപകടവും ഉണ്ടാക്കിയിട്ടില്ലെന്ന് എംപയർ സ്റ്റേറ്റ് ബിൽഡിങ് അധികൃതർ അറിയിച്ചു.
Couple gets engaged by climbing atop the Empire State Building in New York; crosses the line of adventure; eventually taken into police custody
