ഒക്ലഹോമ സിറ്റി: അമേരിക്കയിലെ ഒക്ലഹോമ സംസ്ഥാനത്ത് നടന്ന ഗവർണർ തിരഞ്ഞെടുപ്പിൽ റിപ്പബ്ലിക്കൻ പാർട്ടിയുടെ മേക്ക് മേസിയ്ക്ക് ഉജ്ജ്വല വിജയം. ഡെമോക്രാറ്റിക് പാർട്ടിയുടെ ശക്തയായ സ്ഥാനാർത്ഥിയും ഒക്ലഹോമ ഹൗസിലെ ഡെമോക്രാറ്റിക് ലീഡറുമായ സിൻഡി മുൻസണെ പരാജയപ്പെടുത്തിയാണ് മുൻ സ്റ്റേറ്റ് സെനറ്റർ കൂടിയായ മേക്ക് മേസി ഒക്ലഹോമയുടെ പുതിയ ഗവർണറാകുന്നത്. കാലാവധി പൂർത്തിയാക്കി പടിയിറങ്ങുന്ന റിപ്പബ്ലിക്കൻ ഗവർണർ കെവിൻ സ്റ്റിറ്റിന്റെ പിൻഗാമിയായാണ് മേസി അധികാരമേൽക്കുക. ഇതോടെ സംസ്ഥാനത്തെ ഭരണം റിപ്പബ്ലിക്കൻ പാർട്ടിയുടെ കൈകളിൽ തന്നെ ഭദ്രമായി തുടരും.
ആകെ വോട്ടുകളുടെ പകുതിയിലധികം എണ്ണിക്കഴിഞ്ഞപ്പോൾ തന്നെ 55 ശതമാനത്തോളം വോട്ടുകൾ നേടി മേസി വ്യക്തമായ ഭൂരിപക്ഷം ഉറപ്പാക്കിയിരുന്നു. ഒക്ലഹോമ ഗവർണർ കെവിൻ സ്റ്റിറ്റിന്റെ കീഴിൽ സംസ്ഥാന ബജറ്റ് സെക്രട്ടറിയായി സേവനമനുഷ്ഠിച്ചിട്ടുള്ള മാസെയുടെ ഭരണപരിചയം തിരഞ്ഞെടുപ്പിൽ നിർണായകമായി.
നേരത്തെ ഓഗസ്റ്റിൽ നടന്ന റിപ്പബ്ലിക്കൻ പാർട്ടിയുടെ ആഭ്യന്തര സ്ഥാനാർത്ഥി നിർണ്ണയത്തിൽ (പ്രൈമറി റൺഓഫ്) ഒക്ലഹോമ അറ്റോർണി ജനറൽ ജെന്റ്നർ ഡ്രമ്മണ്ടിനെ നേരിയ വ്യത്യാസത്തിൽ പരാജയപ്പെടുത്തിയാണ് മേസി പാർട്ടി ടിക്കറ്റ് ഉറപ്പിച്ചത്. അന്ന് മുതൽ മാസെയ്ക്ക് ഡൊണാൾഡ് ട്രംപിന്റെ ശക്തമായ പിന്തുണയുണ്ടായിരുന്നു. തിരഞ്ഞെടുപ്പ് പ്രചാരണത്തിന്റെ ഭാഗമായി ഒക്ടോബറിൽ ട്രംപ് ഒക്ലഹോമയിൽ നേരിട്ടെത്തി റിപ്പബ്ലിക്കൻ അണികളെ മേസിക്ക് അനുകൂലമായി അണിനിരത്തിയതും വിജയത്തിൽ വലിയ പങ്കുവഹിച്ചു.
ഒരു പ്രൊഫഷണൽ ഫിനാൻഷ്യൽ പ്ലാനർ കൂടിയായ മേസി തന്റെ തിരഞ്ഞെടുപ്പ് പ്രചാരണത്തിൽ പ്രധാനമായും ഉയർത്തിക്കാട്ടിയത് നികുതി വെട്ടിക്കുറയ്ക്കുമെന്ന വാഗ്ദാനമാണ്. മുതിർന്ന പൗരന്മാർക്കും സൈനിക സേവനത്തിൽ നിന്ന് വിരമിച്ചവർക്കും വസ്തു നികുതി പൂർണ്ണമായും ഒഴിവാക്കുക, വരുമാന നികുതി കുറയ്ക്കുക, ഫെഡറൽ ചെലവുകൾ വെട്ടിച്ചുറയ്ക്കുക എന്നിവയായിരുന്നു അദ്ദേഹത്തിന്റെ പ്രധാന പ്രഖ്യാപനങ്ങൾ. കൂടാതെ, പൊതുവിദ്യാഭ്യാസം മെച്ചപ്പെടുത്തുമെന്നും വിദേശികൾ ഒക്ലഹോമയിൽ ഭൂമി വാങ്ങുന്നത് നിയന്ത്രിക്കുമെന്നും അദ്ദേഹം വോട്ടർമാർക്ക് ഉറപ്പുനൽകി.
ജനങ്ങളുടെ ജീവിതച്ചെലവ് കുറയ്ക്കുക, ആരോഗ്യ പരിരക്ഷ ഉറപ്പാക്കുക, പൊതുവിദ്യാഭ്യാസം മെച്ചപ്പെടുത്തുക എന്നീ മുദ്രാവാക്യങ്ങൾ ഉയർത്തിയാണ് ഡെമോക്രാറ്റിക് സ്ഥാനാർത്ഥി സിൻഡി മുൻസൺ മത്സരരംഗത്തുണ്ടായിരുന്നത്. മേസിയുടെ നികുതിയിളവ് പ്രഖ്യാപനങ്ങളെ അവർ ശക്തമായി എതിർത്തിരുന്നു. വരുമാന നികുതി വീണ്ടും കുറയ്ക്കുന്നത് സമ്പന്നർക്ക് മാത്രമേ ഗുണം ചെയ്യൂ എന്നും, വസ്തു നികുതി വൻതോതിൽ കുറയ്ക്കുന്നത് കൗണ്ടി സർവീസുകളെയും പൊതുവിദ്യാലയങ്ങൾക്കുള്ള ഫണ്ടിനെയും ദോഷകരമായി ബാധിക്കുമെന്നുമുള്ള മുൻസണിന്റെ വാദങ്ങൾ പക്ഷെ വോട്ടർമാർക്കിടയിൽ പൂർണ്ണമായി ഫലിച്ചില്ലെന്നാണ് തിരഞ്ഞെടുപ്പ് ഫലം സൂചിപ്പിക്കുന്നത്.
Republican dominance in Oklahoma; Trump-backed Mike Mazzei to become governor.
