ന്യൂയോർക്ക്: ലോക സാമ്പത്തിക ചരിത്രത്തിലെ സമാനതകളില്ലാത്ത നേട്ടവുമായി ശതകോടീശ്വരൻ ഇലോൺ മസ്ക് ലോകത്തിലെ ആദ്യത്തെ ‘ട്രില്യണയർ’ പദവിയിലേക്ക്. മസ്കിന്റെ ബഹിരാകാശ-കൃത്രിമബുദ്ധി കമ്പനിയായ ‘സ്പേസ് എക്സ്’ (SpaceX) വെള്ളിയാഴ്ച അമേരിക്കൻ ഓഹരി വിപണിയായ നാസ്ഡാകിൽ ലിസ്റ്റ് ചെയ്തതോടെയാണ് ഈ ചരിത്ര നേട്ടം കൈവരിച്ചത്. മാനവ ചരിത്രത്തിൽ ഇന്നേവരെ ഒരു വ്യക്തിയും സ്വന്തമാക്കാത്ത അത്രയും വലിയ സമ്പത്താണ് ഇതോടെ ഇലോൺ മസ്കിന്റെ പേരിൽ രേഖപ്പെടുത്തപ്പെടുന്നത്. ടെസ്ല കമ്പനിയുടെ സി.ഇ.ഒ എന്ന നിലയിൽ നിലവിൽ 270 ബില്യൺ ഡോളറിന്റെ ഓഹരികളും ഓപ്ഷനുകളും മസ്കിനുണ്ട്.
ഇതിന് പുറമെയാണ് പുതിയ ഐ.പി.ഒ വഴി സ്പേസ് എക്സിന്റെ മൂല്യം 1.77 ട്രില്യൺ ഡോളറായി ഉയർന്നത്. കമ്പനിയുടെ പകുതിയോളം ഓഹരികളും മസ്കിന്റെ പക്കലായതിനാൽ, ഇതിലൂടെ മാത്രം അദ്ദേഹത്തിന്റെ ആസ്തിയിലേക്ക് 841 ബില്യൺ ഡോളർ കൂടി കൂട്ടിച്ചേർക്കപ്പെട്ടു. ഇതോടെ മസ്കിന്റെ ആകെ ആസ്തി 1.11 ട്രില്യൺ ഡോളർ (ഏകദേശം 93 ലക്ഷം കോടിയിലധികം ഇന്ത്യൻ രൂപ) ആയി ഉയർന്നു. ബാങ്ക് അക്കൗണ്ടിലെ പണമല്ല, വിപണിയിലെ മൂല്യം. എന്നാൽ ഇലോൺ മസ്കിന്റെ ഈ വൻ സമ്പത്ത് എന്നത് ബാങ്കിൽ സൂക്ഷിച്ചിരിക്കുന്ന പണമല്ല, മറിച്ച് ‘പേപ്പർ വെൽത്ത്’ അഥവാ ഓഹരി വിപണിയിലെ മൂല്യമാണ്. ഭാവിയിൽ നിക്ഷേപകർ ടെസ്ല, സ്പേസ് എക്സ് എന്നീ കമ്പനികളെ എങ്ങനെ വിലയിരുത്തുന്നു എന്നതിനെ ആശ്രയിച്ചായിരിക്കും ഈ ആസ്തിയുടെ ഉയർച്ചയും താഴ്ചയും.
എന്താണ് ഒരു ട്രില്യൺ ഡോളർ?
ഒരു ലക്ഷം കോടി ഡോളർ ചേരുന്നതാണ് ഒരു ട്രില്യൺ ഡോളർ. ഇത് ഒരു മനുഷ്യായുസ്സ് കൊണ്ട് സാധാരണ രീതിയിൽ ചിലവഴിച്ചു തീർക്കുക അസാധ്യമാണ്. ഉദാഹരണത്തിന്, ഒരാൾ ഓരോ മണിക്കൂറിലും 10 ലക്ഷം ഡോളർ (ഏകദേശം 8.3 കോടി രൂപ) വീതം ദിവസവും രാത്രിയെന്നോ പകലെന്നോ ഇല്ലാതെ ചിലവഴിച്ചാൽ പോലും, ഒരു ട്രില്യൺ ഡോളർ തീർക്കാൻ ഒരു നൂറ്റാണ്ടിലധികം (100 വർഷത്തിലേറെ) സമയമെടുക്കും!സ്പേസ് എക്സ്, എക്സ് (പഴയ ട്വിറ്റർ), എക്സ്.എ.ഐ (xAI) എന്നിവയെല്ലാം ഉൾപ്പെടുന്ന വലിയൊരു സാമ്രാജ്യത്തിന്റെ അധിപനായ മസ്കിന്റെ ഈ വമ്പൻ ആസ്തിയുമായി താരതമ്യം ചെയ്യുമ്പോൾ, ലോകത്തിലെ പല പ്രമുഖ കമ്പനികളും സമ്പദ്വ്യവസ്ഥകളും ഉടൻ തന്നെ മൂല്യത്തിൽ ഇലോൺ മസ്കിന് പിന്നിലാകും എന്നാണ് സാമ്പത്തിക വിദഗ്ധർ വിലയിരുത്തുന്നത്.
