ഭൂമധ്യരേഖാ പസഫിക് സമുദ്രത്തിൽ നിലവിൽ എൽ നിനോ സാഹചര്യങ്ങൾ നിലനിൽക്കുന്നതായി കാലാവസ്ഥാ ബുള്ളറ്റിൻ. വരുന്ന തെക്കുപടിഞ്ഞാറൻ മൺസൂൺ അഥവാ കാലവർഷ സമയത്ത് ഈ പ്രതിഭാസം കൂടുതൽ ശക്തിപ്പെടാൻ സാധ്യതയുണ്ടെന്നാണ് വിലയിരുത്തൽ. പസഫിക് സമുദ്രോപരിതലത്തിലെ താപവർധനവിനോട് അന്തരീക്ഷം ഇതിനകം തന്നെ പ്രതികരിച്ചു കഴിഞ്ഞിട്ടുള്ളതിനാൽ സമുദ്ര-അന്തരീക്ഷ വ്യവസ്ഥകൾ ഇപ്പോൾ വ്യക്തമായ എൽ നിനോ സ്വഭാവം പ്രകടിപ്പിച്ചു തുടങ്ങിയിട്ടുണ്ട്.
കഴിഞ്ഞ ജൂൺ മാസത്തോടെ പസഫിക് സമുദ്രത്തിലെ താപനില എൽ നിനോ പരിധിയെ മറികടന്നിരുന്നു. ഏപ്രിൽ, മെയ്, ജൂൺ മാസങ്ങളിലെ മൂന്ന് മാസത്തെ ശരാശരി താപനില വ്യതിയാനം പരിശോധിക്കുമ്പോൾ ഇത് എൽ നിനോ പരിധിയായ 0.5 ഡിഗ്രി സെൽഷ്യസിന് മുകളിലെത്തിയതായി രേഖപ്പെടുത്തിയിട്ടുണ്ട്. വരാനിരിക്കുന്ന കാലവർഷ സീസണിൽ മിതമായതോ അല്ലെങ്കിൽ ശക്തമായതോ ആയ എൽ നിനോ പ്രതിഭാസത്തിനാണ് സാധ്യത കൽപ്പിക്കപ്പെടുന്നത്.
അതേസമയം, ഇന്ത്യൻ മഹാസമുദ്രത്തിലെ താപനില വ്യതിയാനവുമായി ബന്ധപ്പെട്ട ഇന്ത്യൻ ഓഷ്യൻ ഡൈപോൾ നിലവിൽ സാധാരണ നിലയിലാണുള്ളത്. സമുദ്രത്തിൽ ഇപ്പോൾ ‘ന്യൂട്രൽ ഐ.ഒ.ഡി.’ സാഹചര്യമാണ് നിലനിൽക്കുന്നത്. ഈ വർഷത്തെ കാലവർഷം അവസാനിക്കുന്നത് വരെ ഇന്ത്യൻ മഹാസമുദ്രത്തിൽ ഇതേ സാധാരണ അവസ്ഥ തന്നെ തുടരാനാണ് സാധ്യതയെന്ന് മൺസൂൺ മിഷൻ കപ്പിൾഡ് ഫോർകാസ്റ്റ് സിസ്റ്റം വ്യക്തമാക്കുന്നു.
ENSO Bulletin Predicts Moderate to Strong El Nino Conditions in Pacific During Monsoon Season
