ലൂസിയാന: അമേരിക്കയിലെ ലൂസിയാനയിലുള്ള ഷ്രെവ്പോർട്ടിൽ നടന്ന വെടിവെപ്പിൽ എട്ട് കുട്ടികൾ കൊല്ലപ്പെട്ടു. ഒന്നു മുതൽ പതിനാല് വയസ്സുവരെ പ്രായമുള്ള കുട്ടികളാണ് അതിദാരുണമായി കൊല്ലപ്പെട്ടത്. ഞായറാഴ്ച പുലർച്ചെ അഞ്ചരയോടെ ഉണ്ടായ ഒരു കുടുംബ വഴക്കാണ് വലിയ കൂട്ടക്കൊലയിൽ കലാശിച്ചതെന്ന് പ്രാദേശിക പൊലീസ് അറിയിച്ചു.
ഷമർ എൽക്കിൻസ് എന്നയാളാണ് അക്രമി എന്ന് തിരിച്ചറിഞ്ഞിട്ടുണ്ട്. പത്ത് പേർക്ക് നേരെ വെടിയുതിർത്ത ശേഷം ഇയാൾ ഒരു കാർ തട്ടിയെടുത്ത് രക്ഷപ്പെടാൻ ശ്രമിക്കുകയായിരുന്നു. പൊലീസ് നടത്തിയ പിന്തുടരലിനൊടുവിൽ അയൽപ്രദേശമായ ബോസിയർ പാരിഷിൽ വെച്ച് ഇയാൾ പൊലീസിൻ്റെ വെടിയേറ്റ് കൊല്ലപ്പെട്ടു. ഇയാൾ ഒറ്റയ്ക്കാണ് ഈ ആക്രമണം നടത്തിയതെന്നാണ് പ്രാഥമിക നിഗമനം.
കൊല്ലപ്പെട്ട എട്ട് പേരും പ്രായപൂർത്തിയാകാത്ത കുട്ടികളാണെന്നത് സംഭവത്തിൻ്റെ വ്യാപ്തി വർദ്ധിപ്പിക്കുന്നു. ഇവരിൽ പലരും അക്രമിയുമായി അടുത്ത ബന്ധമുള്ളവരാണെന്ന് പൊലീസ് സ്ഥിരീകരിച്ചിട്ടുണ്ട്. പരുക്കേറ്റ മറ്റു രണ്ടുപേരെ ഉടൻ തന്നെ ആശുപത്രിയിൽ പ്രവേശിപ്പിച്ചു. മൂന്ന് വ്യത്യസ്ത വീടുകളിലായാണ് ഈ ക്രൂരകൃത്യം നടന്നതെന്ന് പൊലീസ് പറഞ്ഞു.
ഷ്രെവ്പോർട്ട് നഗരത്തിൻ്റെ ചരിത്രത്തിലെ ഏറ്റവും ദാരുണമായ സംഭവമാണിതെന്ന് മേയർ ടോം ആഴ്സനോ പ്രതികരിച്ചു. തകർന്ന കുടുംബങ്ങളെയും പൊലീസുകാരെയും നഗരത്തെയും ഈ ദുരന്തം ഒരുപോലെ ബാധിച്ചിട്ടുണ്ടെന്നും കൊല്ലപ്പെട്ടവർക്കായി പ്രാർത്ഥിക്കുന്നുവെന്നും അദ്ദേഹം കൂട്ടിച്ചേർത്തു. ലൂസിയാന ഗവർണർ ജെഫ് ലാൻഡ്രിയും സംഭവത്തിൽ അനുശോചനം രേഖപ്പെടുത്തി.
നഗരത്തിലെ കുറ്റകൃത്യങ്ങളിൽ വലിയൊരു ഭാഗം കുടുംബ വഴക്കുകളുമായി ബന്ധപ്പെട്ടതാണെന്ന് സിറ്റി കൗൺസിൽ അംഗമായ ഗ്രേസൺ ബൗച്ചർ ചൂണ്ടിക്കാട്ടി. ഈ ഒറ്റ സംഭവത്തോടെ നഗരത്തിലെ കൊലപാതക നിരക്ക് ഇരട്ടിയായതായി അദ്ദേഹം പറഞ്ഞു. ഗാർഹിക പീഡനങ്ങളും കുടുംബ പ്രശ്നങ്ങളും എത്രത്തോളം ഭീകരമായ അവസ്ഥയിലേക്ക് നീങ്ങാം എന്നതിൻ്റെ തെളിവാണ് ഈ സംഭവമെന്ന് അദ്ദേഹം മുന്നറിയിപ്പ് നൽകി.
ലൂസിയാന സ്റ്റേറ്റ് പൊലീസിൻ്റെ സഹകരണത്തോടെയാണ് നിലവിൽ അന്വേഷണം പുരോഗമിക്കുന്നത്. കൃത്യമായ കാരണങ്ങൾ കണ്ടെത്താൻ സമയമെടുക്കുമെങ്കിലും നീതി ഉറപ്പാക്കുമെന്ന് പൊലീസ് ചീഫ് വെയ്ൻ സ്മിത്ത് അറിയിച്ചു. യുഎസ് ഹൗസ് സ്പീക്കർ മൈക്ക് ജോൺസൺ ഉൾപ്പെടെയുള്ള പ്രമുഖർ സംഭവത്തെ അപലപിക്കുകയും ദുഖിതർക്ക് പിന്തുണ അറിയിക്കുകയും ചെയ്തു.
Family feud ends in massacre; Eight people, including toddlers, killed in Louisiana, attacker killed by police
