ടൈഗർ ഷ്റോഫിന് നേരെ വെടിവെയ്പ്പ്, താരം സുരക്ഷിതൻ, ഡ്രൈവർക്കടക്കം പരിക്ക്; പിന്നിൽ ലോറൻസ് ബിഷ്ണോയി ഗ്യാങ്ങ്, സൽമാനൊപ്പമുള്ളവരെ അവസാനിപ്പിക്കുമെന്ന് ഭീഷണി

മുംബൈ ജുഹുവിൽ ബോളിവുഡ് താരം ടൈഗർ ഷ്റോഫിന് നേരെ അക്രമികളുടെ വെടിവെയ്പ്പ്. താരം സഞ്ചരിച്ച കാറിന് നേരെ ബൈക്കിലെത്തിയ മൂന്നംഗ സംഘമാണ് വെടിയുതിർത്തത്. ഈ ആക്രമണത്തിൽ താരത്തിന്റെ ഡ്രൈവർക്കും സമീപത്തുണ്ടായിരുന്ന ഒരു ഓട്ടോറിക്ഷ ഡ്രൈവർക്കും പരിക്കേറ്റു. എന്നാൽ ഭാഗ്യവശാൽ ടൈഗർ ഷ്റോഫ് പരിക്കുകൾ ഒന്നുമേൽക്കാതെ സുരക്ഷിതമായി രക്ഷപ്പെടുകയായിരുന്നു. വെടിവെയ്പ്പിന് പിന്നിലെ കാരണം വ്യക്തമല്ലെങ്കിലും സംഭവത്തിൽ മുംബൈ പൊലീസ് അന്വേഷണം ഊർജിതമാക്കിയിട്ടുണ്ട്.

ആക്രമണത്തിന്റെ ഉത്തരവാദിത്തം കുപ്രസിദ്ധ കുറ്റവാളി ലോറൻസ് ബിഷ്ണോയിയുടെ ഗ്യാങ് ഏറ്റെടുത്തിട്ടുണ്ട്. ടൈഗർ ഷ്റോഫ് മുന്നറിയിപ്പ് അവഗണിച്ചെന്നാണ് ബിഷ്ണോയ് ഗ്യാങ് പറയുന്നത്. സൽമാൻ ഖാനൊപ്പം പ്രവർത്തിക്കുന്നവരെ അവസാനിപ്പിക്കുമെന്നാണ് നിലപാട്. ഇത് ആദ്യത്തെയും അവസാനത്തെയും മുന്നറിയിപ്പെന്നും ബിഷ്ണോയ് ഗ്യാങ് കൂട്ടിച്ചേർത്തു. ബോളിവുഡ് താരങ്ങളെ ലക്ഷ്യമിട്ട് മുംബൈയിൽ തുടർച്ചയായി നടക്കുന്ന ഇത്തരം ആക്രമണങ്ങൾ നഗരത്തിൽ വലിയ സുരക്ഷാ ആശങ്കകളാണ് സൃഷ്ടിച്ചിരിക്കുന്നത്. സംഭവസ്ഥലത്ത് പോലീസ് പരിശോധന കർശനമാക്കിയിട്ടുണ്ട്.

അതേസമയം, ടൈഗർ ഷ്റോഫിന് നേരെ ഉണ്ടായ ആക്രമണത്തിന് പിന്നാലെ പൊലീസിനെയും ആഭ്യന്തര വകുപ്പിന്റെ ചുമതലയുള്ള മുഖ്യമന്ത്രി ദേവേന്ദ്ര ഫഡ്‌നാവിസിനെയും രൂക്ഷമായി വിമർശിച്ച് കോൺഗ്രസ് രംഗത്തെത്തി. മുംബൈയിലെ ക്രമസമാധാന നില പൂർണ്ണമായും തകർന്നിരിക്കുകയാണെന്നും, ബാബ സിദ്ദിഖിയുടെ കൊലപാതകവും സൽമാൻ ഖാന്റെ വീടിന് നേരെയുണ്ടായ വെടിവെയ്പ്പും അടക്കം ചൂണ്ടിക്കാട്ടി സർക്കാർ പൂർണ്ണ പരാജയമാണെന്ന് എ.ഐ.സി.സി സെക്രട്ടറി സചിൻ സാവന്ത് പ്രസ്താവനയിലൂടെ ആരോപിച്ചു.

Firing at Bollywood Actor Tiger Shroff in Mumbai: Driver and Auto Driver Injured; Congress Slams State Government Over Law and Order