ഡെമോക്രാറ്റിക് സഭയും റിപ്പബ്ലിക്കൻ പ്രസിഡന്റും ‘വീറ്റോ’ പോരിലേക്കോ ? തിരഞ്ഞെടുപ്പ് ആവേശത്തിന് പിന്നാലെ കടുത്ത യാഥാർത്ഥ്യങ്ങളിലേക്ക് യുഎസ് രാഷ്ട്രീയം ; നിയമനിർമ്മാണം പ്രതിസന്ധിയിലാകാൻ സാധ്യത

വാഷിംഗ്ടൺ: യുഎസ് കോൺഗ്രസ് തിരഞ്ഞെടുപ്പിൽ ചരിത്രവിജയം നേടി ഡെമോക്രാറ്റിക് പാർട്ടി ഇരുസഭകളുടെയും നിയന്ത്രണം പിടിച്ചെടുത്തതോടെ അമേരിക്കയിലെ രാഷ്ട്രീയ സമവാക്യം മാറിമറിഞ്ഞു. തിരഞ്ഞെടുപ്പ് രാത്രി ഡെമോക്രാറ്റുകൾക്ക് വലിയ ആവേശമാണ് സമ്മാനിച്ചതെങ്കിലും, വരാനിരിക്കുന്ന ജനുവരി മാസം മുതൽ പാർട്ടിക്ക് മുന്നിൽ കടുത്ത യാഥാർത്ഥ്യങ്ങളുടെയും വെല്ലുവിളികളുടെയും നാളുകളായിരിക്കുമെന്നാണ് രാഷ്ട്രീയ നിരീക്ഷകർ വിലയിരുത്തുന്നത്.

100 അംഗ സെനറ്റിൽ പാർട്ടിയുടെ ആകെ അംഗസംഖ്യ ഇപ്പോൾ 54 ആയി ഉയർന്നു, കൂടാതെ രണ്ട് സീറ്റുകളിൽ കൂടി പാർട്ടി ലീഡ് ചെയ്യുന്നുമുണ്ട്. ജനപ്രതിനിധി സഭയും പാർട്ടി സ്വന്തമാക്കി. 435 അംഗ ജനപ്രതിനിധി സഭയിൽ ഭൂരിപക്ഷത്തിന് വേണ്ടത് 218 സീറ്റുകളാണ്. 228 സീറ്റുകൾ ഇതിനോടകം ഡെമോക്രാറ്റിക് പാർട്ടി നേടിക്കഴിഞ്ഞു. 35 സീറ്റുകളിൽ ലീഡ് ചെയ്യുന്നു. 139 സീറ്റുകളാണ് റിപ്പബ്ലിക്കൻമാർ നേടിയത്. 33 സീറ്റുകളിൽ ലീഡ് ചെയ്യുന്നുണ്ട്. ബരാക് ഒബാമയുടെ രണ്ടാം കാലയളവിനുശേഷം, സിറ്റിങ് പ്രസിഡന്റിന് കോൺഗ്രസിന്റെ ഇരുസഭകളിലും ഭൂരിപക്ഷം ലഭിക്കാത്ത ആദ്യ സന്ദർഭമാണിത്. അന്തിമ ഫലം വന്നിട്ടില്ലെങ്കിലും ഇതിനോടകം തന്നെ സെനറ്റിലും ജനപ്രതിനിധി സഭയിലും ഡെമോക്രാറ്റിക് പാർട്ടി ഭൂരിപക്ഷം ഉറപ്പാക്കിയിട്ടുണ്ട്. യുഎസിൽ നിയമങ്ങൾ പാസാക്കുന്നതിനും സർക്കാർ ചെലവുകൾക്ക് അംഗീകാരം നൽകുന്നതിനുമാണ് ജനപ്രതിനിധി സഭയും സെനറ്റും സഹായിക്കുന്നത്. എന്നാൽ ഇവയിലൊന്നിനും ഒറ്റയ്ക്ക് പ്രവർത്തിക്കാൻ കഴിയില്ല. 

“ഇന്ന് അമേരിക്കയുടെ മഹത്തായ തിരിച്ചുവരവ് ആരംഭിക്കുന്നു,” എന്ന് ഭൂരിപക്ഷം ഉറപ്പാക്കിയ ശേഷം ഹൗസ് ഡെമോക്രാറ്റിക് ലീഡർ ഹക്കീം ജെഫ്രീസ് പ്രഖ്യാപിച്ചു. അഴിമതിക്കെതിരെയുള്ള അന്വേഷണം, ആരോഗ്യ സംരക്ഷണം, പലചരക്ക് സാധനങ്ങൾ, ഇന്ധനം എന്നിവയുടെ വിലക്കയറ്റം നിയന്ത്രിക്കൽ, ഇറാൻ യുദ്ധത്തിൽ നിന്നുള്ള പിൻവാങ്ങൽ തുടങ്ങിയ നിരവധി വാഗ്ദാനങ്ങളാണ് തിരഞ്ഞെടുപ്പ് പ്രചാരണ വേളയിൽ ഡെമോക്രാറ്റുകൾ ജനങ്ങൾക്ക് നൽകിയിരുന്നത്.

എന്നാൽ, ഭൂരിപക്ഷം ലഭിച്ചതുകൊണ്ട് മാത്രം നിയമനിർമ്മാണം എളുപ്പമാകില്ലെന്നാണ് സൂചന. കോൺഗ്രസ് ഡെമോക്രാറ്റുകളുടെ കൈയിലാണെങ്കിലും വൈറ്റ് ഹൗസിൽ റിപ്പബ്ലിക്കൻ പ്രസിഡന്റായ ഡോണൾഡ് ട്രംപ് തുടരുന്നത് ഡെമോക്രാറ്റിക് നീക്കങ്ങൾക്ക് വലിയ തടസ്സമാകും. ഈ വിജയത്തെ ഒരു ‘സമ്പൂർണ്ണ ജനവിധി’യായി കാണരുതെന്ന് മുതിർന്ന യുഎസ് സെനറ്റർ ക്രിസ് കൂൺസ് മുന്നറിയിപ്പ് നൽകി. ജനങ്ങളുടെ കുറഞ്ഞ വേതനത്തെയും വർദ്ധിച്ചുവരുന്ന ജീവിതച്ചെലവിനെയും കുറിച്ചുള്ള ആശങ്കകൾക്ക് കൃത്യമായ പരിഹാരം നൽകി തങ്ങൾക്ക് കാര്യങ്ങൾ ചെയ്യാൻ സാധിക്കുമെന്ന് തെളിയിക്കുകയാണ് പാർട്ടിയുടെ പ്രഥമ കർത്തവ്യമെന്നും അദ്ദേഹം ഓർമ്മിപ്പിച്ചു.

ഡെമോക്രാറ്റുകളുടെ പുതിയ അധികാരങ്ങൾ

ഇരുസഭകളിലും ഭൂരിപക്ഷം ലഭിച്ചതോടെ ട്രംപ് ഭരണകൂടത്തെ പ്രതിരോധത്തിലാക്കാൻ ഡെമോക്രാറ്റുകൾക്ക് സാധിക്കും. കാലിഫോർണിയയിൽ നിന്നുള്ള കോൺഗ്രസ് അംഗം റോബർട്ട് ഗാർഷ്യ ഹൗസിലെ ശക്തമായ മേൽനോട്ട സമിതിക്ക് നേതൃത്വം നൽകും. ട്രംപിന്റെ കുടുംബാംഗങ്ങൾക്കെതിരെയുള്ള ആരോപണങ്ങൾ, കോർപ്പറേറ്റ് അഴിമതി, ആഭ്യന്തര സുരക്ഷാ വകുപ്പിന്റെയും ഇമിഗ്രേഷൻ വിഭാഗത്തിന്റെയും (ICE) വീഴ്ചകൾ, വിവാദപരമായ എപ്‌സ്റ്റൈൻ ഫയലുകൾ കൈകാര്യം ചെയ്ത രീതി എന്നിവ സമിതി അന്വേഷിക്കുമെന്നാണ് ഗാർഷ്യ നൽകുന്ന സൂചന.

ഇതിനുപുറമേ, സെനറ്റിലെ ഭൂരിപക്ഷം ഉപയോഗിച്ച് പ്രസിഡന്റിന്റെ സുപ്രധാന കാബിനറ്റ് നിയമനങ്ങളും ജുഡീഷ്യൽ നിയമനങ്ങളും തടയാൻ ഡെമോക്രാറ്റുകൾക്ക് കഴിയും. ട്രംപിന്റെ ഭരണകാലയളവിൽ സുപ്രീം കോടതിയിൽ ജഡ്ജിമാരുടെ ഒഴിവുകൾ വരികയാണെങ്കിൽ, കൂടുതൽ മിതവാദികളായ സ്ഥാനാർത്ഥികളെ നിർദ്ദേശിക്കാൻ ട്രംപിനെ നിർബന്ധിതനാക്കാൻ സെനറ്റിന് സാധിക്കും.

പ്രസിഡന്റിനെ ഇംപീച്ച് ചെയ്യാനുള്ള അധികാരം ഹൗസിനുണ്ടെങ്കിലും, സെനറ്റിൽ കുറ്റക്കാരനായി കണ്ടെത്തുന്നതിന് മൂന്നിൽ രണ്ട് ഭൂരിപക്ഷം (67 വോട്ടുകൾ) ആവശ്യമാണ്. ഇത് ഡെമോക്രാറ്റുകൾക്ക് മാത്രമായി നേടിയെടുക്കാൻ കഴിയില്ല. മുൻപ് ട്രംപിനെ ഇംപീച്ച് ചെയ്തത് അദ്ദേഹത്തിന് അനുകൂലമായ സഹതാപ തരംഗം സൃഷ്ടിക്കാൻ കാരണമായതിനാൽ, ഇംപീച്ച്‌മെന്റ് നീക്കങ്ങളോട് പാർട്ടി നേതൃത്വം വളരെ ജാഗ്രതയോടെ മാത്രമേ പ്രതികരിക്കുകയുള്ളൂ. ട്രംപിനെ ഇംപീച്ച്‌മെന്റ് ചെയ്യുന്ന കാര്യത്തിൽ ഡെമോക്രാറ്റിക് പാർട്ടി നേതാക്കൾക്കിടയിൽ ഭിന്നതയുണ്ട്. ഒരുവിഭാഗം ആളുകൾ ഇംപീച്ച്‌മെന്റിന് ആഗ്രഹിക്കുന്നുണ്ടെങ്കിലും കമലാ ഹാരിസ്, ഹിലരി ക്ലിന്റൺ തുടങ്ങിയ നേതാക്കൾ ഇതിനെ പിന്തുണയ്ക്കുന്നില്ല. 

നിയമനിർമ്മാണത്തിലെ പ്രതിസന്ധികളും ‘വീറ്റോ’ ഭീഷണിയും

യുഎസ് പ്രതിനിധി സഭയിൽ ഭൂരിപക്ഷം ലഭിച്ചാൽ ആദ്യ 100 മണിക്കൂറിനുള്ളിൽ പ്രധാന നയങ്ങൾ നടപ്പിലാക്കാൻ ഡെമോക്രാറ്റുകൾ ‘ഷോക്ക് ആൻഡ് ഓ ഇൻ ലെജിസ്ലേറ്റീവ് സ്പ്രിന്റ്’ എന്ന പേരിൽ പദ്ധതി തയാറാക്കിയിട്ടുണ്ട്. ആരോഗ്യ ഇൻഷുറൻസ് സബ്‌സിഡികൾ പുനഃസ്ഥാപിക്കൽ, ഇറാൻ യുദ്ധം അവസാനിപ്പിക്കൽ, വ്യാപാര തീരുവകൾ ഒഴിവാക്കൽ, ഭരണകൂടത്തിനെതിരായ അന്വേഷണങ്ങൾ എന്നിവയാണ് ഈ അജണ്ടയിൽ ഉൾപ്പെടുന്നത്.

കോൺഗ്രസിന്റെ ഉൽപ്പാദനക്ഷമതയിൽ അമേരിക്കൻ ജനതയ്ക്കുള്ള അതൃപ്തി നിലനിൽക്കുന്ന സാഹചര്യത്തിൽ, ഇരു പാർട്ടികളും തമ്മിലുള്ള ഭിന്നത വീണ്ടും ഭരണസ്തംഭനത്തിലേക്ക് വഴിമാറാൻ സാധ്യതയുണ്ട്. ഡെമോക്രാറ്റുകൾക്ക് സ്വന്തം നിലയിൽ നിയമങ്ങൾ പാസാക്കാൻ സാധിക്കുമെങ്കിലും, അത് പൂർണ്ണമായി നടപ്പിലാകണമെങ്കിൽ പ്രസിഡന്റിന്റെ ഒപ്പ് ആവശ്യമാണ്. ഡെമോക്രാറ്റുകൾ കൊണ്ടുവരുന്ന നിയമങ്ങളെ തന്റെ ‘വീറ്റോ’ അധികാരം ഉപയോഗിച്ച് റദ്ദാക്കുമെന്ന് ട്രംപ് ഇതിനകം സൂചന നൽകിക്കഴിഞ്ഞു.

ഡെമോക്രാറ്റുകളുമായി ചേർന്ന് പ്രവർത്തിക്കുമെന്ന് ട്രംപ് മാധ്യമങ്ങളോട് പറഞ്ഞെങ്കിലും, തൊട്ടുപിന്നാലെ ‘VETO’ എന്ന് രേഖപ്പെടുത്തിയ തന്റെ തിരഞ്ഞെടുപ്പ് തൊപ്പിയുടെ ചിത്രം സോഷ്യൽ മീഡിയയിൽ പങ്കുവെച്ചത് വരുംദിവസങ്ങളിലെ രാഷ്ട്രീയ പോരാട്ടത്തിന്റെ തീവ്രത വ്യക്തമാക്കുന്നു. മെഡികെയ്ഡ്, അഫോർഡബിൾ കെയർ ആക്ട് (ഒബാമ കെയർ) തുടങ്ങിയ ആരോഗ്യ പദ്ധതികൾക്ക് മുൻ ഭരണകൂടം വരുത്തിയ വെട്ടിക്കുറയ്ക്കലുകൾ പുനഃസ്ഥാപിക്കുമെന്നാണ് ഡെമോക്രാറ്റുകൾ വ്യക്തമാക്കുന്നത്. എന്നാൽ റിപ്പബ്ലിക്കൻ പാർട്ടിയുടെ എതിർപ്പ് ഇതിന് തടസ്സമാകും.

പാർട്ടിക്കുള്ളിലെ ഭിന്നതയും വിദേശനയങ്ങളും

ആർട്ടിഫിഷ്യൽ ഇന്റലിജൻസ് (AI) വ്യവസായ നിയന്ത്രണം പോലെയുള്ള വിഷയങ്ങളിൽ ഇരുപാർട്ടികളും തമ്മിൽ ധാരണയിലെത്താൻ സാധ്യതയുണ്ടെങ്കിലും, വിദേശനയങ്ങളിൽ കടുത്ത തർക്കങ്ങൾ നിലനിൽക്കുന്നു. പ്രത്യേകിച്ചും ഇസ്രായേലിന് സൈനിക സഹായം നൽകുന്നതുമായി ബന്ധപ്പെട്ട് ഡെമോക്രാറ്റിക് പാർട്ടിക്കുള്ളിൽ തന്നെ ആഭ്യന്തര കലഹം രൂക്ഷമാണ്. മിഷിഗണിൽ നിന്നുള്ള അബ്ദുൽ അൽ-സയീദ് ഉൾപ്പെടെയുള്ള പുതിയ പ്രതിനിധികൾ ഇസ്രായേൽ സഹായം വെട്ടിക്കുറയ്ക്കണമെന്ന് ആവശ്യപ്പെടുമ്പോൾ, ഇത് പാർട്ടി നേതൃത്വവുമായി നേരിട്ടുള്ള ഏറ്റുമുട്ടലിലേക്ക് നയിച്ചേക്കാം.

ഇറാൻ യുദ്ധം അവസാനിപ്പിക്കാൻ കോൺഗ്രസ് മുൻപ് പാസാക്കിയ പ്രമേയങ്ങൾ ട്രംപ് അവഗണിച്ചതുപോലെ, വരുംദിനങ്ങളിലും ട്രംപിന്റെ വിദേശനയങ്ങളെ നിയന്ത്രിക്കാൻ കോൺഗ്രസിന് എത്രത്തോളം സാധിക്കുമെന്നത് വലിയൊരു നിയമപ്രശ്നമായി തുടരുകയാണ്. യുഎസ് സെനറ്റിന്റെ നിയന്ത്രണം ജനുവരി മൂന്നിന് ശേഷമേ ഡെമോക്രാറ്റുകൾക്ക് ലഭിക്കൂ എന്നതുകൊണ്ട് തന്നെ അടുത്ത രണ്ട് മാസം ഇറാൻ യുദ്ധത്തിന് നിർണായകമായ ഒരു കാലയളവാണ്. ട്രംപ് ഭരണകൂടത്തിന് സൈനിക നടപടികൾക്കായി ഇതിനകം അനുവദിച്ച തുക ചെലവഴിക്കുന്നത് തുടരാം, എന്നാൽ ഡെമോക്രാറ്റുകൾക്ക് യുദ്ധത്തിനായുള്ള കൂടുതൽ ഫണ്ടുകൾ തടയാൻ കഴിഞ്ഞേക്കും.

അതേസമയം, അടുത്ത 2028 പ്രസിഡന്റ് തിരഞ്ഞെടുപ്പ് ലക്ഷ്യമിട്ടുള്ള രാഷ്ട്രീയ നീക്കങ്ങൾക്ക് ഈ ഭൂരിപക്ഷത്തോടെ അമേരിക്കയിൽ തുടക്കമായിക്കഴിഞ്ഞു.

Following the election excitement, US politics faces harsh realities; legislation likely to face a stalemate.