വാഷിംഗ്ടൺ: മുൻ അമേരിക്കൻ പ്രസിഡൻ്റ് ബരാക് ഒബാമയുടെ പ്രിയപ്പെട്ട വളർത്തുനായ ‘സണ്ണി’ 13-ാം വയസ്സിൽ വിടപറഞ്ഞു. ഒബാമ തന്നെയാണ് തൻ്റെ ഔദ്യോഗിക എക്സ് അക്കൗണ്ടിലൂടെ പ്രിയപ്പെട്ട വളർത്തുമൃഗത്തിൻ്റെ വിയോഗവാർത്ത ലോകത്തെ അറിയിച്ചത്. “ഞങ്ങളുടെ കുടുംബത്തിലെ ഏറ്റവും പ്രിയപ്പെട്ട ഒരു അംഗത്തെയാണ് ഇന്നലെ നഷ്ടമായത്,” എന്ന് ഒബാമ കുറിച്ചു. എപ്പോഴും തങ്ങൾക്കൊപ്പം വിശ്വസ്തതയോടെ നിലകൊണ്ട സണ്ണി തങ്ങൾക്ക് ഏറെ പ്രിയപ്പെട്ടവളായിരുന്നുവെന്നും അദ്ദേഹം ഓർമ്മിച്ചു.
ബരാക് ഒബാമയുടെ രണ്ടാമത്തെ പ്രസിഡൻ്റ് കാലാവധിയുടെ തുടക്കത്തിൽ, 2013-ലാണ് പോർച്ചുഗീസ് വാട്ടർ ഡോഗ് ഇനത്തിൽപ്പെട്ട സണ്ണി വൈറ്റ് ഹൗസിലെത്തുന്നത്. 2009 മുതൽ ഒബാമ കുടുംബത്തോടൊപ്പമുണ്ടായിരുന്ന ‘ബോ’ എന്ന നായയ്ക്ക് കൂട്ടായാണ് സണ്ണിയെ ഒബാമ വാങ്ങിയത്. ‘ബോ’ 2021-ൽ ചത്തിരുന്നു.
വൈറ്റ് ഹൗസിലെ താമസകാലത്ത് അന്താരാഷ്ട്ര തലത്തിൽ വലിയ ശ്രദ്ധനേടിയ നായയായിരുന്നു സണ്ണി. ക്രിസ്മസ് പാർട്ടികളിൽ പങ്കെടുക്കാനും വൈറ്റ് ഹൗസിലെത്തുന്ന വിദേശ പ്രതിനിധികളെ സ്വീകരിക്കാനും സണ്ണി മുൻപന്തിയിലുണ്ടായിരുന്നു. 2015-ൽ വൈറ്റ് ഹൗസ് സന്ദർശിച്ച ഫ്രാൻസിസ് മാർപ്പാപ്പയെ സ്വീകരിക്കാൻ സണ്ണിയും ബോയും ഒപ്പമുണ്ടായിരുന്നു. ഒരു അമേരിക്കൻ പ്രസിഡൻ്റിൻ്റെയും മാർപ്പാപ്പയുടെയും സ്നേഹലാളനകൾ ഒരുപോലെ ഏറ്റുവാങ്ങാൻ ഭാഗ്യം ലഭിച്ച അപൂർവ്വം ജീവികളിലൊന്നാണ് സണ്ണിയെന്ന് മുൻ ചീഫ് വൈറ്റ് ഹൗസ് ഫോട്ടോഗ്രാഫർ പീറ്റ് സൂസ അനുസ്മരിച്ചു.
അത്യധികം ഊർജ്ജസ്വലതയുള്ള സ്വഭാവമായിരുന്നു സണ്ണിയുടേതെന്ന് ഒബാമ കുടുംബം പറയുന്നു. വൈറ്റ് ഹൗസിലെ പുൽത്തകിടിയിലൂടെ ഓടിനടക്കാനും കുട്ടികളുമായി കളിക്കാനും സണ്ണിക്ക് ഏറെ ഇഷ്ടമായിരുന്നു. പ്രായമേറിയെങ്കിലും അവസാന നാളുകൾ വരെയും ഏറെ സുന്ദരിയായി തന്നെ സണ്ണി കഴിഞ്ഞുവെന്നും, ഇപ്പോൾ അവൾ അവളുടെ ‘ചേട്ടൻ’ ബോയുടെ അടുത്തേക്ക് യാത്രയായിരിക്കുകയാണെന്നും ഒബാമ കുറിച്ചു.
അമേരിക്കൻ പ്രസിഡന്റുമാർ വൈറ്റ് ഹൗസിൽ വളർത്തുമൃഗങ്ങളെ ഒപ്പം കൂട്ടുന്ന വലിയൊരു പാരമ്പര്യം നിലനിൽക്കുന്നുണ്ട്. കഴിഞ്ഞ 100 വർഷത്തെ ചരിത്രത്തിനിടയിൽ വൈറ്റ് ഹൗസിൽ വളർത്തുമൃഗങ്ങൾ ഇല്ലാതിരുന്ന ഒരേയൊരു പ്രസിഡൻ്റ് ഡോണൾഡ് ട്രംപ് മാത്രമാണ്.
Former US President Barack Obama’s pet dog ‘Sunny’ has passed away at the age of 13.
