അനിൽ മറ്റത്തിക്കുന്നേൽ
വാഷിംഗ്ടൺ ഡി.സി.: അമേരിക്കൻ ഇടക്കാല തിരഞ്ഞെടുപ്പിൽ റിപ്പബ്ലിക്കൻ പാർട്ടിക്കുണ്ടായ തിരിച്ചടിക്ക് പിന്നാലെ പ്രസിഡന്റ് ഡോണൾഡ് ട്രംപിന്റെ ഭരണകൂടത്തിൽ ഉന്നതതല രാജി. യുഎസ് നീതിന്യായ വകുപ്പിലെ സിവിൽ റൈറ്റ്സ് ഡിവിഷൻ മേധാവിയും അസിസ്റ്റന്റ് അറ്റോർണി ജനറലുമായ ഇന്ത്യൻ വംശജ ഹർമീത് ധില്ലൺ സ്ഥാനമൊഴിഞ്ഞു. നവംബർ അഞ്ചിന് അറ്റോർണി ജനറൽ ടോഡ് ബ്ലാഞ്ചാണ് രാജി സ്ഥിരീകരിച്ചത്.
നവംബർ മൂന്നിന് നടന്ന ഇടക്കാല തിരഞ്ഞെടുപ്പിൽ ഡെമോക്രാറ്റുകൾ കോൺഗ്രസിന്റെ ഇരുസഭകളിലും ഭൂരിപക്ഷം തിരിച്ചുപിടിച്ചതിനു പിന്നാലെയാണ് രാജിവാർത്ത പുറത്തുവന്നത്. തിരഞ്ഞെടുപ്പിനുശേഷം ട്രംപ് ഭരണകൂടത്തിൽനിന്ന് സ്ഥാനമൊഴിയുന്ന ആദ്യ ഉന്നത ഉദ്യോഗസ്ഥരിൽ ഒരാളാണ് ധില്ലൺ.
2025 ഏപ്രിലിൽ ചുമതലയേറ്റ ധില്ലൺ നീതിന്യായ വകുപ്പിന്റെ സിവിൽ റൈറ്റ്സ് വിഭാഗത്തിൽ വ്യാപകമായ നയപരമായ മാറ്റങ്ങൾ നടപ്പാക്കിയിരുന്നു. സർവകലാശാലകളിലെ വിവേചനാരോപണങ്ങൾ, യഹൂദവിരുദ്ധ പ്രവർത്തനങ്ങൾ, മതസ്വാതന്ത്ര്യം, വോട്ടർ പട്ടികകളുടെ പരിശോധന, തോക്ക് കൈവശം വയ്ക്കാനുള്ള ഭരണഘടനാപരമായ അവകാശം തുടങ്ങിയ വിഷയങ്ങളിൽ അന്വേഷണങ്ങൾക്കും നിയമനടപടികൾക്കും അവർ നേതൃത്വം നൽകി.
എന്നാൽ പരമ്പരാഗത പൗരാവകാശ സംരക്ഷണ പ്രവർത്തനങ്ങളിൽനിന്ന് വിഭാഗത്തിന്റെ ശ്രദ്ധ രാഷ്ട്രീയ മുൻഗണനകളിലേക്ക് മാറ്റിയെന്ന വിമർശനവും അവരുടെ കാലയളവിൽ ഉയർന്നിരുന്നു. നിരവധി മുതിർന്ന ഉദ്യോഗസ്ഥരും ജീവനക്കാരും വകുപ്പിൽനിന്ന് പിരിഞ്ഞുപോയതും വിവാദമായി.
അതേസമയം, രാജി തിരഞ്ഞെടുപ്പ് പരാജയത്തെ തുടർന്നുള്ള തീരുമാനമല്ലെന്നാണ് ധില്ലൺ വ്യക്തമാക്കിയത്. ഒക്ടോബറിൽത്തന്നെ സ്ഥാനമൊഴിയാനുള്ള തീരുമാനം വൈറ്റ് ഹൗസിനെ അറിയിച്ചിരുന്നുവെന്നും സ്വകാര്യ അഭിഭാഷക പ്രവർത്തനത്തിലേക്ക് മടങ്ങാനാണ് ഉദ്ദേശിക്കുന്നതെന്നും അവർ അറിയിച്ചു.
പൗരസ്വാതന്ത്ര്യ സംരക്ഷണത്തിനും നിയമനടപടികൾക്കും ധില്ലൺ നൽകിയ സംഭാവനകളെ അറ്റോർണി ജനറൽ ടോഡ് ബ്ലാഞ്ച് പ്രശംസിച്ചു.
തിരഞ്ഞെടുപ്പിനുശേഷമുള്ള ഭരണപരമായ മാറ്റങ്ങൾ ശ്രദ്ധിക്കപ്പെടുന്ന സാഹചര്യത്തിൽ ധില്ലണിന്റെ രാജി വാഷിംഗ്ടണിലെ രാഷ്ട്രീയ കേന്ദ്രങ്ങളിൽ ചർച്ചയായിരിക്കുകയാണ്.
High-level resignation in the Trump administration; Harmeet Dhillon, head of the Civil Rights Division at the US Department of Justice, has stepped down.
