സ്റ്റാംഫോർഡ്: അമേരിക്കയിലെ കണക്റ്റിക്കട്ടിലെ സ്റ്റാംഫോർഡിലുള്ള ഒരു സൂപ്പർമാർക്കറ്റിൽ ഇന്ത്യൻ വംശജയായ യുവതിക്ക് നേരെ നടന്ന വംശീയ അധിക്ഷേപം സമൂഹമാധ്യമങ്ങളിൽ വ്യാപക ചർച്ചയാകുന്നു. സരീന ഗുപ്ത എന്ന യുവതിയോടാണ് മറ്റൊരു സ്ത്രീ “നിന്റെ രാജ്യത്തേക്ക് തിരിച്ച് പോകൂ” എന്ന് ആക്രോശിച്ചത്. സംഭവത്തിൽ ഏറ്റവും ഞെട്ടിച്ചത്, അധിക്ഷേപം നടത്തിയ സ്ത്രീ വിക്ടോറിയ ലൂയിസ് മേസൺ എന്ന പേരിലുള്ള ഒരു നഴ്സാണെന്ന് പിന്നീട് അറിഞ്ഞപ്പോഴാണെന്ന് സരീന ഗുപ്ത മാധ്യമങ്ങളോട് പറഞ്ഞു.
സൂപ്പർമാർക്കറ്റിൽ ചില സാധനങ്ങൾ തിരികെ നൽകുന്നതിനുള്ള നടപടികൾ പൂർത്തിയാക്കുന്നതിനിടെയായിരുന്നു സംഭവം. നടപടികൾ പതിവിലും കൂടുതൽ സമയം എടുത്തതോടെ പിന്നിൽ കാത്തുനിന്നിരുന്ന സ്ത്രീ അസ്വസ്ഥയാകാൻ തുടങ്ങി. മറ്റൊരു കൗണ്ടർ ഉപയോഗിക്കാമെന്ന് താൻ നിർദേശിച്ചെങ്കിലും യാതൊരു പ്രകോപനവുമില്ലാതെ അവർ തന്നെ അധിക്ഷേപിക്കുകയായിരുന്നുവെന്ന് സരീന പറഞ്ഞു.
തുടർന്ന് ഏകദേശം അഞ്ച് മിനിറ്റ് നീണ്ടുനിന്ന മുഴുവൻ സംഭവവും സരീന തന്റെ മൊബൈൽ ഫോണിൽ പകർത്തി. വീഡിയോയിൽ “അമേരിക്കയിൽ നിന്ന് മാറിനിൽക്കൂ, നിന്റെ രാജ്യത്തേക്ക് പോകൂ” എന്ന തരത്തിലുള്ള വംശീയ പരാമർശങ്ങൾ കേൾക്കാം.“പൊതുസ്ഥലത്ത് ഒരാൾ ഇത്തരത്തിൽ സംസാരിക്കുന്നത് ഞാൻ ആദ്യമായാണ് കേൾക്കുന്നത്. ആളുകൾക്ക് ഇങ്ങനെ തുറന്നുപറയാൻ ധൈര്യം ലഭിക്കുന്ന തരത്തിലുള്ള ഒരു സമൂഹത്തിലാണോ നാം ജീവിക്കുന്നതെന്ന് ചിന്തിച്ച് ഞെട്ടിപ്പോയി,” സരീന പറഞ്ഞു.
സരീന വീഡിയോ ടിക്ടോക്കിലും ഇൻസ്റ്റഗ്രാമിലും പങ്കുവെച്ചു. ആയിരക്കണക്കിന് ആളുകൾ വീഡിയോ കണ്ടതോടൊപ്പം നിരവധി പേർ പിന്തുണയുമായി രംഗത്തെത്തി.“ഇത്തരം സംഭവങ്ങൾ ഒരിക്കലും അംഗീകരിക്കാനാവില്ല. ഇത് നേരിടേണ്ടിവന്നാൽ അതിനെതിരെ ശബ്ദമുയർത്താൻ എല്ലാവർക്കും ധൈര്യം ഉണ്ടായിരിക്കണം,” സരീന പറഞ്ഞു.
അതേസമയം, സംഭവം വിവാദമായതോടെ അധിക്ഷേപം നടത്തിയ സ്ത്രീ സ്റ്റാംഫോർഡ് നഗരത്തിന്റെ ഉടമസ്ഥതയിലുള്ള നതാനിയേൽ വിതറൽ നഴ്സിംഗ് ഹോമിലെ ജീവനക്കാരിയാണെന്ന് സമൂഹമാധ്യമ ഉപയോക്താക്കൾ കണ്ടെത്തി.
സംഭവത്തെക്കുറിച്ച് നഴ്സിംഗ് ഹോം പുറത്തിറക്കിയ പ്രസ്താവനയിൽ, “വീഡിയോയിലെ പരാമർശങ്ങൾ ഞങ്ങളുടെ സ്ഥാപനത്തിന്റെ മൂല്യങ്ങളെയോ നയങ്ങളെയോ സംസ്കാരത്തെയോ പ്രതിനിധീകരിക്കുന്നില്ല. വിദ്വേഷ പ്രസംഗം, വിവേചനം, പീഡനം എന്നിവയോട് ഞങ്ങൾക്ക് യാതൊരു സഹിഷ്ണുതയും ഇല്ല. എല്ലാവരെയും ഉൾക്കൊള്ളുന്നതും പരസ്പര ബഹുമാനം പുലർത്തുന്നതുമായ അന്തരീക്ഷം നിലനിർത്താൻ ഞങ്ങൾ പ്രതിജ്ഞാബദ്ധരാണ്,” എന്ന് വ്യക്തമാക്കി.
ഇൻസ്റ്റഗ്രാമിൽ നിരവധി പേർ സരീനയ്ക്ക് പിന്തുണ അറിയിക്കുകയും ചെയ്തു. “ഇത്തരമൊരു അനുഭവം നേരിടേണ്ടിവന്നതിൽ ഖേദിക്കുന്നു. നിങ്ങൾ വളരെ മനോഹരമായ ഒരു യുവതിയാണ്,” എന്ന് ഒരാൾ കുറിച്ചു.“അമേരിക്കയിൽ എത്രയോ ഇന്ത്യൻ ഡോക്ടർമാരും എഞ്ചിനീയർമാരും സേവനം ചെയ്യുന്നു എന്ന് അവരെ ഓർമ്മിപ്പിക്കൂ. അവരുടെ മേലധികാരി പോലും ഒരു ഇന്ത്യൻ ഡോക്ടറായിരിക്കാം,” മറ്റൊരാൾ അഭിപ്രായപ്പെട്ടു.“ഇത്തരം മോശം അനുഭവം നിങ്ങൾക്ക് നേരിടേണ്ടി വന്നതിൽ ദുഃഖമുണ്ട്,” എന്നായിരുന്നു മറ്റൊരു ഉപയോക്താവിന്റെ പ്രതികരണം.
Indian-origin woman Sarina Gupta’s shocking experience goes viral after racist outburst at Stamford Supermarket Checkout
