വാഷിങ്ടൺ: അമേരിക്കയിലെ അലബാമ സംസ്ഥാനത്തെ പ്രമുഖ ചരിത്രപരമായ കറുത്തവർഗ സർവകലാശാലയായ ടസ്കിഗി സർവകലാശാല പുതിയ അധ്യയന വർഷം മുതൽ കർശനമായ ഡ്രസ് കോഡ് നടപ്പാക്കുന്നു. വിദ്യാർഥികൾ നിർബന്ധമായും ബിസിനസ് സ്യൂട്ടും ഔപചാരിക ഷൂസും ക്യാമ്പസിലെത്തിക്കണമെന്ന നിർദേശവും ബോണറ്റ്, ഡു-റാഗ് തുടങ്ങിയ തലമൂടികൾക്ക് വിലക്കേർപ്പെടുത്തിയതുമാണ് വിവാദത്തിന് വഴിവെച്ചിരിക്കുന്നത്.
സർവകലാശാല പ്രസിഡന്റ് ഡോ. മാർക്ക് ബ്രൗൺ പുറത്തിറക്കിയ അറിയിപ്പിലാണ് പുതിയ മാർഗനിർദേശങ്ങൾ പ്രഖ്യാപിച്ചത്. ബിരുദ പഠനത്തിന് ശേഷം തൊഴിൽരംഗത്തേക്ക് വിദ്യാർഥികളെ കൂടുതൽ പ്രൊഫഷണൽ രീതിയിൽ തയ്യാറാക്കുക എന്ന ലക്ഷ്യത്തോടെയാണ് തീരുമാനമെന്ന് അദ്ദേഹം വ്യക്തമാക്കി. പുതിയ ചട്ടപ്രകാരം ക്ലാസ് മുറികളിലും കഫറ്റീരിയയിലും ഔദ്യോഗിക ചടങ്ങുകളിലും ശരീരം അമിതമായി തുറന്നുകാണിക്കുന്ന വസ്ത്രങ്ങൾ ധരിക്കാൻ അനുവദിക്കില്ല. ബെഡ്റൂം സ്ലിപ്പറുകൾ, ബോണറ്റുകൾ, ഡു-റാഗുകൾ എന്നിവ ധരിച്ച് ക്ലാസിലോ കഫറ്റീരിയയിലോ എത്തുന്നതിനും വിലക്കുണ്ട്.
ക്ലാസ് മുറികളിൽ മൊബൈൽ ഫോൺ ഉപയോഗിക്കുന്നതും നിരോധിച്ചിട്ടുണ്ട്. നിർബന്ധിത ഹാജർ നയവും സർവകലാശാല വീണ്ടും ഓർമ്മിപ്പിച്ചു. ഡ്രസ് കോഡ് ലംഘിക്കുന്നവർക്ക് എന്ത് ശിക്ഷയെന്നത് വ്യക്തമാക്കിയിട്ടില്ലെങ്കിലും, ചട്ടങ്ങൾ പാലിക്കാത്തവർക്കെതിരെ നടപടി സ്വീകരിക്കാൻ അധ്യാപകർക്ക് അധികാരം നൽകിയിട്ടുണ്ട്. പുതിയ നയം സമൂഹമാധ്യമങ്ങളിൽ വലിയ ചർച്ചയ്ക്കാണ് വഴിവെച്ചത്. വസ്ത്രധാരണത്തെ അടിസ്ഥാനമാക്കി പ്രൊഫഷണലിസം വിലയിരുത്തുന്നത് ശരിയല്ലെന്നും ഇത് കറുത്തവർഗ വിദ്യാർഥികളെ അനാവശ്യമായി ലക്ഷ്യമിടുന്ന നടപടിയാണെന്നും വിമർശകർ ആരോപിച്ചു.
അതേസമയം, തൊഴിൽ അഭിമുഖങ്ങൾക്കും ഔദ്യോഗിക ജോലിസ്ഥലത്തിനും വിദ്യാർഥികളെ ഒരുക്കാൻ ഇത്തരം ഡ്രസ് കോഡ് സഹായിക്കുമെന്നാണ് അനുകൂലികളുടെ വാദം.മുൻ വിദ്യാർഥികളിൽ പലരും സർവകലാശാലയുടെ തീരുമാനത്തെ പിന്തുണച്ചു. ഔപചാരിക വസ്ത്രധാരണം ടസ്കിഗി സർവകലാശാലയുടെ പാരമ്പര്യത്തിന്റെ ഭാഗമാണെന്നും പുതിയ നയം നിലവിലുള്ള മാനദണ്ഡങ്ങൾ കൂടുതൽ കർശനമായി നടപ്പാക്കുന്നതാണെന്നും അവർ അഭിപ്രായപ്പെട്ടു.
സാമ്പത്തികമായി പിന്നാക്കം നിൽക്കുന്ന വിദ്യാർഥികൾക്ക് പ്രൊഫഷണൽ വസ്ത്രങ്ങൾ ലഭ്യമാക്കാൻ ‘കമ്മ്യൂണിറ്റി ക്ലോസറ്റ്’ ആരംഭിക്കുമെന്നും സർവകലാശാല അറിയിച്ചു. മൂന്ന് പതിറ്റാണ്ടിലേറെയായി ഏറ്റവും കൂടുതൽ ഒന്നാം വർഷ വിദ്യാർഥികളെ ഇത്തവണ സ്വീകരിക്കാനൊരുങ്ങുന്നതിനിടെയാണ് പുതിയ ഡ്രസ് കോഡ് പ്രഖ്യാപിച്ചിരിക്കുന്നത്.
Mandatory business suits, headwear ban: Major US Black university’s new dress code sparks row
