വാഷിംഗ്ടൺ: അമേരിക്കൻ തിരഞ്ഞെടുപ്പ് പ്രക്രിയയെ വിമർശിക്കുന്നതിനിടയിൽ യുഎസ് പ്രസിഡന്റ് ഡോണൾഡ് ട്രംപിന് സംഭവിച്ച പിഴവ് ചർച്ചയാകുന്നു. അമേരിക്കൻ വോട്ടിംഗ് സമ്പ്രദായം “അഴിമതി നിറഞ്ഞതാണ്” എന്ന് ആരോപിക്കാൻ ബ്രസീലിലെ തിരഞ്ഞെടുപ്പ് വിവരങ്ങളാണ് ഇന്ത്യയുടേതെന്ന പേരിൽ ട്രംപ് സോഷ്യൽ മീഡിയയിൽ പങ്കുവെച്ചത്. ഇന്ത്യയിൽ പ്രസിഡന്റ് തിരഞ്ഞെടുപ്പ് നടന്നിട്ടില്ലാതിരുന്നിട്ടും, “ഇന്ത്യയിലെ പ്രസിഡന്റ് തിരഞ്ഞെടുപ്പിൽ 12.5 കോടി ആളുകൾ വോട്ട് ചെയ്തുവെന്നും വോട്ടെടുപ്പ് അവസാനിച്ച് തൊട്ടുപിന്നാലെ ഫലം പുറത്തുവന്നുവെന്നും” ട്രംപ് തന്റെ പോസ്റ്റിൽ അവകാശപ്പെട്ടു.
തന്റെ സ്വന്തം സോഷ്യൽ മീഡിയ പ്ലാറ്റ്‌ഫോമായ ‘ട്രൂത്ത് സോഷ്യലിൽ’ ഞായറാഴ്ചയാണ് ട്രംപ് വിവാദ പോസ്റ്റ് പങ്കുവെച്ചത്. അതേ ദിവസം തന്നെ ഒന്നാം ഘട്ട വോട്ടെടുപ്പ് നടന്ന ബ്രസീലിലെ പ്രസിഡന്റ് തിരഞ്ഞെടുപ്പിനെയാണ് ട്രംപ് ഇന്ത്യയുടേതെന്ന് തെറ്റായി രേഖപ്പെടുത്തിയത്. അമേരിക്കയിലെ ചില നഗരങ്ങളിലും സംസ്ഥാനങ്ങളിലും വോട്ടെണ്ണാൻ എടുക്കുന്ന അമിത സമയത്തെ വിമർശിക്കാനാണ് അദ്ദേഹം ഈ ഉദാഹരണം ഉയർത്തിക്കാട്ടിയത്.
“ഇന്ത്യയിലെ പ്രസിഡന്റ് തിരഞ്ഞെടുപ്പിന്റെ ആദ്യ ഘട്ടത്തിൽ ഇന്ന് 125 ദശലക്ഷം (12.5 കോടി) ആളുകൾ വോട്ട് ചെയ്തു. വോട്ടെടുപ്പ് അവസാനിച്ച് തൊട്ടുപിന്നാലെ, അതേ ദിവസം തന്നെ ഫലം പുറത്തുവന്നു. എന്നാൽ ഡെട്രോയിറ്റ്, ഫിലാഡൽഫിയ, കാലിഫോർണിയ എന്നിവടങ്ങളിലും മറ്റ് നിരവധി യുഎസ് നഗരങ്ങളിലും സംസ്ഥാനങ്ങളിലും, ഇതിലും വളരെ കുറഞ്ഞ വോട്ടുകളുള്ള ഫലങ്ങൾ പ്രഖ്യാപിക്കാൻ പലപ്പോഴും ആഴ്ചകളെടുക്കും. വോട്ടുകൾ കൃത്രിമം കാണിക്കാൻ, അല്ലെങ്കിൽ കണക്കുകൂട്ടാൻ വേണ്ടിയാണിത്. അമേരിക്കയിലെ വോട്ടിംഗ് അഴിമതി നിറഞ്ഞതാണ്,” ട്രംപ് പോസ്റ്റിൽ കുറിച്ചു.
ബ്രസീൽ തിരഞ്ഞെടുപ്പ് അതോറിറ്റിയുടെ കണക്കുകൾ പ്രകാരം, ഞായറാഴ്ച നടന്ന പ്രസിഡന്റ് തിരഞ്ഞെടുപ്പിന്റെ ആദ്യ ഘട്ടത്തിൽ ബ്രസീലിൽ 125.27 ദശലക്ഷം സാധുവായ വോട്ടുകൾ രേഖപ്പെടുത്തിയിട്ടുണ്ട്. വോട്ടെടുപ്പ് അവസാനിച്ച വൈകുന്നേരം 5 മണിക്ക് തന്നെ ഫലങ്ങൾ പുറത്തുവരാൻ തുടങ്ങുകയും ചെയ്തിരുന്നു. ലൂയിസ് ഇനാസിയോ ലൂല ഡാ സിൽവയും ഫ്ലാവിയോ ബോൾസോനാരോയും തമ്മിലായിരുന്നു ബ്രസീലിലെ പ്രധാന മത്സരം. ഇവിടെ ഒക്ടോബർ 25-ന് രണ്ടാം ഘട്ട തിരഞ്ഞെടുപ്പ് നടക്കും. എന്നാൽ ഇതേ വിവരങ്ങളാണ് ഇന്ത്യയുടേതെന്ന പേരിൽ ട്രംപ് നൽകിയത്.
യാഥാർത്ഥ്യത്തിൽ, ഇന്ത്യയിൽ നിലവിൽ പ്രസിഡന്റ് തിരഞ്ഞെടുപ്പുകൾ ഒന്നും നടന്നിട്ടില്ല. നിലവിലെ ഇന്ത്യൻ രാഷ്ട്രപതി 2022 ജൂലൈയിൽ അധികാരമേറ്റ ദ്രൗപദി മുർമുവാണ്. കൂടാതെ, ഇന്ത്യൻ പൗരന്മാർ നേരിട്ടല്ല രാഷ്ട്രപതിയെ തിരഞ്ഞെടുക്കുന്നത്. പാർലമെന്റിലെ ഇരുസഭകളിലെയും സംസ്ഥാനങ്ങളിലെയും തിരഞ്ഞെടുക്കപ്പെട്ട ജനപ്രതിനിധികൾ അടങ്ങുന്ന ഇലക്ടറൽ കോളേജ് വഴിയാണ് ഇന്ത്യയിൽ രാഷ്ട്രപതിയെ തിരഞ്ഞെടുക്കുന്നത്. 2024-ലെ ലോക്‌സഭാ തിരഞ്ഞെടുപ്പിൽ ഇന്ത്യയിൽ ഏകദേശം 98 കോടി രജിസ്റ്റർ ചെയ്ത വോട്ടർമാരുണ്ടായിരുന്നു.
അമേരിക്കയിൽ കടുത്ത തിരഞ്ഞെടുപ്പ് പരിഷ്കരണങ്ങൾ കൊണ്ടുവരുന്നതിനായി ട്രംപ് മുമ്പും ഇന്ത്യൻ തിരഞ്ഞെടുപ്പുകളെയും വോട്ടർ തിരിച്ചറിയൽ സംവിധാനത്തെയും പുകഴ്ത്തി സംസാരിച്ചിട്ടുണ്ട്. സാധുവായ ഫോട്ടോ ഐഡന്റിറ്റി കാർഡ് ഇല്ലാതെ എങ്ങനെയാണ് യുഎസിൽ തിരഞ്ഞെടുപ്പ് നടത്തുന്നതെന്ന് ഇന്ത്യയുടെ ചീഫ് ഇലക്ഷൻ കമ്മീഷണർ ജ്ഞാനേഷ് കുമാർ തന്റെ ഭരണകൂടത്തിലെ ഉദ്യോഗസ്ഥരോട് ചോദിച്ചതായി കഴിഞ്ഞ ഓഗസ്റ്റിലും ട്രംപ് അവകാശപ്പെട്ടിരുന്നു. അമേരിക്കയിൽ പൗരത്വ തെളിവ് നിർബന്ധമാക്കണമെന്നും തപാൽ വോട്ടുകൾ പരിമിതപ്പെടുത്തണമെന്നും ആവശ്യപ്പെടുന്ന ‘സേവ് അമേരിക്ക ആക്റ്റിന്’ പിന്തുണ തേടിക്കൊണ്ടായിരുന്നു അന്നത്തെ ട്രംപിന്റെ പരാമർശം.
Trump slips up again: US President drags in India’s name instead of Brazil’s while mocking the delay in vote counting.
