വാഷിംഗ്ടൺ: വിദേശത്തുനിന്നുള്ള കുടിയേറ്റക്കാരോട് അനുകൂല സമീപനം പുലർത്തുന്ന ‘സാങ്ച്വറി സിറ്റികളിലെ’ (അഭയ നഗരങ്ങൾ) വിമാനത്താവളങ്ങളിൽ നിന്ന് കസ്റ്റംസ് ആൻഡ് ബോർഡർ പ്രൊട്ടക്ഷൻ (സിബിപി) ഉദ്യോഗസ്ഥരെ പിൻവലിക്കുമെന്ന ഭീഷണിയുമായി യു.എസ് ഹോംലാൻഡ് സെക്യൂരിറ്റി സെക്രട്ടറി മാർക്ക്വെയ്ൻ മുള്ളിൻ. ഈ നീക്കം നടപ്പിലായാൽ അമേരിക്കയിലേക്കുള്ള രാജ്യാന്തര വിമാന സർവീസുകൾ പൂർണ്ണമായും പ്രതിസന്ധിയിലാകുമെന്ന ആശങ്കയിലാണ് ട്രാവൽ മേഖല.
ട്രംപ് ഭരണകൂടം കൊണ്ടുവരുന്ന പുതിയ യാത്രാ നയങ്ങളിലെ ആശങ്കകൾ ചർച്ച ചെയ്യാൻ ചേർന്ന യോഗത്തിലാണ് മുള്ളിൻ ഇക്കാര്യം വീണ്ടും വ്യക്തമാക്കിയത്. ‘യു.എസ് ട്രാവൽ അസോസിയേഷൻ’, പ്രമുഖ എയർലൈൻ കൂട്ടായ്മയായ ‘എയർലൈൻസ് ഫോർ അമേരിക്ക’ എന്നിവർ ഈ നീക്കത്തെ ശക്തമായി അപലപിച്ചു. ഉദ്യോഗസ്ഥരെ പിൻവലിക്കുന്നത് വിനോദസഞ്ചാര മേഖലയെയും അന്താരാഷ്ട്ര ചരക്കുനീക്കത്തെയും സാമ്പത്തിക വ്യവസ്ഥയെയും തകിടം മറിക്കുമെന്ന് വ്യവസായ സംഘടനകൾ മുന്നറിയിപ്പ് നൽകുന്നു.
അതേസമയം, രാഷ്ട്രീയ വിയോജിപ്പുകളുടെ പേരിൽ വിമാന സർവീസുകൾ തടസ്സപ്പെടുത്തുന്നത് ശരിയല്ലെന്ന് ട്രാൻസ്പോർട്ടേഷൻ സെക്രട്ടറി സീൻ ഡഫി പറഞ്ഞു. ഒരു സംസ്ഥാനത്തിൻ്റെ രാഷ്ട്രീയ നിലപാടിൻ്റെ പേരിൽ അവിടേക്കുള്ള വ്യോമഗതാഗതം റദ്ദാക്കരുതെന്നും, ഈ നിർദ്ദേശത്തോട് യോജിക്കാനാകില്ലെന്നും അദ്ദേഹം വ്യക്തമാക്കി. ഭരണകൂടത്തിനുള്ളിൽ തന്നെ ഈ വിഷയത്തിൽ ഭിന്നതയുണ്ടെന്നാണ് ഇത് സൂചിപ്പിക്കുന്നത്.
കുറ്റകൃത്യങ്ങളിൽ പെടാത്ത അനധികൃത കുടിയേറ്റക്കാരെ ഫെഡറൽ ഏജൻസികൾക്ക് വിട്ടുകൊടുക്കാൻ മടിക്കുന്ന നഗരങ്ങളെയാണ് പൊതുവെ ‘സാങ്ച്വറി സിറ്റികൾ’ എന്ന് വിളിക്കുന്നത്. കഴിഞ്ഞ വർഷം യു.എസ് നീതിന്യായ വകുപ്പ് പുറത്തുവിട്ട പട്ടികയിൽ ഇത്തരത്തിലുള്ള മൂന്ന് ഡസനോളം നഗരങ്ങളും കൗണ്ടികളും ഉൾപ്പെടുന്നുണ്ട്. ഇവയിൽ ഏതൊക്കെ വിമാനത്താവളങ്ങളെയാണ് ലക്ഷ്യമിടുന്നത് എന്ന് വ്യക്തമല്ല. നേരത്തെ ട്രംപിൻ്റെ ആദ്യ ഭരണകാലത്തും ഇത്തരം നഗരങ്ങൾക്കുള്ള ഫണ്ട് തടയാൻ ശ്രമിച്ചിരുന്നെങ്കിലും കോടതി അത് റദ്ദാക്കിയിരുന്നു.
Move to withdraw US officials from airports in ‘sanctuary cities’; International services concerned
