സ്ട്രാസ്ബർഗ് (ഫ്രാൻസ്): അമേരിക്കൻ പ്രസിഡൻ്റ് ഡോണൾഡ് ട്രംപിനെ പരിഹസിച്ചും വിമർശിച്ചും കൊണ്ടുള്ള ഭീമാകാരമായ നഗ്ന സുവർണ്ണ പ്രതിമ ഫ്രാൻസിലെ സ്ട്രാസ്ബർഗിലുള്ള യൂറോപ്യൻ പാർലമെന്റ് കെട്ടിടത്തിൽ പ്രദർശിപ്പിച്ചു. ‘ഓറഞ്ച് പ്ലേഗ്’ എന്ന് പേരിട്ടിരിക്കുന്ന ഈ ശില്പം പ്രശസ്ത ഡാനിഷ് കലാകാരനായ ജെൻസ് ഗാൽഷിയോട്ട് ആണ് നിർമ്മിച്ചത്.
‘നീതികേടിന്റെ രാജാവ്’ എന്നും ഈ പ്രതിമ വിശേഷിപ്പിക്കപ്പെടുന്നുണ്ട്.
യൂറോപ്യൻ പാർലമെന്റ് സമുച്ചയത്തിലെ ഏറ്റവും തിരക്കേറിയ പ്രധാന കവലയിലാണ് 8.5 അടി ഉയരമുള്ള ഈ വെങ്കല പ്രതിമ സ്ഥാപിച്ചിരിക്കുന്നത്. 23 കാരറ്റ് സ്വർണ്ണത്തകിട് കൊണ്ട് മൂടിയ പ്രതിമയിൽ നഗ്നനായ ട്രംപ് ഒരു കയ്യിൽ നീതിയുടെ തുലാസും മറുകയ്യിൽ ഒരു ഗോൾഫ് ക്ലബ്ബും പിടിച്ചിരിക്കുന്നു. ഇതിലെ ഗോൾഫ് പന്ത് ഭൂഗോളത്തിന്റെ ആകൃതിയിലാണ് രൂപകൽപ്പന ചെയ്തിരിക്കുന്നത്. വസ്ത്രം ധരിച്ച ഒരു സാധാരണക്കാരന്റെ തോളിൽ ട്രംപ് ഇരിക്കുന്ന രീതിയിലാണ് ശില്പത്തിന്റെ ഘടന.
“ഞാൻ ഒരു മനുഷ്യന്റെ പുറത്താണ് ഇരിക്കുന്നത്. എന്റെ ഭാരം കാരണം അയാൾ താഴേക്ക് താഴുകയാണ്. അയാളെ സഹായിക്കാൻ ഞാൻ എന്തും ചെയ്യും, പക്ഷേ അയാളുടെ പുറത്തുനിന്ന് ഇറങ്ങില്ല,” എന്ന ശക്തമായ പരിഹാസ സന്ദേശവും പ്രതിമയുടെ അടിത്തറയിൽ രേഖപ്പെടുത്തിയിട്ടുണ്ട്.
Golden naked Trump statue unveiled at European ParliamentThe 2.5 meter sculpture, titled ‘The Orange Plague’, was created by Danish artist Jens Galschiøt and depicts Trump sitting on another figure’s shoulders while holding a golf club https://t.co/y3DcXd7KXc
— non aesthetic things (@PicturesFoIder) October 7, 2026
ലോകക്രമത്തിനും ജനാധിപത്യ മൂല്യങ്ങൾക്കും കാലാവസ്ഥാ വ്യതിയാനത്തിനെതിരെയുള്ള പോരാട്ടങ്ങൾക്കും ട്രംപ് ഉയർത്തുന്ന ഭീഷണിയെയാണ് ഈ ശില്പം പ്രതിനിധീകരിക്കുന്നതെന്ന് കലാകാരനായ ജെൻസ് ഗാൽഷിയോട്ട് വ്യക്തമാക്കി. പ്രശസ്തമായ ‘രാജാവിന്റെ പുതിയ വസ്ത്രങ്ങൾ’ (The Emperor’s New Clothes) എന്ന കഥയിൽ നിന്നാണ് നഗ്നനായ ഭരണാധികാരി എന്ന ആശയം ഉൾക്കൊണ്ടതെന്നും അദ്ദേഹം പറഞ്ഞു.
മുമ്പ് ബ്രസീലിൽ നടന്ന കോപ്30 ഉച്ചകോടിയിലും, ജർമ്മനിയിലെ മ്യൂണിക്ക് സുരക്ഷാ സമ്മേളനത്തിലും ഈ പ്രതിമ പ്രദർശിപ്പിച്ചിരുന്നു. പാർലമെന്റ് സന്ദർശിക്കുന്നവർക്ക് പ്രതിഷേധ സൂചനയായി ഇതിന്റെ പതിനായിരത്തോളം ചെറിയ മാതൃകകൾ വിതരണം ചെയ്യാനും, ആളുകൾക്ക് സ്വന്തമായി 3D പ്രിന്റ് ചെയ്തെടുക്കാനുള്ള ഫയലുകൾ ഓൺലൈനിൽ നൽകാനും കലാകാരൻ പദ്ധതിയിട്ടിട്ടുണ്ട്.
Naked Trump with scales and a golf club; Danish artist depicts Trump naked at the European Parliament.
