ന്യൂയോർക്ക് മേയർ സോഹ്റാൻ മംദാനിയുടെ ഭാര്യ റമ ദുവാജി, കൗമാരപ്രായത്തിൽ സോഷ്യൽ മീഡിയയിൽ പങ്കുവെച്ച “ഹാനികരമായ” പോസ്റ്റുകൾക്ക് ക്ഷമ ചോദിച്ച് രംഗത്ത്. പഴയ ഓൺലൈൻ പോസ്റ്റുകൾ വീണ്ടും പുറത്ത് വന്നതിനെ തുടർന്ന് വിവാദം ഉയർന്ന പശ്ചാത്തലത്തിലാണ് ദുവാജിയുടെ പ്രതികരണം. കലാരംഗവുമായി ബന്ധപ്പെട്ട ഹൈപ്പർഅലർജിക് വെബ്സൈറ്റിന് നൽകിയ അഭിമുഖത്തിൽ ചിത്രകാരിയായ ദുവാജി പറഞ്ഞു: “മറ്റുള്ളവർക്ക് ദോഷകരമായ ഭാഷ ഞാൻ ഉപയോഗിച്ചതിനെക്കുറിച്ച് ഇപ്പോൾ ഏറെ ലജ്ജ തോന്നുന്നു. 15 വയസായിരുന്നുവെന്നത് അതിന് ഒരു ന്യായീകരണമല്ല.” താൻ ഉണ്ടാക്കിയ വേദന മനസ്സിലാക്കുന്നതായും അതിന് ഹൃദയപൂർവ്വം ക്ഷമ ചോദിക്കുന്നതായും അവർ കൂട്ടിച്ചേർത്തു.
എന്നാൽ, താൻ ഏത് പ്രത്യേക പോസ്റ്റുകളെക്കുറിച്ചാണ് പരാമർശിക്കുന്നതെന്ന് ദുവാജി വ്യക്തമാക്കിയിട്ടില്ല. ഇസ്രായേലുമായി ബന്ധപ്പെട്ട അടുത്തകാലത്തെ സോഷ്യൽ മീഡിയ പ്രവർത്തനങ്ങളെയും കുറിച്ച് അവർ പ്രതികരിച്ചില്ല. പാലസ്തീൻ വിഷയത്തിൽ മംദാനിയുടെ നിലപാടിനെ തുടർന്ന് നഗരത്തിലെ ചില യഹൂദ വിഭാഗങ്ങളിൽ ആശങ്ക ഉയർന്നിരിക്കുന്ന സാഹചര്യത്തിലാണ് ഈ വിവാദം ശ്രദ്ധ നേടുന്നത്.
കഴിഞ്ഞ മാസം ദ വാഷിംഗ്ടൺ ഫ്രീ ബീക്കൺ പ്രസിദ്ധീകരിച്ച റിപ്പോർട്ടിൽ, ദുവാജിയുടെ പഴയ സോഷ്യൽ മീഡിയ പ്രവർത്തനങ്ങൾ പരിശോധിച്ചപ്പോൾ, 1960-70 കാലഘട്ടത്തിലെ പാലസ്തീൻ സായുധപ്രവർത്തകരെ പ്രശംസിക്കുന്ന പോസ്റ്റുകൾ അവർ പങ്കുവെച്ചതായി കണ്ടെത്തിയിരുന്നു. 2015-ൽ ടെൽ അവീവ് “പാലസ്തീൻ ഭൂമി അധിനിവേശം ചെയ്തിരിക്കുകയാണ്” എന്നും “അത് നിലനിൽക്കരുത്” എന്നും പറഞ്ഞ ഒരു പോസ്റ്റും അവർ ഷെയർ ചെയ്തതായി റിപ്പോർട്ടിൽ പറയുന്നു. അതേസമയം, കറുത്തവർഗക്കാരെയും ഗേ സമൂഹത്തെയും അപമാനിക്കുന്ന വാക്കുകൾ മുമ്പ് ഉപയോഗിച്ചതായും റിപ്പോർട്ടിൽ ചൂണ്ടിക്കാട്ടുന്നു.
അതേസമയം, തന്റെ ഭാര്യ “സ്വകാര്യ വ്യക്തിയാണ്” എന്നും സിറ്റി ഹാളിൽ ഔദ്യോഗിക സ്ഥാനമൊന്നും വഹിക്കുന്നില്ലെന്നും സോഹ്റാൻ മംദാനി വ്യക്തമാക്കി. “അഭിമുഖത്തിൽ അവൾ തന്റെ നിലപാട് വ്യക്തമാക്കിയിട്ടുണ്ട്. അതിൽ കൂടുതൽ പറയാൻ ഇല്ല. എന്നാൽ അവൾ വളരെ സത്യസന്ധതയുള്ള വ്യക്തിയാണ്,” എന്നും അദ്ദേഹം മാധ്യമങ്ങളോട് പറഞ്ഞു. മേയറായി മത്സരിക്കാൻ എടുത്ത തന്റെ തീരുമാനത്തിന്റെ ഭാഗമായാണ് ഇത്തരം വിവാദങ്ങളും ചോദ്യങ്ങളും ഉയരുന്നതെന്നും, “ഇത് ഞാൻ സ്നേഹിക്കുന്നവർക്കും ബാധകമാണ്” എന്നും മംദാനി കൂട്ടിച്ചേർത്തു.
ഇതിനുപുറമെ, 2023 ഒക്ടോബർ 7-ന് ഹമാസ് ഇസ്രായേലിനെതിരേ നടത്തിയ ആക്രമണത്തെ അനുകൂലിക്കുന്നതായി തോന്നിച്ച ഒരു ഇൻസ്റ്റാഗ്രാം പോസ്റ്റിന് ലൈക്ക് ചെയ്തതിനും ദുവാജി വിമർശനങ്ങൾ നേരിട്ടിട്ടുണ്ട്. ആ ആക്രമണത്തെ “വിസ്മയകരം” എന്ന് വിശേഷിപ്പിച്ച ഒരു ലേഖനത്തിന് ചിത്രീകരണം നൽകിയതായും റിപ്പോർട്ടുകൾ പറയുന്നു.
ഇക്കാര്യത്തിൽ മംദാനി മുമ്പ് വ്യക്തമാക്കിയതനുസരിച്ച്, മൂന്നാം കക്ഷിയുടെ അഭ്യർത്ഥനപ്രകാരം ഒരു പുസ്തകഭാഗത്തിന് വേണ്ടിയാണ് ദുവാജി ചിത്രീകരണം നൽകിയതെന്നും, ആ ലേഖകന്റെ മുൻ പ്രസ്താവനകൾ അവൾക്ക് അറിയില്ലായിരുന്നുവെന്നും ആണ്. ലേഖകന്റെ പ്രസ്താവനകൾ “അംഗീകരിക്കാനാവാത്തതും അപലപനീയവുമാണ്” എന്നും അദ്ദേഹം കൂട്ടിച്ചേർത്തു.
NYC Mayor Mamdani’s wife Rama Duwaji apologizes for ‘harmful’ social media posts she made as a teen
