വാഷിംഗ്ടൺ: പ്രസിഡന്റ് ഡോണൾഡ് ട്രംപ് നിർമ്മിക്കാൻ ഉദ്ദേശിക്കുന്ന 250 അടി ഉയരമുള്ള വിജയകമാനത്തിന്റെ (Triumphal Arch) നിർമ്മാണം തടയണമെന്നാവശ്യപ്പെട്ട് അമേരിക്കയിലെ പ്രമുഖ രാഷ്ട്രീയ കുടുംബമായ കെന്നഡി കുടുംബം കോടതിയെ സമീപിച്ചു. കെന്നഡി കുടുംബത്തിലെ ഒമ്പത് അംഗങ്ങളാണ് ചൊവ്വാഴ്ച വാഷിംഗ്ടൺ ഡി.സിയിലെ ഫെഡറൽ കോടതിയിൽ ഹർജി നൽകിയത്.
ആർലിംഗ്ടൺ നാഷണൽ സെമിത്തേരിയിലുള്ള കെന്നഡി കുടുംബാംഗങ്ങളുടെ ശവകുടീരങ്ങളുടെയും വീരമൃത്യു വരിച്ച ലക്ഷക്കണക്കിന് അമേരിക്കൻ സൈനികരുടെ സ്മാരകങ്ങളുടെയും കാഴ്ചയെ ഈ ഭീമൻ കമാനം തടസ്സപ്പെടുത്തുമെന്ന് ഹർജിയിൽ ചൂണ്ടിക്കാട്ടുന്നു. മുൻ പ്രസിഡന്റ് ജോൺ എഫ്. കെന്നഡിയുടെ ‘എറ്റേണൽ ഫ്ലെയിം’ ഉൾപ്പെടെയുള്ള സ്മാരകങ്ങളുടെ കാഴ്ച മറയ്ക്കുന്ന തരത്തിലാണ് ഇതിന്റെ രൂപകൽപ്പനയും സ്ഥാനവും.
ലിങ്കൺ മെമ്മോറിയലിന്റെ ഇരട്ടിയിലധികം വലിപ്പവും 25 നില കെട്ടിടത്തിന്റെ ഉയരവുമുള്ള ഈ നിർമ്മിതി, ലിങ്കൺ മെമ്മോറിയലിനും ആർലിംഗ്ടൺ സെമിത്തേരിക്കും ഇടയിലുള്ള ചരിത്രപരമായ കാഴ്ചാപഥത്തെ നശിപ്പിക്കുമെന്ന് കുടുംബം ആരോപിക്കുന്നു. ആഭ്യന്തരയുദ്ധത്തിന് ശേഷമുള്ള രാജ്യത്തിന്റെ ഐക്യത്തെ പ്രതീകപ്പെടുത്തുന്ന രീതിയിലാണ് ഒരു നൂറ്റാണ്ടോളമായി ഈ ഭാഗം നിലനിൽക്കുന്നത്. സെമിത്തേരിയിലെ സംസ്കാര ചടങ്ങുകൾക്ക് ഈ കൂറ്റൻ നിർമ്മിതി ഭംഗം വരുത്തുമെന്നും എതിർക്കുന്നവർ വാദിക്കുന്നു.
വാഷിംഗ്ടൺ ഡി.സി, വിർജീനിയ, ആർലിംഗ്ടൺ കൗണ്ടി, വിമുക്തഭടന്മാർ, പൈതൃക സംരക്ഷകർ എന്നിവർ നേരത്തെ നൽകിയ കേസുകൾക്കൊപ്പമാണ് കെന്നഡി കുടുംബവും ഇപ്പോൾ ചേർന്നിരിക്കുന്നത്. ആർലിംഗ്ടൺ സെമിത്തേരിയിൽ അന്ത്യവിശ്രമം കൊള്ളുന്ന സെനറ്റർമാരായ റോബർട്ട് എഫ്. കെന്നഡി, എഡ്വേർഡ് എം. കെന്നഡി എന്നിവരുടെ മക്കളും പേരക്കുട്ടികളുമാണ് ഹർജിക്കാർ.
ഇത്രയും വലിയൊരു നിർമ്മിതിക്ക് അനുമതി നൽകാൻ കോൺഗ്രസിന് മാത്രമേ ഭരണഘടനാപരമായ അധികാരമുള്ളൂ എന്ന് കെന്നഡി കുടുംബത്തിന് വേണ്ടി ഹാജരാകുന്ന ഡെമോക്രസി ഡിഫൻഡേഴ്സ് ഫണ്ട് അഭിഭാഷകർ വ്യക്തമാക്കി. കടുത്ത എതിർപ്പുകൾക്കിടയിലും പദ്ധതിക്ക് അന്തിമ അനുമതി ലഭിച്ചതിനെത്തുടർന്ന്, കഴിഞ്ഞ ആഴ്ച ഒരു ഫെഡറൽ ജഡ്ജി കമാനത്തിന്റെ നിർമ്മാണം 14 ദിവസത്തേക്ക് താൽക്കാലികമായി തടഞ്ഞിരുന്നു.
Kennedy family heads to court to block construction of Trump’s ‘triumphal arch’
