ടൊറന്റോ: ടൊറന്റോയിലെ ലിബറൽ എംപി സൽമ സഹീദിന്റെ വീട്ടിൽ നിർത്തിയിട്ടിരുന്ന വാഹനങ്ങൾക്ക് തീയിട്ട സംഭവത്തിൽ ടൊറന്റോ പൊലീസ് അന്വേഷണം ആരംഭിച്ചു. സ്കാർബറോ സെന്റർ–ഡോൺ വാലി ഈസ്റ്റ് മണ്ഡലത്തെ പ്രതിനിധീകരിക്കുന്ന സൽമ സഹീദ് വ്യാഴാഴ്ചയാണ് സംഭവത്തെക്കുറിച്ച് സ്ഥിരീകരിച്ചത്. വീട്ടിലുണ്ടായിരുന്ന രണ്ട് വാഹനങ്ങൾ കത്തിനശിച്ചതായി അവർ വ്യക്തമാക്കി.
ബെല്ലമി റോഡ് നോർത്ത്, ലോറൻസ് അവന്യൂ ഈസ്റ്റ് എന്നിവയ്ക്ക് സമീപം വ്യാഴാഴ്ച പുലർച്ചെയാണ് തീപിടിത്തമുണ്ടായത്. വിവരമറിഞ്ഞ് പൊലീസ് ഉദ്യോഗസ്ഥരും അഗ്നിശമനസേനയും സ്ഥലത്തെത്തി. മൂന്ന് വാഹനങ്ങൾ തീയിൽപ്പെട്ട നിലയിലാണ് കണ്ടെത്തിയത്. ടൊറന്റോ അഗ്നിശമനസേന തീ നിയന്ത്രണവിധേയമാക്കിയ ശേഷം സംഭവത്തിന്റെ അന്വേഷണം പൊലീസിന് കൈമാറി.
സംഭവത്തിൽ സംശയാസ്പദമായ അഗ്നിക്കിരയാക്കലായാണ് അന്വേഷിക്കുന്നത്. സംഭവത്തിൽ ആർക്കും പരിക്കേറ്റിട്ടില്ലെന്നും ടൊറന്റോ പൊലീസ് വക്താവ് പറഞ്ഞു. സംഭവത്തിന് പിന്നിലെ ലക്ഷ്യത്തെക്കുറിച്ച് ഇപ്പോൾ ഊഹിക്കാൻ താൻ തയ്യാറല്ലെന്നും പൊലീസ് അന്വേഷണം പൂർത്തിയാകുന്നതുവരെ കാത്തിരിക്കുമെന്നും സൽമ സഹീദ് വ്യക്തമാക്കി.
സംഭവത്തെ കുറിച്ച് ഞാൻ ഊഹാപോഹങ്ങൾ പറയാനില്ല. അന്വേഷണ ഫലത്തിനായി കാത്തിരിക്കും. എന്നാൽ ഇത്തരം ആക്രമണങ്ങൾ അംഗീകരിക്കാനാകില്ല. സ്കാർബറോ സെന്റർ–ഡോൺ വാലി ഈസ്റ്റിലെ ജനങ്ങളെ സേവിക്കുന്നതിൽനിന്ന് ഇത്തരം സംഭവങ്ങൾ എന്നെ പിന്തിരിപ്പിക്കില്ലെന്നും അവർ പറഞ്ഞു.
സൽമ സഹീദും കുടുംബവും സുരക്ഷിതരാണെന്നതിൽ ആശ്വാസമുണ്ടെന്ന് കനേഡിയൻ പ്രധാനമന്ത്രി മാർക്ക് കാർണി പ്രതികരിച്ചു. ഇത് ഭീരുത്വം നിറഞ്ഞ അക്രമവും ഭീഷണിപ്പെടുത്തലുമാണ്. ഇത് അംഗീകരിക്കാനാകില്ലെന്ന് കാർണി എക്സിൽ കുറിച്ചു. കുറ്റക്കാരെ കണ്ടെത്തി നിയമത്തിന്റെ പരമാവധി പരിധിയിൽ ശിക്ഷ ഉറപ്പാക്കുന്നതിനുള്ള ടൊറന്റോ പൊലീസിന്റെ നടപടികൾക്ക് പൂർണ പിന്തുണയുണ്ടെന്നും കാർണി വ്യക്തമാക്കി.
സംഭവത്തിന് പിന്നിൽ ആരാണെന്നതിനെക്കുറിച്ച് പൊലീസ് ഇതുവരെ വിവരങ്ങൾ പുറത്തുവിട്ടിട്ടില്ല. സംഭവത്തെക്കുറിച്ച് എന്തെങ്കിലും വിവരം ലഭിക്കുന്നവർ പൊലീസുമായി ബന്ധപ്പെടണമെന്ന് അന്വേഷണ ഉദ്യോഗസ്ഥർ അഭ്യർഥിച്ചു.
Police have launched an investigation into the incident where vehicles at the home of a Toronto Liberal MP were set on fire.
