ന്യൂഡൽഹി: നീറ്റ് പരീക്ഷാ ക്രമക്കേടുകൾക്കെതിരെയും വിദ്യാഭ്യാസ പരിഷ്കരണങ്ങൾ ആവശ്യപ്പെട്ടും ഡൽഹി ജന്തർ മന്തറിൽ അനിശ്ചിതകാല നിരാഹാര സമരം നടത്തിവന്ന പ്രമുഖ പരിസ്ഥിതി-സാമൂഹിക പ്രവർത്തകൻ സോനം വാങ്ചുക്ക് തൻ്റെ 26 ദിവസം നീണ്ട ഉപവാസം അവസാനിപ്പിച്ചു. കേന്ദ്ര ഭരണകൂടവുമായി നടത്തിയ സുദീർഘമായ ചർച്ചകൾക്കൊടുവിലും രാജ്യത്തുണ്ടായേക്കാവുന്ന പ്രക്ഷോഭങ്ങളുടെ അക്രമസാധ്യതകൾ മുൻനിർത്തിയുമാണ് അദ്ദേഹം സമരം പിൻവലിക്കാൻ തീരുമാനിച്ചത്.
ആരോഗ്യം വഷളായ വാങ്ചുക്കിനെ ഡൽഹി ഹൈക്കോടതിയുടെ ഇടപെടലിനെ തുടർന്ന് ഗുരുഗ്രാമിലെ മേദാന്ത ആശുപത്രിയിലേക്ക് മാറ്റിയിരുന്നു. ആശുപത്രിയിൽ വെച്ച് കേന്ദ്രമന്ത്രിമാരായ ജെ.പി. നദ്ദ, ഡോ. ജിതേന്ദ്ര സിങ് എന്നിവരുടെയും ലേ ലഡാക്ക് അപെക്സ് ബോഡിയിലെ മുതിർന്ന നേതാക്കളുടെയും സാന്നിധ്യത്തിലാണ് അദ്ദേഹം നാരങ്ങാവെള്ളം കുടിച്ച് സമരം അവസാനിപ്പിച്ചത്. 26 ദിവസത്തെ സമരം മൂലം അദ്ദേഹത്തിന് 11 കിലോയോളം ശരീരഭാരം കുറഞ്ഞിരുന്നു.
Just now in the presence of Union Ministers Sh. JP Nadda, Dr. Jitendra Singh and the senior leaders of Apex Body of Leh Ladakh I finally broke my fast after 26 days. Earlier 65 members of parliament from different political parties had visited or signed letters urging me to break… pic.twitter.com/RFCet7Oksy
— Sonam Wangchuk (@Wangchuk66) July 23, 2026
ജന്തർ മന്തറിൽ സമാധാനപരമായി പ്രതിഷേധിച്ച വിദ്യാർത്ഥികൾക്കെതിരെയും പാർലമെൻ്റ് മാർച്ചിൽ പങ്കെടുത്തവർക്കെതിരെയും യാതൊരുവിധ നിയമനടപടികളും സ്വീകരിക്കില്ലെന്ന് കേന്ദ്ര സർക്കാർ ചർച്ചയിൽ ഉറപ്പ് നൽകിയിട്ടുണ്ട്. ചോദ്യപേപ്പർ ചോർച്ച തടയുന്നതിനായി കർശനമായ പുതിയ നിയമനിർമ്മാണവും ഫാസ്റ്റ് ട്രാക്ക് കോടതികളും സ്ഥാപിക്കുമെന്ന് പ്രധാനമന്ത്രി നരേന്ദ്ര മോദിയും വ്യക്തമാക്കി.
കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ്റെ രാജി ആവശ്യപ്പെട്ട് ‘കോക്റോച്ച് ജനത പാർട്ടി’ (സിജെപി) നടത്തുന്ന വിദ്യാർത്ഥി പ്രക്ഷോഭങ്ങൾക്ക് ഐക്യദാർഢ്യം പ്രഖ്യാപിച്ചാണ് ജൂൺ 28 മുതൽ വാങ്ചുക്ക് നിരാഹാരം ആരംഭിച്ചത്. വാങ്ചുക്ക് സമരം അവസാനിപ്പിച്ചെങ്കിലും, കേന്ദ്ര വിദ്യാഭ്യാസ മന്ത്രി രാജിവെക്കുന്നത് വരെ തങ്ങളുടെ സമാധാനപരമായ പ്രതിഷേധം തുടരുമെന്ന് സിജെപി നേതൃത്വം അറിയിച്ചു.
Solution reached after long negotiations: Sonam Wangchuk ends 26-day hunger strike
