ന്യൂഡൽഹി: ഡൽഹി ജന്തർ മന്തറിൽ ഉയർന്നത് വെറുപ്പിൻ്റെയോ അക്രമത്തിൻ്റെയോ ശബ്ദമല്ല, മറിച്ച് രാജ്യത്തെ ലക്ഷക്കണക്കിന് യുവാക്കളുടെ വികാരപ്രകടനമാണെന്ന് ലോക്സഭാ പ്രതിപക്ഷ നേതാവ് രാഹുൽ ഗാന്ധി. രാജ്യത്തെ പിടിച്ചുലച്ച ചോദ്യപേപ്പർ ചോർച്ചയ്ക്കും വിദ്യാഭ്യാസ രംഗത്തെ അപാകതകൾക്കുമെതിരെ തെരുവിലിറങ്ങിയ വിദ്യാർത്ഥികളെയും ഉദ്യോഗാർത്ഥികളെയും പൂർണ്ണമായി പിന്തുണച്ചാണ് അദ്ദേഹം പാർലമെൻ്റിൽ കേന്ദ്ര സർക്കാരിനെതിരെ ആഞ്ഞടിച്ചത്.
ഇതൊരു രാഷ്ട്രീയ ചേരിതിരിവായി കാണരുതെന്നും, ഭരണകക്ഷിയായ ബിജെപി ഉൾപ്പെടെയുള്ള എല്ലാ രാഷ്ട്രീയ പാർട്ടികളും ഈ യുവതലമുറയുടെ ആക്രോശം കേൾക്കാൻ തയ്യാറാകണമെന്നും രാഹുൽ ഗാന്ധി ആവശ്യപ്പെട്ടു. “ബിജെപി നേതാക്കൾ സ്വന്തം വീടുകളിലെ കുട്ടികളോട് സംസാരിച്ചാൽ, അവരും തെരുവിൽ സമരം ചെയ്യുന്ന സുഹൃത്തുക്കളുടെ വികാരങ്ങൾക്കൊപ്പമാണെന്ന് ബോധ്യപ്പെടും,” എന്ന് അദ്ദേഹം സഭയിൽ ഓർമ്മിപ്പിച്ചു. തങ്ങളുടെ ഭാവി ഇരുളടയുന്നതിലെ ആശങ്കയാണ് യുവാക്കളെ തെരുവിലെത്തിച്ചത്. അവരുടെ ഈ ആവശ്യങ്ങളെ അക്രമമായി ചിത്രീകരിച്ച് ഒതുക്കാൻ നോക്കരുതെന്നും അദ്ദേഹം കൂട്ടിച്ചേർത്തു.
ചില വിഡ്ഢികൾ സ്വയം ദൈവമാണെന്ന് കരുതുന്നുവെന്നും എല്ലാം അവർ സൃഷ്ടിച്ചതാണെന്നു പ്രചരിപ്പിക്കുന്നുവെന്നും രാഹുൽ പറഞ്ഞു. ‘‘ഈ വിഡ്ഢികളെ ദൈവമായിക്കണ്ട് ആരാധിക്കുന്ന അന്ധഭക്തർ എന്ന മറ്റൊരു വിഭാഗവുമുണ്ട്. വിഡ്ഢിയെ പിന്തുടരുന്നവരാണ് അന്ധഭക്തർ’’ – രാഹുൽ ഗാന്ധി പറഞ്ഞു
അതേസമയം, ആൻ്റി പേപ്പർ ലീക്ക് ബില്ലിന്മേലുള്ള ചർച്ചയ്ക്കിടെ രാഹുൽ ഗാന്ധി നടത്തിയ ‘വിഡ്ഢി’ പരാമർശത്തിനെതിരെ ഭരണപക്ഷം ശക്തമായ പ്രതിഷേധവുമായി രംഗത്തെത്തി. ജന്തർ മന്തറിലെ വിദ്യാർത്ഥികളുമായുള്ള സംഭാഷണം ഉദ്ധരിച്ച് അദ്ദേഹം നടത്തിയ പ്രയോഗങ്ങൾ സഭയ്ക്ക് നിരക്കാത്തതാണെന്ന് കേന്ദ്ര മന്ത്രി കിരൺ റിജിജു ചൂണ്ടിക്കാട്ടി. എന്നാൽ താൻ വ്യക്തിപരമായി ആരെയും അധിക്ഷേപിച്ചിട്ടില്ലെന്ന് രാഹുൽ വ്യക്തമാക്കിയെങ്കിലും, സഭയിൽ കനത്ത ബഹളം ഉയർന്നതിനെ തുടർന്ന് ചർച്ചാവിഷയത്തിൽ മാത്രം ഒതുങ്ങി സംസാരിക്കാൻ സ്പീക്കർ ഓം ബിർള അദ്ദേഹത്തോട് ആവശ്യപ്പെടുകയായിരുന്നു.
“If BJP leaders talk to their children at home, they will realise that they too share the sentiments of their friends protesting on the streets” – Rahul Gandhi in Lok Sabha
