ബഹിരാകാശ പര്യവേക്ഷണ രംഗത്ത് ചരിത്ര നേട്ടവുമായി ഇലോൺ മസ്കിന്റെ സ്പേസ്എക്സ്. കമ്പനിയുടെ ഏറ്റവും വലിയതും ശക്തവുമായ സ്റ്റാർഷിപ്പ് റോക്കറ്റ് ഭൂമിയെ ചുറ്റുന്ന ഭ്രമണപഥം ലക്ഷ്യമാക്കി വിജയകരമായി വിക്ഷേപിച്ചു. ടെക്സസിലെ സ്റ്റാർബേസിൽ നിന്ന് നടന്ന സ്റ്റാർഷിപ്പിന്റെ 14-ാം പരീക്ഷണ വിക്ഷേപണം ഭ്രമണപഥത്തിലെത്തിക്കുക എന്ന ലക്ഷ്യം കൈവരിച്ചു. വിക്ഷേപണം കഴിഞ്ഞ് രണ്ടര മിനിറ്റിൽ വേർപെട്ട ബൂസ്റ്റർ എഞ്ചിൻ ഏഴാം മിനിറ്റിൽ സുരക്ഷിതമായി കടലിൽ വന്നുപതിച്ചു.
റോക്കറ്റിന്റെ വിക്ഷേപണത്തിനൊപ്പം കൂടുതൽ ശേഷിയുള്ള പുതിയ തലമുറയിൽപെട്ട 26 സ്റ്റാർലിങ്ക് V3 ഉപഗ്രഹങ്ങളെക്കൂടി ഭ്രമണപഥത്തിൽ എത്തിക്കാൻ സ്പേസ്എക്സിന് സാധിച്ചു. മുൻതലമുറയെക്കാൾ ഇരട്ടി സൗരോർജ്ജ ഉൽപ്പാദന ശേഷിയുള്ളവയാണ് ഈ പുതിയ ഉപഗ്രഹങ്ങൾ. പൂർണ്ണമായും പുനരുപയോഗിക്കാൻ കഴിയുന്ന രീതിയിൽ രൂപകൽപ്പന ചെയ്ത സ്റ്റാർഷിപ്പും സൂപ്പർ ഹെവി ബൂസ്റ്ററും വഴി ഭാവിയിൽ വളരെ കുറഞ്ഞ ചെലവിൽ വലിയ ഭാരം ബഹിരാകാശത്ത് എത്തിക്കാൻ കഴിയും.
അമേരിക്കൻ ബഹിരാകാശ യാത്രികരെ വീണ്ടും ചന്ദ്രനിൽ എത്തിക്കുന്നതിനുള്ള നാസയുടെ ആർട്ടെമിസ് ദൗത്യം ഉൾപ്പെടെയുള്ള സുപ്രധാന ചാന്ദ്ര ദൗത്യങ്ങൾക്ക് ഈ വിജയകരമായ വിക്ഷേപണം നിർണ്ണായകമാകും. സ്വന്തം ബഹിരാകാശ ദൗത്യങ്ങൾക്ക് പുറമേ 2027-ഓടെ ബഹിരാകാശത്ത് സൂപ്പർ കമ്പ്യൂട്ടിംഗ് ശൃംഖലകൾ സ്ഥാപിക്കാനും സ്പേസ്എക്സിന് പദ്ധതിയുണ്ട്.
Starship Successfully Reaches Orbit: SpaceX Launches Rocket with 26 Starlink Satellites
