ആറുമാസത്തിലേറെയായി തുടരുന്ന യുഎസ്–ഇറാൻ സംഘർഷത്തിനിടെ മധ്യപൂർവദേശത്തെ പിരിമുറുക്കം തുടരുന്നു. ഇതിനിടെ, തന്ത്രപ്രധാനമായ ഹോർമുസ് കടലിടുക്ക് തുറക്കാൻ ഇറാൻ തയ്യാറെടുക്കുകയാണെന്ന് യുഎസ് പ്രസിഡന്റ് ഡൊണാൾഡ് ട്രംപ് പറഞ്ഞു. ഇറാനിലേക്ക് പണമെത്തുന്നില്ലെന്നും അതാണ് അവരെ പ്രതിസന്ധിയിലാക്കിയതെന്നും ട്രംപ് അവകാശപ്പെട്ടു.
ശനിയാഴ്ച മാധ്യമപ്രവർത്തകരോട് സംസാരിക്കവെയാണ് ട്രംപ് ഇക്കാര്യം പറഞ്ഞത്. “അവർക്ക് ഉടൻ ഹോർമുസ് കടലിടുക്ക് തുറക്കുകയാണ് വേണ്ടത്. എന്തുകൊണ്ടാണെന്ന് അറിയാമോ? അവർ തകർന്നുകൊണ്ടിരിക്കുകയാണ്. പണമെത്തുന്നില്ല എന്നതാണ് കാരണം. ഹോർമുസ് കടലിടുക്കിലൂടെയാണ് അവർക്ക് പണം ലഭിക്കുന്നത്,” എന്ന് ട്രംപ് പറഞ്ഞു.
അവർ സ്വയം പ്രതിസന്ധിയിലായി. കടലിടുക്ക് അടച്ച് ലോകത്തിന് പ്രശ്നമുണ്ടാക്കാം എന്നായിരുന്നു അവരുടെ ചിന്ത. പിന്നീട് ഞാൻ ഇടപെട്ടു. സൈനിക ചരിത്രത്തിലെ ഏറ്റവും വലിയ ഉപരോധം ഞങ്ങൾ ഏർപ്പെടുത്തി. ഉരുക്കുമതിൽ പോലെയാണ് അത്. ഇപ്പോൾ അവർക്ക് പണമൊന്നും ലഭിക്കുന്നില്ല. കടലിടുക്ക് അടയ്ക്കാനാണ് അവർ ശ്രമിച്ചത്. അതുകൊണ്ട് ശരി, ഞങ്ങൾ അത് നിങ്ങൾക്കായി അടയ്ക്കാം, എന്നാൽ മറ്റുള്ളവർക്ക് ഉപയോഗിക്കാം എന്ന് ഞാൻ പറഞ്ഞുവെന്നും ട്രംപ് കൂട്ടിച്ചേർത്തു.
ഹോർമുസ് കടലിടുക്ക് വീണ്ടും തുറക്കുന്നതുമായി ബന്ധപ്പെട്ട് ഇറാൻ മുന്നോട്ടുവച്ച കരാർ താൻ നേരത്തെ തള്ളിയതായും ട്രംപ് പറഞ്ഞു. അവർ ഒരു നിർദേശം മുന്നോട്ടുവച്ചു, പക്ഷേ ഞാൻ അത് നിരസിച്ചുവെന്ന് വൈറ്റ് ഹൗസിൽനിന്ന് പുറപ്പെടുന്നതിനിടെ ട്രംപ് പറഞ്ഞു. കടലിടുക്ക് ഉടൻ തുറക്കുന്ന തരത്തിലുള്ള കരാറാണ് അവർ ആഗ്രഹിക്കുന്നത്. കാരണം അവർ വലിയ തോതിൽ നഷ്ടം നേരിടുകയാണെന്നും ട്രംപ് കൂട്ടിച്ചേർത്തു.
ഹോർമുസ് കടലിടുക്ക് തുറക്കുന്നതിനും ഇറാൻ തുറമുഖങ്ങൾക്ക് ഏർപ്പെടുത്തിയ യുഎസ് ഉപരോധം പിൻവലിക്കുന്നതിനുമുള്ള കരാർ സംബന്ധിച്ച് യുഎസ്, ഇറാൻ പ്രതിനിധികൾ ചർച്ച നടത്തിയിരുന്നുവെന്ന് ബ്ലൂംബെർഗ് റിപ്പോർട്ട് ചെയ്തു. അതേസമയം, യുഎസ് ഇടക്കാല തിരഞ്ഞെടുപ്പിന് ശേഷം ഇറാനെതിരായ യുഎസ് ബോംബാക്രമണം പുനരാരംഭിക്കാനാണ് ട്രംപ് ഉദ്ദേശിക്കുന്നതെന്ന് വാൾസ്ട്രീറ്റ് ജേണൽ നേരത്തെ റിപ്പോർട്ട് ചെയ്തിരുന്നു.
കടലിടുക്കിലൂടെ സഞ്ചരിക്കുന്ന കപ്പലുകൾക്ക് നേരെയുള്ള ഇറാന്റെ ആക്രമണം അവസാനിപ്പിക്കാൻ ടെഹ്റാനിൽ സമ്മർദം ചെലുത്തുന്നതിനായി യുഎസ് ഇറാനെതിരെ സാമ്പത്തിക ഉപരോധം ഏർപ്പെടുത്തിയിട്ടുണ്ടെന്ന് റോയിട്ടേഴ്സ് റിപ്പോർട്ട് ചെയ്തു. ഹോർമുസ് കടലിടുക്ക് തുറക്കുന്നതിന് ഏഴ് ദിവസത്തെ സമയപരിധി നിശ്ചയിക്കുന്നതായിരിക്കും നിർദേശിച്ച കരാറെന്ന് ഇറാൻ വിദേശകാര്യ മന്ത്രി അബ്ബാസ് അറാഖ്ചി വെള്ളിയാഴ്ച യുഎന്നിൽ മാധ്യമപ്രവർത്തകരോട് പറഞ്ഞതായും റിപ്പോർട്ടിൽ പറയുന്നു.
‘They have no money coming in, dying’: Donald Trump claims Iran ready to reopen Strait of Hormuz
