വാഷിംഗ്ടൺ: വ്യാജ അഫീൻ (opium poppy) കൃഷി തടയുന്നതിനും സപ്ലൈ ചെയിൻ സുരക്ഷ ശക്തമാക്കുന്നതിനും പ്രധാനമന്ത്രി നരേന്ദ്ര മോദിയും ഇന്ത്യൻ സർക്കാരും നടത്തുന്ന ശ്രമങ്ങളെ യുഎസ് പ്രസിഡന്റ് ഡോണൾഡ് ട്രംപ് പ്രശംസിച്ചു. അതേസമയം, ഫെന്റാനിൽ, മെത്താംഫെറ്റാമൈൻ തുടങ്ങിയ മാരകമായ സിന്തറ്റിക് മയക്കുമരുന്നുകൾ നിർമ്മിക്കാൻ ഉപയോഗിക്കുന്ന പ്രിക്വാഴ്സർ കെമിക്കലുകളുടെ (രാസവസ്തുക്കൾ) ഒഴുക്ക് തടയാൻ ചൈന കൂടുതൽ കർശനമായ നടപടികൾ സ്വീകരിക്കണമെന്ന് അദ്ദേഹം ആവശ്യപ്പെട്ടു.
സെപ്റ്റംബർ 16-ന് പുറപ്പെടുവിച്ച യുഎസിന്റെ വാർഷിക പ്രസിഡൻഷ്യൽ നിർണ്ണയത്തിലാണ് ട്രംപ് ഇക്കാര്യം വ്യക്തമാക്കിയത്. യുണൈറ്റഡ് സ്റ്റേറ്റ്സ്-ഇന്ത്യ ഡ്രഗ് പോളിസി ഫ്രെയിംവർക്ക് വഴിയുള്ള ഇരുരാജ്യങ്ങളുടെയും സഹകരണത്തെ അദ്ദേഹം സ്വാഗതം ചെയ്തു.
2027 സാമ്പത്തിക വർഷത്തിൽ ലോകത്ത് മയക്കുമരുന്ന് കടത്തോ നിയമവിരുദ്ധ ഉത്പാദനമോ കൂടുതലായി നടക്കുന്ന 23 രാജ്യങ്ങളുടെ പട്ടിക യുഎസ് സ്റ്റേറ്റ് ഡിപ്പാർട്ട്മെന്റ് പുറത്തുവിട്ടിട്ടുണ്ട്. ഇന്ത്യ, ചൈന, പാകിസ്ഥാൻ, അഫ്ഗാനിസ്ഥാൻ, മെക്സിക്കോ, കൊളംബിയ എന്നിവയുൾപ്പെടെയുള്ള രാജ്യങ്ങളാണ് ഈ പട്ടികയിലുള്ളത്.
എന്നാൽ ഈ പട്ടികയിൽ ഉൾപ്പെട്ടു എന്നതിനർത്ഥം ആ രാജ്യം മയക്കുമരുന്ന് കടത്തിനെതിരെ പോരാടുന്നതിൽ പരാജയപ്പെട്ടെന്നോ യുഎസുമായി സഹകരിക്കുന്നില്ലെന്നോ അല്ലെന്ന് ട്രംപ് ഭരണകൂടം വ്യക്തമാക്കി. ഭൂമിശാസ്ത്രപരവും വാണിജ്യപരവുമായ കാരണങ്ങളാൽ മയക്കുമരുന്ന് കടത്താൻ മാഫിയകൾ ഈ രാജ്യങ്ങളുടെ മണ്ണ് ഉപയോഗിക്കുന്നു എന്നതുകൊണ്ടാണ് ഇവരെ പട്ടികയിൽ ഉൾപ്പെടുത്തിയത്. കഴിഞ്ഞ ഒരു വർഷത്തിനിടെ ലഹരിവിരുദ്ധ പ്രവർത്തനങ്ങളിൽ ‘പൂർണ്ണമായി പരാജയപ്പെട്ട’ രാജ്യങ്ങളായി യുഎസ് പ്രഖ്യാപിച്ച അഫ്ഗാനിസ്ഥാൻ, ബൊളീവിയ, ബർമ്മ, കൊളംബിയ എന്നീ രാജ്യങ്ങളുടെ കൂട്ടത്തിൽ ഇന്ത്യയില്ല എന്നതും ശ്രദ്ധേയമാണ്.
മയക്കുമരുന്ന് നിർമ്മാണത്തിനുള്ള രാസവസ്തുക്കളുടെ ലോകത്തിലെ ഏറ്റവും വലിയ ഉത്പാദകർ ചൈനയാണെന്ന് ട്രംപ് കുറ്റപ്പെടുത്തി. ചൈനീസ് പ്രസിഡന്റ് ഷി ജിൻപിംഗുമായി ഈ വിഷയം നേരിട്ട് ചർച്ച ചെയ്തിട്ടുണ്ടെന്നും, കയറ്റുമതിയിൽ ചൈന ചില നിയന്ത്രണങ്ങൾ കൊണ്ടുവന്നിട്ടുണ്ടെങ്കിലും ക്രിമിനലുകൾ അത് മറികടക്കുകയാണെന്നും അദ്ദേഹം പറഞ്ഞു. രാസവസ്തുക്കളുടെ ഒഴുക്ക് തടയാൻ ചൈന കൂടുതൽ ശക്തമായ നിയമപാലന നടപടികൾ സ്വീകരിക്കണമെന്നും ട്രംപ് ആവശ്യപ്പെട്ടു.
Trump applauds India’s anti-drug efforts; India sets an example in curbing opium cultivation; stern warning to China.
