ന്യൂയോർക്ക്: ആഗോള രാഷ്ട്രീയത്തിൽ നിർണായക വഴിത്തിരിവായേക്കാവുന്ന 81-ാമത് ഐക്യരാഷ്ട്രസഭ പൊതുസഭാ സമ്മേളനത്തിൽ പങ്കെടുക്കാനായി യുഎസ് പ്രസിഡൻ്റ് ഡോണൾഡ് ട്രംപ് ന്യൂയോർക്കിലെത്തി. ഇറാൻ, യുക്രെയ്ൻ യുദ്ധങ്ങൾ ഉൾപ്പെടെയുള്ള ആഗോള പ്രതിസന്ധികൾ ചർച്ചയാകുന്ന സമ്മേളനത്തിൽ ഇന്ത്യയെ പ്രതിനിധീകരിച്ച് വിദേശകാര്യമന്ത്രി എസ്. ജയശങ്കർ പങ്കെടുക്കും. ചൊവ്വാഴ്ച യുഎന്നിൽ വെച്ച് യുക്രെയ്ൻ പ്രസിഡന്റ് വൊളോഡിമിർ സെലെൻസ്കിയുമായി ട്രംപ് കൂടിക്കാഴ്ച നടത്തും. യുക്രെയ്നിലെ ഊർജ്ജ നിലയങ്ങൾക്ക് നേരെയുള്ള ആക്രമണം അവസാനിപ്പിക്കാൻ റഷ്യയുമായി ‘ഊർജ്ജ സന്ധി’ക്ക് സെലെൻസ്കി ട്രംപിന്റെ പിന്തുണ തേടുമെന്നാണ് സൂചന.
ഇറാൻ വിദേശകാര്യമന്ത്രി അബ്ബാസ് അരാഗ്ചി പൊതുസഭാ സമ്മേളനത്തിൽ പങ്കെടുക്കാനായി തിങ്കളാഴ്ച ന്യൂയോർക്കിലെത്തി. യുഎസും ഇസ്രായേലും ചേർന്ന് ഇറാനിൽ ബോംബാക്രമണം നടത്തുകയും ഫെബ്രുവരി 28-ന് നിലവിലെ യുദ്ധം ആരംഭിക്കുകയും ചെയ്തതിന് ശേഷം അദ്ദേഹം ആദ്യമായാണ് അമേരിക്ക സന്ദർശിക്കുന്നത്. യുഎൻ പൊതുസഭാ സമ്മേളനത്തിനിടെ ഇറാൻ പ്രസിഡന്റ് മസൂദ് പെസെഷ്കിയനുമായി കൂടിക്കാഴ്ച നടത്തുന്നതിന് താൻ “ഒരുപക്ഷേ തയ്യാറായേക്കും” എന്ന് ട്രംപ് വ്യക്തമാക്കിയതായി, ഇറാൻ പ്രസിഡന്റിന്റെ വരവിന് മുന്നോടിയായി പുറത്തുവന്ന റിപ്പോർട്ടുകൾ സൂചിപ്പിക്കുന്നു. റഷ്യൻ വിദേശകാര്യമന്ത്രി സെർജി ലാവ്റോവും ന്യൂയോർക്കിലെത്തുമെന്നാണ് പ്രതീക്ഷിക്കുന്നത്. അദ്ദേഹം യുഎസ് സ്റ്റേറ്റ് സെക്രട്ടറി മാർക്കോ റൂബിയോയുമായി കൂടിക്കാഴ്ച നടത്തും.
Trump prepares to address the UN; Iranian leadership also in the US; S. Jaishankar representing India.
