റഷ്യൻ പ്രസിഡന്റ് വ്ലാഡിമിർ പുടിനുമായി അടുത്ത ബന്ധമുള്ള റഷ്യൻ കോടീശ്വരൻ ഉമർ ക്രെംലേവ് നൽകിയ വിവാഹ സമ്മാനം മകൻ ഡൊണാൾഡ് ട്രംപ് ജൂനിയർ തിരിച്ചുനൽകിയതായി യുഎസ് പ്രസിഡന്റ് ഡൊണാൾഡ് ട്രംപ്. ട്രംപ് ജൂനിയറിന്റെ വിവാഹത്തിന് പിന്നാലെ രണ്ട് രാത്രികളിലായി നടന്ന ആഘോഷങ്ങൾക്ക് ക്രെംലേവ് ആതിഥേയത്വം വഹിച്ചിരുന്നു.
വെള്ളിയാഴ്ച ഓവൽ ഓഫീസിൽ മാധ്യമപ്രവർത്തകരുടെ ചോദ്യങ്ങൾക്ക് മറുപടി നൽകുകയായിരുന്നു ട്രംപ്. ക്രെംലേവിൽ നിന്ന് ട്രംപ് ജൂനിയർ വിലകൂടിയ സമ്മാനം സ്വീകരിച്ചത് ഉചിതമായിരുന്നോ എന്ന ചോദ്യത്തിന്, അത് നിയമപരമായി അനുവദനീയമാണെന്നായിരുന്നു ട്രംപിന്റെ പ്രതികരണം.
“അത് പൂർണമായും അനുവദനീയമാണ്. പലരും ഇത്തരത്തിൽ പാർട്ടികളും ആഘോഷങ്ങളും നടത്താറുണ്ട്. എന്നാൽ അദ്ദേഹം പണം തിരിച്ചുനൽകിയെന്നാണ് ഞാൻ മനസ്സിലാക്കുന്നത്. അത് കൈവശം വയ്ക്കാൻ അദ്ദേഹം ആഗ്രഹിച്ചില്ല. അദ്ദേഹത്തിന് പരിചയമുള്ള, ഒരുപക്ഷേ സുഹൃത്തായ ഒരാളാണ് വിവാഹ ആഘോഷം നടത്തിയത്. ഇത് വളരെ സാധാരണമാണ്,” ട്രംപ് പറഞ്ഞു.
ട്രംപ് ജൂനിയറിന് ക്രെംലേവ് നൽകിയ സമ്മാനത്തെക്കുറിച്ച് ആദ്യം റിപ്പോർട്ട് ചെയ്തത് പ്രോപബ്ലിക്കയാണ്. വിദേശ എതിരാളികളുമായി അടുത്ത ബന്ധമുള്ള വ്യക്തികളിൽ നിന്ന് വിലകൂടിയ സമ്മാനങ്ങൾ സ്വീകരിക്കുന്നത് താൽപര്യസംഘർഷത്തിനും ട്രംപ് കുടുംബത്തിനുമേൽ സ്വാധീനം ചെലുത്താനുള്ള സാധ്യതയ്ക്കും ഇടയാക്കുമെന്ന് നിയമനിർമാതാക്കളും വിമർശകരും ചൂണ്ടിക്കാട്ടിയിരുന്നു.
അതേസമയം, ട്രംപ് ജൂനിയർ ക്രെംലേവിന് പണം തിരിച്ചുനൽകിയെന്നതിന് തെളിവ് നൽകണമെന്ന് വൈറ്റ് ഹൗസിനോടും ട്രംപ് ഓർഗനൈസേഷനോടും എബിസി ന്യൂസ് ആവശ്യപ്പെട്ടിട്ടുണ്ട്. ട്രംപ് ജൂനിയർ പണം തിരിച്ചുനൽകിയെന്ന വിവരം ഇതാദ്യമായാണ് പുറത്തുവരുന്നതെന്ന് മാധ്യമപ്രവർത്തകൻ ചൂണ്ടിക്കാട്ടി. ട്രംപ് ജൂനിയറിന്റെ ഭാര്യ ബെറ്റിന ആൻഡേഴ്സൺ ഇൻസ്റ്റഗ്രാമിൽ പങ്കുവച്ച കുറിപ്പിൽ, വിവാഹത്തിന് ശേഷമുള്ള രണ്ട് രാത്രികളിലെ ആഘോഷങ്ങൾ ക്രെംലേവ് വളരെ ഉദാരമായി സംഘടിപ്പിച്ചുവെന്ന് പറഞ്ഞു. സുഹൃത്തിൽ നിന്ന് ലഭിച്ച അസാധാരണമായ സമ്മാനമായിരുന്നു അതെന്നും അതിന് തങ്ങൾ ഏറെ നന്ദിയുള്ളവരാണെന്നും അവർ വ്യക്തമാക്കിയിരുന്നു.
ക്രെംലേവിനും ട്രംപ് ജൂനിയറിനും സൗഹൃദബന്ധമാണുള്ളത്. ഏതാനും വർഷങ്ങൾക്ക് മുമ്പാണ് ഇരുവരും ആദ്യമായി കണ്ടുമുട്ടിയതെന്ന് ക്രെംലേവിന്റെ പ്രസ് ഓഫീസ് പ്രോപബ്ലിക്കയോടും വ്യക്തമാക്കി.
Trump says Donald Trump Jr. repaid Russian oligarch for wedding party
